Friday, April 23, 2010

!!صـــــــورة فـــــكــرتنى بليــــــلة...


ايوة فكرتنى بليلة فى أحضان الطبيعة !
رصيف المينا! بس ياخسارة ما استمتعتش بيها
لان الجو كان تلج وانا مكانش معايا غطا
اقولكم احكى الحكاية من الاول
اقولكم انا سافرت برى اشتغل فى السعودية
ورجعت برى برضه حتقولولى ليه البخل دا
حاقولكم بخل ممكن كسل كمان !مش عارفة بس انا من النوع اللى
لو جرب حاجة خلاص افضل عليها ولو حتى مش مريحة
روتينية بالدرجة الأولى (عارفة نفسى)وبالتالى
طريقة الاتوبيس واولها ايه واخرها ايه عرفتها وما حبتش اغير
المهم لما سافرت كنت معيا تقريبا كل حاجة الىّ هتا
وكانت الشنطة الحقيقة ولا مغارة على باابا فيها كل حاجة
وبالتالى كانت بردون (مصيبة) تقيلة
لكن
والله ربنا سبحانه وتعالى
رزقنى
طوال الرحلة مين شالها لى
وبالتالى لما وانا راجعة اشاروا على اولى النصيحة المخلصين
انى اشحن العفش اللى هى الشنطة اللى انا جاية بيها
وشوية حاجات خايبة ياريتنى ما ضيعت فلوسى عليها
لكن الانسان ما بيتعلمش ببلاش لازم يجرب
الاول وساعات حتى ما بيتعلم! من تجربته
المهم فعلا شحنت الشنطة وركبنا الاتوبيسات
اللى وصلتنا الاردن عدينا الاردن ودفعنا
أجرة المرور عبر الاردن
والله العظيم عبارة عن سلم خشب
بيؤدى الى حجرة خشبية(كشك ياعنى!) قاعد فيها
ظبوطة(ايوة ظابط صغنن يعنى) اخر شهامة
ختم الباسبور ودفعنا الرسوم زى الشاطريين
ونزلنا من السلم بس من ناحية تانية
ودا بقى المرورعبر الأردن !!
المهم ركبنا العبارة الحمد لله ووصلنا نويبع بسلامة الله
نبص على الشنط مفيش شنط !!
ازاى ياعم بس دول قالولنا انهم حيوصلوا قبلنا
المهم الحقيقة انا بقيت قاعدة و الاخبار تيجيلى: دى العربية
اللى شايلة الشنط مش عارفة راحت فين !دىباظت!
دى مش عارفة ايه اتعطلت !
دا الشنط باذن الله جاية على العبارة التانية الساعة 4الضهر
المهم زى ما انتم عارفين انا اعز الساندوتشات
والحمد لله كنت عاملة حسابى اتغديت
وقعدت استنى وطبعا مدام انت منتظر
شىء الوقت بيقى مش عايز يفوت
بالطول بالعرض الساعة بقت 4
والعبارة جت بس الشنط لأ؟؟!!
يالهوىىىىىىىىىىى
طب وبعدين العمل ايه؟؟ .
قالوا تنتظروا العبارة بتاعة بكرة
وهم (مش عارفة مين)كلموا الشركة فى السعودية
وقالوالهم على المشكلة دى ووعدوهم يحلوها بسرعة
المهم عرفت انى كده كده مقضية الليلة على رصيف المينا
ياربى دا الدنيا تلج(اول ديسمبر)ومش عاملة حسابى
وكمان قالوا ان الفندق الموجود يبعد حوالة 20 كيلو
ولازم تاخدى تصريح بالخروج من المينا او ممكن تروحى
بلدك وابقى ارجعى بقى خديهم براحتك:ياسلام ياأخوياااااااا!!!
طبعا ما كانش فيه حل الا البيات على الرصيف
ربكم والحق انا مكنتش خايفة !!
سبحان الله
لكن كنت بردانة وتعبانة كمان
بصيت كده لقيت شلة رجالة مصريين
قاعدين مع بعضهم وشكلهم زى حالاتى
هم كمان مستنينين عفشهم
وكل واحد والتانى متكلفت بالبطانية بتاعته
ولا على باله حاجة
وانا حتجمد من البرد
الصراحة انا بصيت كويس
مش لهم يااخى انت وهو
لكن (لبطاطينهم)!!وشفت
اجدد بطانية وانضفهم
ورحت لصاحبها هما كلمتين
اللى قلتهم و لقيت الراجل الحقيقة ادانى البطانية بتاعته
شفتلى دكة خشب فاضية وقريبة من التجمع
بتاع الناس دى وكمان عمود النور قريب منها
حطيت شنطة ايدى بينى وبين الحيطة
وتلحفت البطانية وسندت راسى على ضهر الدكة
ورحت فى سابع نومة ما تسألونيش ازاى؟!
صحيت حوالى خمسة ونص صباحاً طبقت البطانية
ورحت وديتها لصاحب صاحبها لأن صاحبها كان نايم لسه.
سألت على البوفيه فين ورحت جبت الراجل معايا
عد لى الاشخاص الموجودين طلعوا
بالتمام والكمال
23واحد

جبت بعددهم براد شاى كبير

وفطار كمان
والحمد لله الساعة عشرة لقينا العبارة جاية
ومعاها شنطنا كلنا وبرضة
ربنا سبحانه وتعالى
رزقنى باللى شال الشنطة الى الجمرك
الاول وبعدين للأتوبيس اللى جابنا
للمحطة الدولية اللى فى العباسية
واهى ذكريات لا تُنسى بحمد ربنا عليها ليل ونهار
وعلى ستره ولطفه بى وبعباده كلهم
ومنين ماتجى كلمة نويبع
او 23 أوعبّارة او ميناء أو بطانية
او شهامة او رجولة
او براد شاى افتكر الليلة دى
والحمد والشكر
لله رب العالمين.

000000000
الصورة الاولى ماخودة من مدونة الاستاذ
تركى الغامدى
وكانت محطوطة فى تدوينة بعنوان

على رصيف الحياة

Cold Winter Hot Chocolate Smiley Smilie  Emoticon Animated Animation Gif Pictures, Images and Photos

56 comments:

Unknown said...

الحمد لله رب العالمين
والصلاة والسلام على خاتم
النبين وإمام المرسلين سيدنا
محمد وآله وصحبه ومن أهتدى بهداه الى يوم الدين وسلم تسليماً كثيراً

عين فى الجنة said...

تعيشى وتاخدى غيرها
ظريفة جدا طريقة الحكى واضح انك انسانة جميلة جدا
اكرمك الله

TIMMY !! said...

ياااااااااه يا دكتورة نور !!

ربنا يكون في عونك ,

ده الواحد و هو راجل بيبقى ناعي هم السفر ده قوي , حتى لو داخل مصر ,

فما بالك لو كان خارجها ,

ربنا يكون في عونك ,

و الحمد لله إنها جت على خير ,

Unknown said...

باشمهندس راجى
دا ذوق حـــضرتك
ومن بعض ما عندكم

Unknown said...

TIMMY !!
ياأهلاً ياتيمى
السفر قالوا عليه
قطعة من العذاب:أنا
لأ قطعتين ونص يمكن !لكن بقى
الحمد لله وبفضله كنا قدها وقدود

TIMMY !! said...

آه صحيح يا دكتورة , نسيت أسأل ,
طب الصورة و فكرتك بالموضوع ,
طيب الصورة نفسها مين اللي فكرك بيها ؟؟ و لا هي منين بالظبط ؟؟

شوية فضول معلش :)

تــركــي الــغــامــدي said...

الحياة في الأشياء التي نقدمها للآخرين وليس فيما نحصل عليه منهم ... أو هذا مااستشففته من بين تدويناتك .. بوركت أختي الفاضلة

Unknown said...

TIMMY !!
الصورة نفسها ما نسيتهاش
والله ياتيمى من ساعة
ما شفتها عند
الأستاذ تركى
شهر يناير
اللى فات
لأنها فعلاً كأنى شفت
فى الواقع سواء فى المينا
ليلتها أو فى حتت كتير تانية
وتسأل براحتك ياتيمى :انت صاحب مكان.

Unknown said...

تركي الغامدي
والله استاذ تركى
ما أكذبش عليك :الحياة
من دا على دا أخذ وعطا

richardCatheart said...

صباح النور يا نور

الحمد لله ربنا عوض عليكى دا لو حصل هنا كنت قولتى على الشنطه يا رحمن يا رحيم واستعوضتى ربنا فيها

بس الجميل التواصل اللى حصل بينك وبين الناس لفتره قصيره اه بس مؤثر فى حياتك لدرجه ما نستهوش

ودى اهميه التواصل فى ناس بتعيشى معاهم فتره وماتفتكريش حاجه مؤثره فى حياتك وفى ناس بيعدو فى الحياه بسرعه البرق بس تفضلى فاكره ودا يرجع لجمال واهميه التواصل دا فى الوقت دا للشخص دا
ههههههههه

تسلمى يانور وبعد كده خدى بالك
اكيد اختى بالك

تقبلى مرورى

أحــوال الهـوي said...

لي تجربه مشابهه و كنت نازل بري بعربيتي
و حدوته شبيهه بحكايتك و لو قلت لك من غربيتها انا حكيتها اكتر من ستين مرة

و اتعلمت منها ان و مهما كانت القسوة و الصعوبه فالمغامرة تصبح ذكري جميلة للساعات عصيبة

تحياتي

Unknown said...

richardCatheart
اخد بالى بس ازاى؟
انا عملت فيها ناصحة
وقلت اسفر الشنط الاول
جيت انا والشنط ماجتش:)
كنت حأعرف منين أن العربية بتاعتة العفش ناوياها ناويها
وفعلاً ساعات ناس بتشوفيهم للحظات ولا يمكن أبداًتنسيهم
الحمد لله رب العالمين
عدت على خير :)

Unknown said...

أحوال الهـوى
والهوى أحوال
أكيد يادكتور شفت
كتير من عينة التجربة
دى مادمت بتسافر كتير للشغل
بس الغرابة أنى كنت(احسد)الناس
اللى بيسافروا بسيارتهم وأقول يابختهم لا حيشيولوا عفش ولا يحطوا شنط اتاريهم غلابة زيى حلاتى:)المهم تعيش وتسلم وتاخد غيرها

الشاعر الفنان أحمد فتحى فؤاد said...

الله على الذكريات
هو ده السفر و هى دى الغربة
و هى دى مصر يا عبله .. أسف يا نور

و بعدين ما أنتى أهو مش بخيلة .. 23 كوباية شاى و فطار ... الحقيقة ماشفتش مصرى فى الغربة بيعمل ده غير إثنين .. إنتى .... و أنـــــــا

حمدالله على السلامة

بوست رائع

سمع هوص (Abo 3li) said...

حمدالله علي السلامة.... نورتي ارض الوطن...هههههههههههههههه
علشان تحرمي السفر البري....


تحياتي

هراء لا داعى له ..... said...

السفر دا حاجة جميلة و رائعة

و أحلى حاجة فيه مغامراته و بهدلته

لــــ زهــــــراء ــــولا said...

نورررررررررررا

تعيشى وتاخدى غيرها
الواحد مش بيتعلم بالساهل برضه
اعتقد انك اتعلمتى من التجربه دى حاجات كتير اوى اوى

شوفتى بقى شهامة المصريين ولاد البلد اللى على حق
هناك وجوه قد تلتقى بهم لحظه لتكتشفى اثرهم فى حياتك لباقى عمرك

هناك وجوه تحيا القلوب بذكرااااااااهم
مجرد الذكرى تلاقى نفسك فاكره حاجات جميله فى وسط المعاناه

اتمنى لكى السعاده على الدوااااام
وبلاش السفر بأى حاجه غير الطياره حتى لو رايحه من القاهره للاسكندريه بجد عن تجربه والله

زهــــراء

زبادي في الخلاط said...

جميلة هي الذكريات .. لأنها تشعرنا بالحياة وتجعلنا نأخذ معنا قطعة من مكان عبرنا عليه أو نغوص في مشاعر أحسسناها يوما ما .. الذكريات هي التي تحضر لنا من نحب وبعد كل هذة السنين ليقف امامنا .. لنحبه مرة أخري وحتي من نكرهه .. نعيده أمامنا مرة أخري لنكرهه من جديد .
الذكري تعيد لنا رائحة الأماكن وسنوات العمر التي مضت
شكرا لكي لمشاركتنا ذكري من ذكرياتك

محمد فتحي حسانين

عطش الصبار said...

بجد مغامره ايه الشجاعه
دى
ظريفه الحكايه وقريتها بكل تفصيله وشدتنى عالم جديد وغريب
انت فى النهايه فى منتهى الشجاعه
تحياتى

كلمات من نور said...

حسيت بالبرد يا نورهاتي وانا باقرا البوست بتاعك ....الحمدلله المهم الشنطة رجعت وداه المهم علشان الحكايات دي ياما ناس وقعت فيها وحاجاتهم مرجعتش ....الحمدلله يا ستي الناس لسه بخير

well said...

متهيئلى وبعد القراءة بدقة ان انتى نسيتى تكتبى حاجة وهى ان انتى قولتى (توكلت على الله )
تحياتى

Unknown said...

الشاعر الفنان
احمد فتحى فؤاد
الغربة والسفر فعلاً
تجربتين مخصوصتين زى ما قلت
وبيعطوا كل واحد فينا ذكريات
ممكن بتبقى مرة وقتها لكن مع الايام بتروح المرارة وبتفضل حلاوتها بس:)

Unknown said...

سمع هوص (Abo 3li)
الله يسلمك ياابو على
الوطن منور باللى فيه:)
وبعدين أحرم سفر برى
ازاى بس يعنى؟!مقدرش:)

Unknown said...

هراء لا داعى له
بالضبط احلى حاجة فيه
مغامراته وبهدلته بس بعد
مرورها بفترة :)

Unknown said...

لولا وزهـراء
الطيارة!كل سفر!
انتى داخلة على كبير أوى
تكونيش فاكرانى من نجمات السينماوالمسرح والتليفزيون
ربنا يعزك يارب ويفرح قلبك زى ما فرحتينى وبتفرحينى بكلامك الحلو دا

محمد بدر said...

مدونة تستحق المتابعة
لكم يشرفني ان نكون اصدقاء
ادعوك لزيارة مدونتي
لقراءة موضوع:

انحطاط اللغة العربية وفساد الذوق موضوع في غاية الأهمية يتطرق الي انحطاط اللغة في الاغاني كما حصل مؤخرا في البوم ابو الليف http://badr4all.blogspot.com/

Unknown said...

زبادى فى الخلاط
فعلاً الذكريات جميلة بحلوها وحتى مرها أصلها تجارب حياتك ازاى ما تحبها .نورتنا أستاذ محمد فى اول زيارة لك عندنا نرجو ان تكون مستديمة ودائمة ومتكرررررة:)

Unknown said...

عطش الصبـار
الحمد لله تجربة وعدت
على خير وربنا يحفظنا جميعاً
وطول ما بتقولى يارب بأخلاص ما حيتخلى عنكِ ابداً

Unknown said...

كلمات من نور
الف حمد وشكر لله رب
العالمين كان أول ديسمبر
والدنيا هووووووووووووووا
انتِ عارفة بقى:)المينا والبراح الحمد لله .

Unknown said...

well
الحمد لله متوكلين
وأن كنت نسيت أكتبها
وأنا أقولها فى كل وقت وحين
وشكراً ياويل للتذكرة

Unknown said...

محمد بـدر
شكراً لكلامتك
وحاضر ازور مدونتك
بعد الرجوع من العمل
بأذن الله تعالى.لكن لىّ رأى
أن ابو الليف حياخد وقته ويروح لحاله أما لغتنا العربية السليمة والجميلة حتفضل وستبقى ما بقى القرآن فينا !دا يمكن كمان لى رأى أن كثرة الكتابة عن أمثال ابووووو واخوانه دعاية مجانية له!

Anonymous said...

السلام عليكم
ازيك يادكتوره
معلش انا اسف على الغيبه الطويله دي
مشاغل معلش

اجى الاقيكي عزلتى كمان
طبعا هاتبقى مبروك متاخره شويتين
معلش
المهم يارب يكون المكان الجديد مستريحه فيه

عندك حق محدش يبتعلم بالساهل

بس بصراحه موقف صعب جدا
الحمد لله انه عدى على خير
وطبعا لسه فيه ناس فيها الخير
وده واضح فى كلامك سواء منك وانتى عازمه الناس على الفطار
او من اللى كان بيشيل لك الشنط و اللى اداكى البطانيه

المهم انه عدي على خير
والحمد لله

ربنا يكرمك دايما ويسعدك

خواطر شابة said...

عزيزتي فوائد السفر سبع من بينها اكتساب المعيشة ان ضاق بنا العيش في بلدنا ومن بينها ايضا مصاحبة الامجاد وهذا ما تحقق في سفرك هذا حيث يسر الله لك من ساعدك وكان لك عونا على مشقة السفر
يقول الامام الشافعي:
سافر تجد عوضا عمن تفارقه
وانصب فان لذيذ العيش في النصب
اني رأيت وقوف الماء يفسده
ان ساح طاب وان لم يسح لم يطب
دمت بكل الود عزيزتي

حصان المرجيحة said...

بس بالله عليكي مش استمتعتي
ههههههههههه
و حسيتي انك غيرتي جو
اهلا بيكي في بلدك
ده انا بروح الشغل و هو جنب بيتي بتعب
هههههههههههه
ربنا يقويكي

Dr-Ibrahim said...

هناك الكثير من الأأشياء التى تذكرنا بذكريات قد تكون جميلة وقد تكون سيئة ولكن أفضل ما فيها أنها جزء من الذاكرة :)
وأجمل مافيها أننا والحمد لله مازال دلينا عقل وذاكرة تتذكر..
تحياتى

حمـــــــــــــــــــــة said...

السلام عليكم ورحمة الله وبركاته
تسلسل الأحداث جعلني أعيش حلقات السفر مباشرة يعني و تذكرني بعدة نوادر حصلت لي خلال سفري
طبعا ليس كلها حلوا
لدرجة غيرت رأيي من "السفر متعة" الى " السفر نقمة خاصة لبعض الدول العربية" ....و بالفعل ما ذكرتي كله حلوا ما عدى التعب

Haytham Alsayes said...

المهم حمد الله علي سلامتك يادكتورة

تحياتي

قلم رصاص said...

الحمدلله جت سليمه يادكتوره

والحياه تجارب

ونحن فئرانها .. قصدي ناسها
هههههههههههههه

تقبلي مروري وتحيتي

مجداوية said...

السلام عليكم

ليه عزلتي ؟

ليه الخط صغير ؟

أنا مش شايفة أقرأ

والله لابسة النضارة بس بجد مش شايفة
ليه بقى عزلتي ؟؟

Unknown said...

م/محمود فوزى
وعليكم السلام ورحمة
الله تـــعالى وبركاته
ياباشمهندس حضرتك تنور
فى أى وقت وربك يكون بعونك
وعوننا .أما ولاد الحلال فهم كتير ومهما الواحد ساعات بيضايق من أهل بلدنا لكن صراحة وبكل صدق الطيبين أكتر من الوحشين الحق يقال .

Unknown said...

خواطر شابة
مرورك جميل ومفيد
ياخواطر وربنا ييسر لنا
كل امر عسير.اللهم آمين يارب العالمين.

Unknown said...

حصان المرجيحة
الحمد لله رب العالمين
هو أنااستمتعت وأتفسحت
:(وغيرت جو كمان لسنتين
الحمد لله المهم المحصلة النهائية
كانت مفيدة ولله الحمد

Unknown said...

Dr-Ibrahim
ايوة صح اللى هو اسمه
فى الطب النفسى :استدعاء الذاكرة بواسطة صورة او صوت أو حتى رائحة!المهم الاحداث كلها بتمر ولا تبقى الأ الذكرى

Unknown said...

hamma
معلش ماهى الحياة
كده لازم التعب فيها
وبعدين تيجى الراحة او
حتى نعرف قيمة الراحة اللى ساعات
ما بنقاش حاسين بيها
ونورتنا هما فى أول زيارة.

Unknown said...

Haytham Alsayes
الله يسلمك يارب ويسلم
الناس كلهاويرد كل غايب بالسلامة

Unknown said...

قلــم دهب بركر
شيفرزأبنوس كمان
حمدلله على سلامتك أنت
فينك من زمان يارب
تكون بخير والحياة تجارب زى مابتقول صح والحمد لله تجربة مفيدة.

ahmed_k said...

أختي الدكتوره نور
السلام عليكم ورحمة الله وبركاته
في البدايه أود ان اعتذر عن تقصيري الواضح معاكي وطبعا ليس لي أي عذر
ولكن قد يكون اول أعذاري أني لم أجد لكي في الريدر أي جديد فلما أحببت أطمئن علمت بأمر المدونه الجديده
فالف مبروك
ثانيا يا دكتوره علشان خاطري كبري الخط شويه علشان عيني طلعت لبره من القرايه والتدقيق لأحسن سطر يقع مني في النص
ثالثا الحياه ماهي إلا محطة ولحظات إنتظار يمر امامنا فيها الخير والشر وقد يصطدم أحدهما بنا ولكنا في البدايه والنهايه لا نملك من أمرنا إلا محاولات دفع الضر عن انفسنا
وحمدالله على سلامة الشنطه يا دكتوره
وجميل موقفك مع أبناء بلدك المنتظرين فرج ربنا مثلك على رصيف الميناء
ولكن لي تساؤل
هل الرجل اللي أخدتي منه البطانيه كان معاه واحده تانيه ولا نشف المسكين من البررررررررررد؟؟؟ هههه
تقبلي خالص تحياتي

Unknown said...

مجداوية
وعليكم السلام ورحمة
الله تعالى وبركاته
اضطررت لهذا ياماجداوية:(
المدونة الأولى مش عارفة
جرى لها ايه انزل تدوينات جديدة لكن ما بتظهرش على الريدر بتاع الاصدقاءباختصار أتجمدت فأضطريت اعمل الجديدة دى.اما الخط فمكن انتِ تكبيريه من عندك فى الصفحة لو بتستعملى الفيرفوكس
يبقى من و viewولو بتستعملى اكسبلولر يبقى من text size)

ahmed_k said...

نيجي بقا للصوره يا دكتوره
تلك الصوره يا دكتوره ألتقطت في مدينة الغردقه
وهذا المكان لا يبعد عن بيتي الذي أكتب منه الآن أكثر من 10 دقائق سيرا على الأقدام
وهو امام مستشفى الغردقه العام والمبنى الذي يظهر في الخلف هو مبنى تابع للتربيه والتعليم وبه مركز سوزان مبارك للتطوير
وهؤلاء الناس كانوا اهالي الضحايا في عبارة السلام وهم في إنتظار إستلام جثث زويهم الذين تأكد موتهم وتم إنتشالهم ومازالوا في المشرحه التي تقع ضمن المستشفى العام
فتلك ليست صورة مسافرين او منتظرين على رصيف ميناء
بل حالهم كان لا يسر عدو ولا حبيب
ربنا يرحمنا جميعا برحمته
وبعد عدة أيام من حادث العباره تم عمل صيوان كبير في هذا الموقع الذي ألتقطت فيه الصوره وتم تجميع أسر الضحايا كلهم فيه لتأكد عدم وجود ناجين من العباره وحتى يكون التجمهر كلله في مكان واحد وليس أمام المستشفى وأمام الميناء
ربما لإحكام السيطرة الأمنيه عليهم
ولكن في تلك الأيام الغردقه كانت تعيش في أيام صعبه
فمن فقدهم هؤلاء هم أهلنا جميعا وضحايانا جميعا
رحم الله شهداء العباره السلام

Unknown said...

ahmed_k
وعليكم السلام ورحمة
الله تـعالى وبركـاته
ومفيش اعتذار ولا تأخير
مدام حضرتك وصلت بالسلامة
يبقى خلاص كل شىء بقى تمام
والخط كبره انت من عندك زى ما
قلت لمجداوية سواء بتسعمل الفيرفوكس أو بتستعمل الأكسبلولر وثالثا الراجل متخافش عليه اشترك مع صاحبه
اللى انا لقيته صاحى وأديته البطانية(متخافش عليه :).

Unknown said...

ahmed_k
(ربنا يرحمنا جميعاً برحمته)
انت جبت الفايدة وجزاك الله خيراً على التوضيح والأفادة ولو أن الصورة بيبقى فى المعنى والدلالة بتاعتها فهم أيضا منتظرين لأعزاء لن يعودوا:(
ابداًولكنهم شهداء عند الله وذنبهم فى رقبةالمتسبب فى الحادث الى يوم الدين.استاذ احمد الحزن ماكانش فى الغردقة بس الحزن كان ومازال فى مصر كلها عليهم رحمة الله عليهم جميعاً ومنين ما تيجى السيرة يتجدد الالم وتتجدد الاحزان.

Unknown said...

اللهم لا تدع لنا ذنباً الأ غفرته ولا هماً الا فرجته ولاديناً الا قضيته ولا مريضاً الا شفيته ولا مبتلى الا عافيته ولا مسافراً الأ سالماًغانماًردتته ولا غائباًالأ أظهرته ولا مظلوماً الأ نصرته ولا ظالماً الأ قصمتهولا عدواً الا هزمته ولا حاجة من حوائج الدنيا والاخرة لنا فيها صلاح ولك فيها رضا الأ سويتها وقضيتها يارب العالمين.
والحمد والشكر لله رب العالمين

MaNoO said...

اولا مش تقولى انك عزلتى يادكتور انا مدخلتش من زمان ولسه عارف دلوقتى بس خلينا فى الرصيف تجربه حلوه جدا جدا ومستغربك ازاى مكنتيش خايفه لا وكمان رحتى فى النوم هي دى الست المصريه يابنتى ايه الكلام الكبير دا يارب تكونى بخير وربنا يحفظك دايما

Unknown said...

MaNoO
مانووووو!!
عاااااااااش مين شافك يامانوو
اقول ايه بس؟!بلوجر مخلاش فيها قوالة أضطريت تقدر تقول أخلاء بالقوة الجبرية
يعنى بالغصب عنى لكن اضطريت المهم أنت
علم على العنوان الجديد وشرفنا دايما وكمان نورنا بالتعليقوربنا ينجح مقاصدك يامانوووو يااااااارب

يا مراكبي said...

:-)

معلش

وأهي تجربة برضه وعدت وأكيد استفدتي منها كويس .. على الأقل بقيتي أقوي في مواجهة مشاكل بتكون أكيد وطئتها أقل من الموقف ده بكتير

حمد الله عالسلامة ولو انها متأخرة كام سنة

:-)

Unknown said...

يـامراكبى
صح ياباشمهندس
التجربة والتعلم
عن طريقهاأحسن وسيلة
للتعلم حتى لو يتعلم فى وقتها
الا انها فعلا بتعلم تمااااام وأسألنى أنا:)

Post a Comment

قول ولا تجرحـش