Tuesday, December 30, 2014

...الأمثال الشعبية...




أمثالنا الشعبية
بحر ملهوش أخر
فيها الصح وفيها الغلط
فيها اللى راحت عليه
وفيها اللى الفايدة مستمرة فيه
وفيه المتوافقين
وفيه المتضادين
وفيه اللى ما يصحش نقولها ولا نذكرها

 
المهم انا نفسى أعمل تدوينة
اجمع فيها كل الأمثال الشعبية
اللى أعرفها او اللى بأسمعها
وكمان اللى ممكن الأصحاب
يقولولى عليـــــــــــــــــها
طبعا حتقولولى وانتى مين
علشان تعملى موضوع
زى دا
اهوة بقى
موضوع وزانن على راسى
وحاخليه مفتوح
بمعنى
كل ما أفتكر مثل حاكتبه
وكل ما يجينى او يبعتلى
حد مثل حاكتبه وأكتب اسم اللى بعته
ونبدأ النهاردة

أ
اللى يجى منه أحسن منهالباب اللى يجيلك منه الريح سده وأستريح
أبن الوز عوام
أصبر على جارك السو يايرحل يا تجيله داهية
أضرب المربوط يخاف السايب
اللى يحتاجه البيت يحرم على الجامع
أعمل الخير وارميه البحر
الكدب ملهوش رجلين
العشرة ماتهونش الأ على ابن الحرام
الدهن فى العتاقى
الشباب شباب القلب

البيت بيت ابونا وجُم الغُرب يطرودونا
الجنازة حارة والميت كلب
أتلم المتعوس على خايب الرجا

اخطب لبنتك ولا تخطبش لأبنك
أدينى عمر وارمينى البحر
الغالى تمنه فيه

اللى أيده فى الميه غير اللى ايده فى النار
العين فلقت الحجر
القلب على القلب رحمة
الأيد البطالة نجسة
أيد على أيد تساعد
ايد لوحدها ما تصقفش
اللى ما يعرفش يقول عدس
العين عليها حارس

أمسك الخشب

العدو يوم ما يصفا يخفا
الملافظ سعد
الأخ أخو مراته والهبلة تحلف بحياته

النوم سلطان
اللى يحب ما يكرهش
أكفى على الخبر ماجور
اللى يحب يبان فى عينيه
 الجوز موجود والأبن مولود والأخ مفقود
أتقى شر من أحسنت اليه
الراجل لو غول ما بيكلش مراته
اللى جرى ما ينقال ولا ينقرا
الخال والدالخالة والدة
الولد القرف يجيب لأهله الشتيمة
القارعة تتباهى بشعر بنت اختها
اللى فات على اللسان نتان
امشى بين الناس معرّش ولا تمشيش مكرّش
البطن ما بتفتتش
اللى يجى فى الريش بقشيش
أبن الأبن أبن القلب وابن البنت أبن (الكلب)عفوا ياعنى
الضرة مرة

اللى تغلب بيه العب به
الدفا عفا
اللى يختشى من بنت عمه ما يجبش منها عيال
اللى يخاف من العفريت يطلعله
الصيت ولا الغنى
أمشى عدل يحتار عدوك فيك
أجرى يا ابن أدم جرى الوحوش غير نصيبك لن تحوش
اللى أتلسع من الشوربة ينفخ فى الزبادى
أسعى يا عبد وأنا أسعى معاك
أطعم الفم تستحى العين
أعمل خير وأرميه البحر
إيش تاخد الريح من البلاط

الكبر على أهل الكبر صدقة

أدى العيش لخبازه ولو يأكل تلات اربع
الجنية غلب الكارنية
أبنك على ما تربيه وجوزك على ما تعوديه
إن كبر أبنك خاووويه
اللى من غير أم حاله تغم
أكفى القدرة على فومها تطلع البنت لأمها
أصحاب العقول فى راحة
اللى جوزها يقولها ياعورة جيرانها يلعبوا بيها الكورة
اللى بيته من أزاز ما يحدفش الناس بالطوب
أيش جاب الغراب لأمه
الشاطرة تغزل برجل حمار

إن كان جارك فى خير افرحله إن ماجاش منه يغنيك عنه
الأهل عزوة

أهلك لا تُهلك
الأقارب عقارب

إن كان لك صاحب لا تحاسبه ولا تناسبه
اللى له ضهر ما يضربش على بطنه
إن كان حبيبك عسل ما تلحسوش كله
القرش الأبيض ينفع فى اليوم الاسود
الأم تعشش والأب يطفش
أكنس بيتك ورشه ما تعرف مين اللى يخشه
البانى طالع والفاحت نازل
إن فاتك الميرى أتمرغ فى ترابه

أدينى عمر وأرمينى البحر

اللى ما يشترى يتفرج
اللي ما يحطنيش كحله في عينه ما استعناهوش مداس فى رجلي 

أن كنتوا نسيتوا اللي جرى هاتوا الدفاتر تتقرا 
(زهــــراء
)


إن عشقت إعشق قمر وإن سرقت إسرق جمل
اللى بيخاف من العفريت بيطلعله
اربط الحمار مطرح ما يحب صاحبه

الأدب فضلوه عن العلم
أدب ابنك صغير تفرح بيه كبير
أدعي على ابنى و أكره اللى يقول آمين
الضرب فى الميت حرام
إن جار عليك جارك غير باب دارك
 الكلام الزين بيسد الدين

-مدونة الفرسان-
 



ب
بعد ما شاب ودوه الكُتّاب

باب النجار مخلع
بيخانق دبان وشه

بكرة نقعد جنب الحيطة ونسمع الزيطة
بيت النتاش ما يعلاشباب النجار مخلع
بصلة المحب خروف


تتيجى تصيده يصيدك
تور الله فى برسيمه
ترش الملح ما ينزلش
تكلوه يروح تفرقوه يفوح
تبقى فى بؤك وتقسم لغيرك
تبصلى بعين أبصلك بأتنين
ترش الملح ما ينزلش
تراعينى بعين أراعيك باتنين


ث

ج
جبر الخواطر على الله

جوز الأتنين لقادر لفاجر
جنازته ولا جوازته
جوز الأتنين سلطان وجوز التلاتة بهلوان
جنازة بدف وطار ولا قعدة الراجل فى الدار
جه يكحلها عماها
جت الحزينة تفرح مالقتلهاش مطرح


ح
حر النسا بعد الرجال عنهم

حالق راسه وعدمان ناسه
حمارتك العارجة تغنيك عن سؤال اللئـيم
حب ودارى وأكره ووارى
حبيبك يبلعلك الزلط وعدوك يتمنالك الغلط
حب العواجيز طعمه لذيد
(زهووووورة)


خ
خطبوها اتعززت فاتوها اتندمت
خيرا تعمل شرا تلقى
خد من التل يختل
خدوهم فقرا يُغيكم الله
خدوا فالكم من عيالكم


د
ديل الكلب عمره ما ينعدل

دارى على شمعتك تقيد

ذ
ر
ريحة ابو على ولا عدمه

(مثل ليبى)

ز
زى السمك بياكل بعضه
زى دود المش منه فيه
زى القرع يمد لبرهـ

س
سكينة الأهل تلمة تجرح ولا تدبحش


ششهر وشُهير ويكبر الصغير

ص
صام صام وفطر على بصلة

صباح الخير ياجارى انت فى حالك وأنا فى حالى
صام صام وفطر على بصلة

صاحبك من بختك
-مدونة الفرسان-

ض
ضل راجل ولا ضل حيط

ضربنى وبكى وسبقنى واشتكى
ضرب الحبيب زى أكل الزبيب
(كذب)

ططماعنجى بناله بيت فلسنجى سكنلو فيه
طوبة على طوبة خلى العاركة منصوبة
طباخ السم دواقه

ظ

ع
عين الحسود فيها عود
عسل واتغســـــل

عينى عليك باردة

عينى فيه واقول أخييييه
عدوك ابن كارك
عدوك عدو دينك
عصفور فى اليد خيرمن عشرة على الشجرة

علمنى الصيد ولا تعطينى سمكة
(مثل صينى-مدونة الفرسان)
غ



ف
فقر وعنطظة

فيها لأخفيها

فرحة ما تمت خدها الغراب وطار
فلان يوديك البحر ويرجعك عطشان
فى الوش مراية وفى القفا سلاية


ق
قعدة الخزانة ولا جوازة الندامة
قالوا ايه اللى علمك البكا قلت كتر الواح
قال ياخبر النهاردة بفلوس بكرا يبقى ببلاش
قدم السبت تلاقى الحد أدامك
قالوا لفرعون أيه فرعنك قال ملقيتش اللى يردنى
قالوا ايه اللى رماك على المر قلت اللى أمر منه
قالوا تعالى يا ابويا شرفنى قال لما يموت اللى يعرفنى
قالوا للحرامى احلف قال جالك الفرج
قالوا ايه اللى أحلى من العسل قلت الخل لو كان ببلاش
قلبى على ولدى أنفطر وقلب ولدى عليا حجر

قيراط حظ ولا فدان شطارة
ك
كله مكفوف على الرفوف للعيل الملفوف

كتر الأسية تقطع عروق المحبة

ل
لولا سلامك لكلت لحمك قبل عضامك
لبس البوصة تبقى عروسة

لولاك يا لسانى ما اتصحكيت يا قفايا

لسانك حصانك ان صنته صانك وانت هنته هانك

مما محبة الأ بعد عداوةمن كتر خطابها بارت
مال الكنزى للنزهى
مية نورى ولا دمنهورى
(عفواً ياعنى)
من دخل دارك جاب الحق عليك
مسيرك يا مرات الأبن تبقى حما
ما يفضل على المرواد الأ شر البقر
مالنا رايح وعرضنا فايح
موت وخراب ديار
ميه مالحة ووشوش كالحة
مات الكلب عزوا السيد مات السيد حيعزوا مين؟
مية نيلى ووشوش خنازيرى

من جاور السعيد يسعد
من فات قديمه تـــاهــ
من برا هلا هلا من جوه يعلم الله

من باعك بيعه و ارتاح من قهره
(وان كنت عطشان اوعي تعدي على نهره (زهــــراء


ن

نقول تــور يقولوا أحلبوهـ


(نص العمى ولا العمى كله
(زهــــــــــراء

هـ
هبلة ومسكوها طبلة

هنونونى وبنونونيى واعرف طريق اللى ولدونى

و
وجع البطن ولا دلق الطبيخ


ىياريتنى بيضا وليا ضبّ اصل البياض عند الرجال ينحب
يامخلفة البنات يامخلفة الهم للممات
ياوارث مين يورثك ياباكى مين يبكى عليك
ياناس ياشر كفاية قر
يغلبك بالمال اغلبيه بالعياليعملوها الصغار ويقعوا فيها الكبار
يادارى ياساترة عارى يامنيمانى للضحى العالى
يابخت من جابت بناتها قبل ولادها

ياواخد القرد على ماله يروح المال ويفضل القرد على حاله
ياجارية أطبخى ياسيدى كلف

يابخت من زار وخفف

يابخت من بكانى وبكى عليا مش اللى ضحكنى وضحك الناس عليا
يارايح كتر من الفضايح

(يا مستني السمنه من ورك النمله عمرك ما هتقلي(زهــــراء


ونقفل على كدا دلوقتى

ولنا لقاءات اخرى بأذن الله

إن كان فى العمر بقية
والشىء بالشىء يذكر
الشهور القبطية والأمثال الشعبية

16 comments:

زهــــراء said...

دكتورتي الغاليه

كل عام وانتي بخير بمناسبة العام الجديد
بالنسبه لموضوع الأمثال انا باعشقها ومن فتره اهدني أحد أصدقائي كتاب عن الأمثال الشعبيه لكنه تاه مني بس وعد اني لازم الاقيه واحتفظ به عشان أهديه لكي اول مره الوجوه تتقابل أن شاءالله
تعالى بقى لموضوع الأمثال
اللي ما يحطنيش كحله في عينه ما استعناهوش مداس فى رجلي
أن كنتوا نسيتوا اللي جرى هاتوا الدفاتر تتقرا
يا مستني السمنه من ورك النمله عمرك ما هتقلي
من باعك بيعه و ارتاح من قهره وان كنت عطشان اوعي تعدي على نهره
كفايه كده دلوقتي وكل لما افتكر حاجه هيرجع تاني
😊

Mohamed Ashri said...

انتى عاوزة زينات صدقى والممثله بتاعة زمان فردوس محمد .. هم كانوا بيحفظوا الامثال .. بس شطورة بجد .. ههههه .

norahaty mo said...

زهووورة
تسلمى وتعيشى يارب
ويجمعنا الخالق فى ظل
عرشه يوم لا ظل الأ ظله
اما الأمثال فأنا متشكرة
للحبة دول حاضيفهم حالاً

norahaty mo said...

Mohamed Ashri
وهو دول فيه حد زيهم
ولا جه حد زيهم ابداً
فعلا اتنين متكرروش
تسلم للزيارة
فنانا

P A S H A said...

http://www.egypty.com/egyptana/egyptian_miscellany/common_saying_egypt.asp

:)
مؤقتاً

مدونة الفرسان said...

الأمثال الشعبية هى عصارة فكر الأجداد وهى الغلكلور الجميل الذى دائما نسعد به
ومنها
إن جار عليك جارك غير باب دارك
الكلام الرين بيسد الدين
صاحبك من بختك
تحياتى وتقديرى

رحاب صالح said...

صباح البنفسج يا دكتورة
انا عندي كتاب عن الامثال اصلا بس فيه امثال ولا عمري سمعتها بجوار امثال اعرفها جيدا
بس الي قالتهم زعراء اول مرة اسمعهم بصراحة
ماش اء الله عليك افكارك جميلة
يارب تكون سنة سعيدة عليك وعلي كل الي تحبيهم ويحبوك

Emtiaz Zourob said...

حلوة كثير الفكرة بس معقولة ولا واحد من الكتاب عبر العصور الماضية فكر إنه يجمع الأمثال الشعبية المصرية في كتاب ؟
احنا في فلسطين عنّا كتاب خاص بالأمثلة الشعبية الفلسطينية بس اعتقد أنه تم تأريخها من أجل الحفاظ على التراث الفلسطيني بالإضافة إلى ضمان عدم سرقته
يعني ممكن تقولي نوع من المقاومة ضد الاحتلال الإسرائيلي

..

عامًة استمري ، الفكرة كثير حلوة

وكل سنة وأنت طيبة يارب

norahaty mo said...

P A S H A
وانا اللى كنت فاكرة
انى اقسم الأمثال بالحروف
الأبجدية (اختراع)حصرى بصرى ليا:)
يالا ما علينا :) ربنا يخليك
ومتشكرين للهدية

norahaty mo said...

مدونة الفرسان
فعلا الأمثال هى خلاصة
تجارب الشعوب وحكمتها
وشكرا على الهدية
حأسجلها حالا فى المدونة

norahaty mo said...

رحاب صالح
يارب سعيدة علينا
وعليكم بأذن الله وأن
كان على الأمثال فهى
زى ما قلت بحرملوش أخر
مهما أتهيأ لنا اننا نعرف
فى الأمثال نلاقى امثال
تانية غريبة علينا

norahaty mo said...

Emtiaz Zourob
لأ طبعا!!هناك كتب
كتير مسجلة أمثالنا
المصرية زى ما قال
(شريف باشا)و(رحاب صالح)
هى فكرة زى ما قلت
حبيت انى اسجلها
فى المدونة
لنفسى
وللــزمن
وللأصدقــاء

norahaty mo said...

الله يجازيك يا بلوجر
على
I'm not a robot
دى أحنا ناقصينك☺☺

موجة said...

موضوع الأمثال ده ثري أوي وومتع ومحتاج أقرأه تاني وتالت علشان أسترجعى هذه العبارات المتوارثة اللي ببقى نفسي أعرف قصة كل مثل فيها إيه ..

وبما إنك قفلتي التعليقات في بوست "ديل السنة" أقولك هنا وإنتي طيبة وبصحة وسعادة وإحتفلي وأفرحي زي ما المفروض كلنا نفرح ونحتفل طالما لا نغضب الله :)

norahaty mo said...

موجة
الأمثال !أهـ منها
بحر غويووووويط
زى ما بيقولوا :)
كل عام وانت بخير
وحمدلله على وصول كرمة

norahaty mo said...

لا آله الأ الله
محمداً رســـول الله

Post a Comment

قول ولا تجرحـش