Friday, July 30, 2010

أناَ لستُ بباحثةٍ ولا بواعظةٍ:تدوينة قديمة

30 comments

معلش هم كلمتين واقفين فى زورى من زمان
ونفسى أقولهم وأخلص ضميرى أمام
ربنــــــــــــــــــــا
والنــــــــــــاس
فقط أردت النصح فى الله
الله:تكتب الله
الله تكتب الله

وليس اللة
(حاشا لله )
ماشاءالله تكتب ما شاءالله
وليس:مشاء الله
ولا مشاء اللة
(حاشا لله)
إن شاء الله
تكتب إن شاء الله
وليس أنشاء الله
(حاشا لله)
ولا انشاء اللة
(حاشا لله)
عارفة اللى ممكن يتقال
حبكتيها
هى جت على دى
مش أوى كده
مش عارف أيه!!!
لأ معلش هى جت على كده وكده أوى كمان
وهو فيه أهم من كده:أشرف لفظ فى الوجود
لفظ الجلالة
ومحدش يقولى معلـــــــــــــــــش
غلطة كيبورد بقى !!
أزاى ؟ تيجى الغلطة دى؟
التاء المربوطة فى الصف الأول فى الكيبورد
فى حين الهاء فى الصف الاخير
وكمان تكرار الخطأ معناه
عدم العلم بأنه خطأ
لأما تعمد الخطأ
ما ينفعش أبقى بعتب على الساسة والسياسة
وبقول وأعيد وعامل فيها العالم العلامة والفاهم الفهامة
وأكتب غلط
:وأيه
لفظ الجلالة
الله
أشرف كلمة فى الوجود
بالله عليكم أنا كتبت
وأوصى كل من يقرأ
أن يبلغ من لم يقرأ
مش عيب نصلح لبعض
ومش عيب نقول الصح لبعض
أمال هى الصداقة فائدتها أيه؟
مرة تانية وأخيرة
لا أقصد أحد بعينه
ولكن أقصد النصح فى الله
وارجو الأ يغضب أحد
ما قصدت الأ النصيحة
والفائدة
.

****مواضيع ذات صلة***

تدوينة الازهرى :اللغة

...................................

دى تدوينة قديمة على مدونتى

(صعبان على حالنا نمر ون)

المتجمدة

حبيت احطها تانى النهاردة

لانى فعلاً بحبها جداً

وأرجو بها وجه الله

ولقراءة التعليقات فى المرة السابقة

(جميلة ومفيدة جداً جداً)

أتفضلوا

أما فى هذه المرة

سافتح التعليقات

ولكن أرجو المعذرة

لأنى قد لا أستطيع

الرد عليها ......أسفة جداً

الكومبيوتر السلف اللى أنا قاعدة

عليه دا حيجبلى المناخوليا بعيد عنكم

ومتهيأللى لو قعدت على لوح عجين

يمكن كان أسرع وأحسن

وأرحم لأعصابى

ربنا يرحمنا جميعاً

Tuesday, July 27, 2010

.........بـاك تو وووورك

30 comments

عنداً فى حكومتنا الإليكترونية
المـــنورة المـــــــوقرة
واللى ما ادتنــاش
يوم أجــــــــــازة
بدال 23يوليو
اللى راح
علينـا
أونطة
آلــ أيه؟
علشان جه
يوم جمــعة
ياسلاااااااااااااام
كانوا جابوه يوم السبت مثلاً
هى دى صعبة عليهم
مش هم الحكومة
المهم عنّدا فيها
(الحكومة يعنى )
أخذت اربع ايام إعتيادى
من يوم السبت اللى فات
لحد النهاردة
بـــــس
وأهـ من بس دى
ايه الفايدة اهم
فاتووووووا
لأ لأ لأ
مش فاتوااا
طااااااااروا
هواااااا
ومروااااااااا
مرور السحاب
وبكرة راااااااجعة الشغل
حــــــــــدفاً
كتير بأحس
وكأنى لم أتغير
فى الناحية دى بالذات
عن وقت ما كنت فى
المدرسة وكان برضه بيجيلى
الشعور دا وكانت ليلة الجمعة دى

او أخر ليلة فى الأجازة الصيفية
أو أجازة نص السنة
كانت
بتبقى ليلة
كحلى غاااااااامق
(كنت بهرى نفسى عياط )
ولمّا بحس بكده
دلوقتى
بفكر كتير
مخدش اجازة
وأوفر الزعل
على نفسى
لكن كل مرة بأنسى

Sunday, July 25, 2010

.الشيخ الدكتور عبد الودود مقبول حنيف....

0 comments

كان أول صوت استمعت اليه
فى محطة القرآن الكريم
بالسعودية حينما
عملت هناك
أعجبنى
صوته وقراءته
وكيف لا وهو يقرأ
القرآن الكريم
يمكن مش مشهور عندنا بمصر أوى
لكنى شخصياً استمع وأستمتع بتسجيلاته
كثيراً











نبذة بسيطة وبعض المعلومات عن حياته
الدكتور عبد الودود بن مقبول أحمد محمد حنيف

ولد بتاريخ 12-09-1382 هـ، و هو سعودي من أصل سوري
المؤهلات العلمية

• بكالوريوس في الكتاب و السنة من جامعة أم القرى بمكة المكرمة 1404هـ
• ماجستير في الكتاب و السنة من جامعة أم القرى بمكة المكرمة 1410ه‍
• دكتوراه في الكتاب والسنة من جامعة أم القرى بمكة المكرمة 1415ه‍
الإمامة و الخطابة:
• إمام سابق متعاون في الحرم المدني الشريف
• إمام مسجد الأميرة شهيدة بالعزيزية بمكة المكرمة
الوظيفة:
أستاذ مساعد قسم الكتاب و السنة، جامعة أم القرى بمكة المكرمة 1415هـ.

الإنتاج العلمى

رسالة الماجستير
الأسماء الحسنى و مناسبتها للآيات

التي ختمت بها من سورة النور الى اخر القران

رسالة الدكتوراه:-
• ظاهرة العنوسة في المجتمع السعودي وأسبابها وآثارها

المؤتمرات والندوات
1-نزول القرآن الكريم

والعناية به في عهد

النبي محمد عليه الصلاة و السلام

(بحث محكم)

- مجمع الملك فهد 3-7-1421ه‍.
• 2-ترجمة معاني القرآن الكريم

(بحث محكم)

- مجمع الملك فهد 16-10-1427ه‍.
المناصب الإدارية و عضوية المجالس و اللجان:
• رئيس قسم القراءات بجامعة أم القرى 1417 ــ 1421هـ .
• عضو الجمعية السعودية للقران الكريم و علومه
.
موقع فضيلة الشيخ على شبكة الأنترنت

Friday, July 23, 2010

ثورة 23يوليو من زاوية خاصة .....

0 comments

طبعا كلام كتير ممكن يتقال عنها
لكن حاحكى عن جزء خاص يخصنى من ذكريات
انى كنت بسمع عنها كل خير فى المدرسة
فى حصص التربية القومية والمواد الأجتماعية
وأنها عملت وسوت وكذا وكذا
وكنت بسمع عنها كل
(شر)
بالبيت
من الوالد والوالدة الله يرحمهم
حتسألوا ليه هم كانوا
من العيلة المالكة؟
لأ والله الحمد لله الف حمد وشكر
هم عندى
أحسن من ألف عيلة مالكة
الوالد فى الاصل كان صنايعى
أحكى حكايته بعدين لأن حياته
وعمله وصبره فعلا
حكاية أتشرف بحكايتها
المهم الوالد بجهده وشغله
بقى صاحب ومالك العمل دا ولأنه
كان بيكره البنوك وفوائد
البنوك وبيستحرمها بصراحة تامة
كان بيستثمرفلوسه او بيحوشها
فى شىء كان معتقد فى وقتها
انه أحسن إستثمار
اللى هو أيه؟
بناء البيوت وتأجيرها
وأخد الأجرة الشهرية كنوع
من الدخل الثابت المضمون
لكن الله يرحمه ما كان حاطط فى باله
اللى ملكت الساكن أى شقة
وورثت الشقة الأيجار الى رابع حفيد
وعملت الف قانون وقانون
لصالح المستأجر فقط
ونزلت فى ظرف سنة او سنتيتن
مش متأكدة بالضبط فى الخمسينيات
الايجارات الى 60% او 65%من القيمة الأوليه
وصارت العمارة اللى بناها الله يرحمه
من حر ماله بعد ما كانت
بتجيب 100جنية مثلاً
صارت تجيب 45جنية فقط
أه والله هو كده!وبعد
كده جت لجنة الإيجارات
للعمارات فى الستنيات
لتضيف ظلماً الى ظلم
وصار الساكن هو المالك
الحقيقى لأى شقة إيجار قديم
علشان كده
والدى الله يرحمه
ماكان يذكر الثورة
(بخير)
ابداً
ولما كنت اقاوحه
يقولى بكره تعرفى
كل حاجة
وكبرت وعرفت
ان ثورتنا
وللأسف ظلمت ناس كتير
ليسوا بالأقطاعيين ولا بالرأسمالين
ولا بالأجانب ولا بالمتوحشين
بل مصريين عاديين
جداً جداً جداً
أخر حاجة أو حاجتين أقولهم
ايجار الشقة فى بيتنا المصون
فى الجيزة 3حجرات وصالة
ومنافعهم زى ما بيقولوا
اتناشرجنية الأ ربع
ايووووة 12جنية الأ ربع بس
ومحدش يقولى وهو الوالد كلف العمارة كام كلها
ساعة لمّا بناها والأ اشمعنا
كل شىء أخر ثمنه بيزيد
وتانى حاجة اقولها
ان كل السكان عندنا
عندهم بيت واتنين وتلاتة
لكن مأجرنهم
قانون جديد
وحسبى الله ونعم الوكيل

Thursday, July 22, 2010

.......الجرد السنوى...طاطاطااااااا

0 comments


فى اواخر شهر يونية اللى فات
وزعوا علينا منشور بالعلم والتنبية بالتنفيذ
الحرفى للى موجود فيه
ايه بقى اللى موجود فيه
كتابة العلاج الشهرى
بواقع أسبوع واحد فقط
مهما كانت الكمية أو المدة
أو حالة المريض الصحية
ومهما قال ولا عاد ماتسمعوش الكلام
وأكتبوا العلاج لمدة أسبوع واحد فقط
طوال فترة الجرد السنوى للصيدليات
اللى هى حوالى اسبوعين علشان
الكميات الموجودة فى المخازن
يدوبك تكفى
لحـــين توريد
الأعتمادات الجديدة
من السنة المالية الجديدة
ليه طيب؟
ما احنا كنا متعوديين كل سنة فى
الأوقات دى نختم الروشتات وتتصرف من
الصيدليات الخارجية وبيرجعوا يحاسبوا الهيئة
لأ دا أسراف! دا تبذير!
دا أهدار للمال العام
تررررررا
ماااااااااااااااشى
واللى مش حينفذ
(((زنبه)))
على جنبه!!
وأسمه حيروح للبيه رئيس الفرع
رأساًاًاًاًاً
ياسلام
أهـ أصله فاضى بقى !!
المهم فعلا نفذنا القرار
من يوم 28يونيو
وطبعا مش حاقولوا الناس
كانت عاملة ايه وازاى
واللى جاى من فين
واللى رايح على فين
والمواعيد بتاعتهم اتلخبطت
وطبعا كتير منهم رايحين يصيفوا أو العمرة
المهم نحايل فى دا ونراضى فى دا
والايام ماشية لحد يوم 3يوليو
بعد ما اشتغلت بالنظام دا وخلصت
يمكن 30عيان أفاجىء
الــــ 30عيان راجعين
وعيونهم بتطق شرار!!
خير ايه ؟فيه ايه؟
الصيدلية بتقول
الدوا
متوافررررررر
ليه بتكتبى اسبوع بس!
وكل واحد يبص لك ولا محمود المليجى
فى زمانه الله يرحمه
وعنيه بتطق شرار
ولسان حاله بيقولك
ومن غير كلام
ليه ياستى الدكتورة تعملى فينا كدا؟
؟اناااااااااا؟؟اااااااااا؟
اتصلت بالصيدلية استفهم
ايه اللى جرى مش الاتفاق كان اسبوعين؟
جه أمر إدارى من الفرع
الساعة 7ونص صباحاً
بصرف الكميات العادية
والامر لله سبحانه وتعالى من قبل ومن بعد
الأوامر قالت ايه ياستى؟
نصرف الكميات العادية
ما هو الدوا موجود ؟!!
الله!!لما الدوا موجود
ليه بتخلونا نصرف أسبوع؟!
وذنبها ايه الناس اللى صرفت الأيام
اللى قبل كده؟وبالمرة ما كنتم
تصرفوا الروشتات اللى أتكتبت وخلاص
بنفس النظام
ومن بكرا نصرف عادى
او تبلغونا من صباحة ربنا
؟؟؟؟؟؟؟؟؟
؟؟؟؟؟
؟؟؟
؟
سعد باشا قال
مفيش فـــــــايدة
دى حاجة على الماشى
من نظام بلدنا العزيزة
اللذيذة
طبعاً الحكاية دا حصلت مع كل العيادات
ومع كل العيانين يعنى كل الناس بعد ما
خلصوا ووقفوا فى طوابير الصرف
رجعوا رجعوا الروشتات تانى
ووقفوا طوابير تانى
ومش مهم اى حاجة
المهم الأوامر
تتنفذ!
وحسبنا الله ونعم الوكيل

Saturday, July 17, 2010

إستئذان وبسررررررررعة

49 comments

لو ما جتش ليومين تلاتة اربعة
امممممممم ممكن أكتر شوية او اقل شوية
يبقى (كومبو العزيز)لعب
معايا الدنيئة و(ضرب) نسخة
الوندز علشان كده عايزة اقول
وبسرعة
1-أنا نجحت فى الدورة التدريبية
لووووووووى لوىىىىىىىىى لووىىى
2-خدت مكافحة !!مكافحة ايه بس؟!
قصدى خدت مكافأة استثنائية ترررررررم
3-مش كومبو بس اللى
(زرجن )
كمان الدش
مش الدوش
لألألألأ
الـــــدش
الستالايت يعنى
والغسالة التووووماتيكى
يالهوتىىىىىىىىىى
ودى بقى خلوها على جنب
والحمد لله
رب العالمين
ملااااااااحظة
انا بكتب من كومبيوتر بنت أختى
وهى جوجل كرررررررروم
مش بنت أختى
لألألأ
دا المتصفح بتاعها
جوجل كروم
اللى بيقولوا عليه
بردون حاجة صعبة
خااااااااااااااااااااااااااااااالص
او انا اللى مش متعودة عليه ممكن؟
حتى ادينى مش عارفة أو مش راضية
الصورة بتاعة الموضوع تتحط
الحمد لله أهى أتحطت
معلش مش حلوة اوى
:(لكن أحسن من مفيش
اشوفكم بخير
سلاااااااام

Friday, July 16, 2010

حسرة علينا يادكاترة

0 comments

عاجبنى أووووى
موقف نقابة المحامين
وموقف المحامين نفســـــهم
مع بعضهم البعض فى الموضوع دا
وبسأل واتحســر لو كان مثل اللى
حصل دا
سواء حصل او لم يحصل
فأنا لا أجـــــــــزم بهذا
لكن بسأل لو كان
الأستاذ
(إيهاب محمد إبراهيم ساعى الدين)
وزمـــيله
الأستاذ

(مصطفى أحمد فتوح)

لو كانوا دكاترة
وأستغاثوا بالسادة الزملاء

وخاصة عليّة القوم منهم المنشغلين بالعيادات
والمؤتمرات والبعثات والمقابلات الصحفية
والتلفزيونية او أستغاثوا بالنقابة نفسها
اللى بندفع اشتراكها من سنين وأيام
وياعالم حنعيش لمّا ناخد معاشنا منها ولا لأ؟
حد كان حيسأل فيه ياترى؟؟
حد كان حيعبرناّ؟
لا أعتقد ابداً
ربنا يكفينا
الشـــــــر
يارب
بأذن الله حبقى أحكى
عن مشكلة وقع فيها زميل لنا
الاسبوع اللى فات وبسببها بات
فى التخشيبة !!!ايوة فى التخشيبة
مع سلوووووومة الأقرررررررع
وعبده مفتاح وسعيد مطواة

Wednesday, July 14, 2010

..(2)..يوم التنفيــــض.......

0 comments

ورغم الأخذ والرد في صحة تخصيص يوم للتنفيض
فهو حقيقة وقضية يلمسها الأقربون والأبعدون‏
‏ ولم يزل يوم التنفيض في بيت الأمة
الذي كتب عنه الأديب رشاد كامل في
رصده الرائع لمشوار
سعد زغلول
وأم المصريين
ماثلا أمام عيني
عندما كانت صفية هانم
تدخل غرفة سعد وتقف أمامه لا تتحرك ولا تتكلم‏
‏ ويفهم سعد من هذه الحركة أنها تدعوه
إلي الجلاء عن البيت علي وجه السرعة‏‏
وكان سعد يسمي صفية في ذلك اليوم
بلقب مقلقة الراحات وهادمة اللذات‏
‏ فقد اعتاد كل يوم أن يقوم من فراشه بتثاقل
ويحمل معه الصحف إلي دورة المياه‏‏
ويمكث فيها ساعة كاملة
ثم يخرج إلي الحمام
ويحلق ذقنه بيده‏
‏ وحتي آخر أيامه
لم يكن يعرف
ماكينة الحلاقة‏‏
بل كان يستعمل
الموس الطويل
الذي يستعمله الحلاقون‏‏
ثم يرتدي ملابسه علي مهل

وينزل إلي مائدة الإفطار ويتناول إفطاره‏‏
الذي يستمر ساعة أو أكثر من ساعة‏..‏
أما في يوم التنفيض فلا يستمر
في الحمام إلا دقائق‏
‏ ولا يبقي علي مائدة الطعام إلا لدقائق‏!!..‏
وكان سعد زغلول يقول إن صفية
مريضة بمرض اسمه النظافة‏‏
وكانت صفية تضع
ممسحة من الحديد
في أدني درجات السلم الخارجي
وممسحة من سعف النخيل أعلاه‏‏
الأولي ليمسح فيها الزائر قدميه من الطين‏
‏ والثانية ليمسح فيها حذاءه من التراب‏‏
فإذا وجدت صفية آثار أقدام علي
الرخام الأبيض علي سلم السلاملك‏‏
نادت عبدالكريم فراش السلاملك
ليسارع إلي محو هذه الآثار
حتي تبدو درجات السلم الرخامية
ناصعة البياض تبرق وتلمع وتضيء‏
‏ فقد كانت تري آثار الأحذية علي الرخام
وكأنها وصمة عار في جبين البيت الأبيض النظيف‏..‏
!بيت سعد زغلول وبيت الأمة‏
‏وها هي صفية زغلول التي أفنت
شبابها في عشرة زوجية
وقفت فيها علي
رموش عينها
في خدمة زوج
يكبرها بثمانية عشر عاما
علي أكمل وجه
على أكمل وجه قد اضطرت
بعد ثمانية عشر شهرا من وفاته
إلي إصدار بيان علي الشعب
حول ما ورثته عن الزوج
ــ الذي أدمن القمار يوما وأعطته
زوجته مصاغها ليعوض خسارته فيه ــ
وما تركه لها والدها مصطفي فهمي باشا
رئيس الوزراء من إرث‏
‏ وذلك بعدما تناولت الصحف
ثروتها بالغمز واللمز‏‏
وقد جاء في
هذا البيان
التاريخى :7.781جنيه و‏33‏ مليما
قيمة
كل ما خصني
في تركة المغفور له زوجي‏‏
إلي جانب إيراداتي من عزبتي بمسجد وصيف
البالغ مساحتها‏210‏ أفدنة و‏21‏ قيراطا وثلث سهم
وهي التي خصتني في وقف المغفور له والدي‏
‏و‏..‏إذا ما كان صحيا وعلاجا نفسيا تخصيص
يوم لتنفيض البيت الصغير‏‏
أما آن الوقت لتنفيض البيت الكبير‏‏
بعدما تهرأت الحوائط‏
‏ وسقط الطلاء‏‏
وتصدع السقف‏‏
وبهتت الصور‏
‏ ونخر السوس الإطار‏‏
وتمزقت كسوة الصالون‏
‏ ووقعت ملة السرير‏
‏ وانشرخت البلتكانة‏
واسودت المرايا‏
‏ وانتهت مدة الصلاحية‏
‏ ولعب في الأساس‏
‏ وارتفع السخام والسناج
والهباب والـــــــــرزايا والردي
طبقات من فوق طبقات‏,‏ وصدأت الرؤوس‏
‏ وانسدت النفوس‏,‏ وشحت الفلوس‏‏
وانتحر البائس واليائس‏
وقتل الأب عياله إملاقا‏‏
ونجار خالي شغل شنق نفسه في المروحة الكهرباء
‏‏ ودقوا رأس الولد في الحيطة الرخام‏
‏ وجت الحزينة تفرح مالقيتلهاش مطرح‏‏
وتضاربت الشفافية‏‏
وغدت قبلتنا مذيع‏‏
ومنابرنا في العاشرة مساء‏‏
ووقع من قال كلمة حق في ملقف هوي‏
‏ وطفحت المنافذ والنواصي والميادين والسلالم
بالأنات‏..‏ باللعنات‏..‏ باللافتات المهدرة‏..‏
وقال كل امرؤ لصاحبه إلي متي؟‏
!..‏ إلي متي؟‏!..‏ إلي متي سنظل نرقب المشهد
العبثي من مقاعد المتفرجين؟‏
..‏ من خلف الأبواب الموصدة؟
‏ من النوافذ التي تصفعها الرياح
ولا يصلها سلم الحريق؟‏
!..‏ إلي متي ستظل تمرق العربات الفارهة
لتلطخ في مسيرتها الوجوه الكعابي الشاردة علي الرصيف؟
‏‏ إلي متي وأنا وأنت سنظل نخجل من
الإمساك بالمقشات ومضارب
التنفيض لنمحو الكلس‏
‏ ونهوي الفرش‏,‏ ونسحق البق‏
‏ ونهش الدبان‏,‏ ونطفش البراغيث‏
‏ ونعمل حواة نطلع الثعابين من دهاليز البدروم‏,‏
ونعزم بعدية ياسين نطرد
عصابة العفاريت خارج الحدود‏,‏
ونغسل وجه وقلب وضمير البيت ونقدم للإمام عرضحال‏..
ونكنس السيدة علي من أعطونا الطرشة‏
ونكسر القلة وراء
من لبسونا الطرحة‏‏
ودبحولناالقطة‏
‏ وتركونا ننفخ في القربة المقطوعة‏‏
ونضرب دماغنا في الحيط‏,‏ ونؤذن في مالطة‏‏
ونمشي مش عارفين راسنا من رجلينا‏
..إخوانا البعدة اللي سابونا نهوهو
لأبعد مدي نوعا من التنفيس‏
‏ فلابد من نزع الغطاء في الوقت المناسب
لتسريب جانب من الدخان في حلة الغليان‏..
‏ إخوانا البعدة الحاطين علي قلوبهم مراوح‏
‏ الهارشين الدور‏,‏ اللي متغطي بهم عريان‏‏
المتساب لهم السايب في السايب‏..‏
إخوانا البعدة اللي إذا ما ردوش ببقين حمضانين‏
‏ وبيانات في الهجايص‏,‏ ووعود هردبيس‏
‏ يسوقوا لنا العوج و‏..‏ودن من طين وودن من عجين‏
‏ويا دنيا في عهد نور العلم خاب الرجا فيكي
يا دنيا لو يعرفوا آخرتك للكلب يرموكي‏..
‏وسلام علي الدنيا إذا لم يكن بها
صديق صدوق صادق الوعد منصفا‏!!
_______
_______
_______
منقول من سلسلة

Tuesday, July 13, 2010

....(1)...يـــوم التنــــفيض



طيب قولوا لي وحياة كل غال
عليكم كيف بالله تستقر الأمور‏,
‏ وينصلح الحال‏,
‏ إذا لم يأخذ كل ذي مكانة موضعه
لامعا مجلوا متسيدا في الصدارة‏,
‏ ويغور لمستودع القمامة.
كل ما نخره السوس وأكلته العتة وعبثت به الفئران‏..
‏ كيف يغدو الجو صفوا والرؤية نقاء والأجواء بهاء؟‏!!.
.‏ كيف تقوم للبيت قائمة إذا لم يخصص يوم للتنفيض
تستحم فيه الحجرات‏,‏ وتتمخض الأركان‏,
‏ ويغسل المطبخ رأسه‏,‏ ويدعك الحمام كعبه‏,‏
ويشطف البلاكار تحت إبطيه‏,‏ ويدلك الصالون سجادته‏,
‏ ويطرقع المدخل أصابع قدميه‏,
‏ ويكيس الزجاج سطحه‏,‏ وتذيب الثلاجة جليدها‏,‏
وترفع الستائر ذيولها‏,‏ والبياضات أقنعتها‏,‏
والكريستالات غبشها‏,‏ والجلود بقعها‏,
‏ والفضيات طمسها‏..‏
كيف يهجر الذباب بيضه‏,‏ ويمزق العنكبوت خيوط عشه‏,
‏ وينفق جيل الصراصير الوليد في بالوعته‏,‏
ويغير النمل مسارات جيوشه‏
‏ ويعترض البرص مطقطقا فوق أسقف أخري؟‏!..
‏ كيف ترحل من الزوايا والحنايا والخفايا
ذوات الطنين والصفير والأزيز والصدي؟‏!..‏
كيف تندحر موجات إنجاب
علي وشك أن تفقس أفراخها‏,‏
وتموت أجنة علي أبواب البعث‏,‏
وتغتال مواليد حملت
إرث الهرمون وفصائل الدماء
وأنسجة الخلايا المبرمجة سلفا
علي اللثغ والمص والعض والوخز والقرص‏..‏ كيف؟‏
!!‏يوم التنفيض المقدس ماتت أجيال‏,‏ وأتت أجيال‏,‏
من عهد أمي وجدتي لابنتي لحفيدتي‏,‏
ولا غني عنه‏,‏ وإن تأرجح الاسم واتسع التوصيف
وتبدلت العبارات لكن المعني والهدف واحد‏
:‏ يوم التنفيض‏..‏ بكرة حشيل الشقة‏..
عندي السبت الكركبة‏..
‏ الاثنين غسيل ومسح‏..
‏ الراجل جاي الأربع يغسل النجف‏..
‏ أم أحمد بتشيل السجاجيد مرة في الشهر‏..
‏ مقدرشي الخميس يا روحي جايه لي الولية‏..‏
المرة بسبعين وإن كان عاجبني‏,‏
ده من غير المواصلات زائد التعاطف
مع اسطوانات الشكاوي وأمي في المستشفي
وأخويا في الحميات وبنت أختي رجلها مكسورة
والراجل قاعد لي زي الطوبة من غير شغل
والبت علي وش جواز
وأختها جوزها طاردها
بعيالها والبيت عايز تنكيس‏,‏
والدبة وقعت في البير وصاحبها واحد خنزير‏
..‏ ووووووووووو‏..
‏اللي تنقرص ما عندهاش يوم فاضي
إلا الأربع تلاقي ويلي ويلين شغلي
لازم أروحه وخوفي علي المصاغ في الدولاب‏,‏
ما هي لازم تنفض كل الأود بما فيها النوم‏..‏
خلاص أنا استنفدت كل إجازاتي المرضية والعارضة
والمدفوعة والمؤجلة لأن أم سيد عندها بيت الدقي يوم السبت‏...
‏وخلاص أصبحت من التراث أشعار بيرم التونسي
لما خدامة السبع سنوات
تخدم ثلاثين نفر ساكنين في سابع دور‏:‏
وعلشان لمونة تنزلها الهانم
سبع أشواط وتحطها نص يوم تغسل في صحون وبلاط
وبيه محال ع المعاش في حالة اشمئناط
طول النهار تشتري له أدوية ورباط
وواد مدلع تقيل ما ينقطع له عياط
يلزق علي الكتف منها لزقة الوطواط
والشهر بريال‏,‏ ويمكن يندفع أقساط‏!!‏‏.
.‏دلوقت غالبا ما يتمركز التنفيض في يوم الجمعة
المفترض انه اجازة أسبوعية
نصحو فيها علي أقل الأقل من راحتنا‏,‏
نتمطي في الفراش ونلعب في وداننا
ونتثاءب مرة واثنين وعشرة‏,
‏ وبعدها نقعد نص قعدة ونطرقع ظهرنا‏,‏
وننزلق لحافة المرتبة ونهز طولنا نتوكل نقوم
نحط الروب ونجرجر الشبشب للحمام
نتطلع للمرآة قبل غسيل الوجه وبعده‏..‏
يمكن‏..‏
والمضمضة وفرشاة الأسنان‏,‏
وقراءة الجرنال وهواية حل الكلمات المتقاطعة في قعدة الصبر والجبر‏,
‏ وورق تشده من الحيط بمنتهي الحرص يجيب آخره‏..‏
و‏..‏يمكن دش‏..‏
ويمكن الاستعاضة عنه بالوضوء‏,‏
وطلعة للبلكونة أو طلة من الشباك لاستنشاق نفسين هواء يسلكوا القصبة‏.‏
و‏..‏يمكن بدلا من الخروج من باب النوم نرجع ننام تاني‏..
‏ وليه لأ‏..‏ إجازة‏..‏
ومائدة إفطار الجمعة العامرة
التي مازلنا نذكر من محتويات زمانها الجميل
علي سبيل المثال لا الحصر طاسة البيض العيون
التي تأتي نشطة متأججة فايرة‏,‏
وطبق المدمس بالشكشوكة والزبادي يا عيني عليه‏,‏
وسجق بالزبدة‏,‏ والمرته السايحة والبسطرمة النايحة
وحتتين رنجة علي البوتاجاز‏,‏ وعيش مقمر‏,‏ ولقمة القاضي‏
,‏ والبليلة بالقشطة‏,‏ وشعرية الدولاب البيتي بالسكر‏,‏
وسد الحنك‏,‏ والطعمية السخنة‏,‏ ومخلل الزيتون الأخضر
المنزوعة بذرته وسد فوهته بمربع جزر تحط الحباية
منه تحت الضرس ماتقولشي لعدوك عليها‏,‏
ماتقولشي لوزة مقشرة بنكهة البقدونس
ولسعة قرن الفلفل المشطشط
وحدوقية الأنشوجة المستوردة النايمة
فوق بعضها مرصوصة علي وضعها
جاية كده من بلاد بره‏!
‏وتنتزع روحك من حضن الإفطار والجو العائلي الحميم
ومش أكلتك وطيب حتة صغنونة عشان خاطري
وجري إيه ياولاد محدش مد إيده لصحن المفتقة
وقربي يا بنت لبابا الطبق
ويا ابني كل بشويش محدش بيجري وراك
وماقلتوش عايزين إيه علي الغداء؟‏!..
‏ونتفرق لكل اتجاه‏,‏ بينما رب البيت بالذات
وجهته حضن المقعد الفوتيي يمد يده اليمين للتليفون
والشمال لخرطة الكيك بالمكسرات‏,
أو بسبوسة مسقسقة شربات‏,
‏ لأجل يحبس بها لقمة الإفطار
بالهنا والشفا ومطرح ما يسري يمري‏..
‏ إجازة‏..‏ مهل وكسل وتراخي وخمول ومضغ‏..‏
وقراءة الورد‏..‏ وبخور‏..‏ وخطبة الجمعة
وزيارة تحيي صلة الرحم‏,‏
من بعد ستة أيام بلياليهم طاحونة
ما تعرف فيها إن كنت ثورا‏,‏ أم حمارا‏,
أم ملكا علي أرض جبلاية‏,‏
أم ترسا في ماكينة أفلام شارلي شابلن‏..‏
إفطارك في عشاك ونهارك في ليلك ووشك في قفاك‏,
‏ وعدد ركعات الصلاة تحصيها علي صوابعك‏,‏
ناسيا أكلت إيه إمبارح‏,‏ أو بتاكل إيه دلوقت‏,
‏ ولا إن محمد أخو سي أحمد‏,
‏ ومهند كان في مسلسل تركي مش ليبي‏,‏
وغالي ده غير غالي التاني‏,‏
والمجلس ده رغم استمرار وجوهه غير المجلس اللي فات‏..
‏ وإذا ما كان صاحبك في أشد الحاجة للراحة
وتغيير الجو والفسحة وتزييت المكن
والبعد عن تلوث الدوشة وشوية رومانسية
والاستراحة من عبء المسئولية‏,
‏ فصاحبتك بالمثل في أمس الحاجة لكل هذا المثل‏,‏
وما ذنبنا وجريرتنا نحن الزوجات
إذا ما تحولت اجازة الجمعة
إلي يوم تنفيض يصرخ
فيه اللي إيده في المية
باقتراحه الممجوج‏:‏ مش لازم يا ستي
الهدة والنكتة كل أسبوع‏,‏
وكفاية ترويقة علي الماشي يوميا‏..‏
طيب علي فرض
تطنيش الزوجات لأسبوعية النظافة المقترح‏
,‏ فهل سيحرك السادة القناصل الأفاضل
يد المعاونة في جمع التلال المتراكمة باطراد
لأحذيتهم المتناثرة وجواربهم التي تصاعدت روائحها‏,
‏ وأعقاب سجائرهم‏,‏ وجرائدهم البايتة‏,
‏ وفلوس فكتهم‏,‏ وأظرف خطاباتهم‏,‏
ووصولاتهم‏,‏ وفوط وجوههم‏,‏ وبشاكير حماماتهم‏,‏
وفرش حلاقاتهم‏,‏ وقشر فاكهتهم‏,‏ وقطن ودانهم‏,‏
وعلب بلابعهم‏,‏ ولا مؤاخذة غياراتهم
من كل ركن ورف وظهر وأرض وسقف؟‏!..
‏ هل سيهب فنجري بق منهم ليبلل
طرف جرنال ليمسح به بنورة ترابيزة الصالون
التي برقشها بانسكاب فنجان قهوته
وكباية حلبته ودواء كحته وبذرة مانجته؟‏!!
‏وليحمد الله ويشكر فضله كل زوج
معترض علي تخصيص يوم واحد في الأسبوع للتنفيض‏,
‏ فهناك من الزوجات الفضليات
من يجعلن الحياة كلها تنفيضا‏,‏
واليوم الواحد إلي عمر مديد حتي يحين الأجل‏..‏
وهن غالبية متفشية مصابة بداء النظافة ــ
ربما كرد فعل عكسي لمناخ عايشنه قبل الزواج في بيت بابا ــ
إلي درجة تحويل أرجاء المنزل
إلي غرف عناية مركزة بلافتات الممنوع
المصحوبة بموسيقي تصويرية
من نغمات الطقطقة والأفأفة واللألأة والاعتراض الصارخ‏..‏
ممنوع التجول بأحذية
قادمة رأسا من أرض الطريق لحرم الريسبشن‏..‏
ممنوع استخدام فوطة الوجه لليدين‏..‏
ممنوع جر كرسي السفرة للبلكون‏..‏
ممنوع وقوع نقطة مية علي الرخام‏..‏
ممنوع تناول أي طعام خارج مربع أو مستدير أو مستطيل المائدة‏..‏
ممنوع زفارة السمك في البيت‏..‏
ممنوع زيارة فلاحين البلد‏..‏
ممنوع بخور طانت مامتك بيقلب معدتي‏..‏
ووووووو‏..‏
كل واحد منكم يغسل طبقه وينشفه
ويرجعه مطرحه و‏..‏كل شيء في مثل تلك المنازل
المعقمة المرتبة يبدو لامعا براقا
إلا صاحبتها التي تطل علي الدوام
خابية كابية مرهقة منهكة
ساندة راسها وظهرها بيدها من دورانها
في ساقية النظافة والنظام ووضع أطر الممنوعات‏..‏
وإذا ما كان حال هؤلاء المحسوكات المصابات
بهيستيريا النظافة هكذا طوال أيام الأسبوع
فما بالهن يوم التنفيض ذاته‏,‏
حيث تعلن الأحكام العرفية وحظر التجوال‏,‏
فأرضية العمليات من مخططاتها
غسل السجاد والنجف والشراعات
والأسقف وحلوق الأبواب
وتلميع قواعد الأباجورات
والأكر النحاس‏,‏
والدوران بالزعافة
في جميع الثنيات والطيات والمقرنصات‏..
‏ وفي إطلالة علي ميدان المعركة
ستشاهد القيادة الرشيدة مستغرقة
إلي حد التصوف ومراتب الوله والوجد والتدله
في الدعك المروحي
والقشط الدائري والمسح الرأسي والأفقي
والجلي العميق‏,‏ مع نزهة زنانة تدفع فيها مكنستها الكهربائية
في كل اتجاه يشير به وسواسها
لتسريح الوبرة والتقاط العفرة وشفط الشعرة العالقة‏..‏
و‏..
‏قد تتوفر الشغالة الداعية عليها أمها للمساعدة‏,‏
فيغدو من المحال التفريق بينهما
ــ الست من الشغالة ــ
فكلتاهما نافشة شعرها كأمنا الغولة‏,
‏ حافية القدمين مشققة الكعبين كمن تحفر قناة‏,‏
فاتحة صدرها مبللة بطنها
عاقدة جبينها رافعة حاجبها
قافشة في رقبة مقعد نازلة فوقه خبط بالمنفضة‏..‏
وحدث ولا حرج عن هذه الفصيلة
إذا ما كانت قد دعت ضيوفا في المساء‏,‏
فالدعك سيغدو ملتاثا‏,‏ والتنظيف حرائقا‏,‏
والمسح جنونا‏,‏
من أجل الحصول
علي شهادة الإطراء التقديرية مع مرتبة الشرف‏
‏ الحقيقة يا هانم بيتك بيشف ويرف‏!
‏وإنشاالله ما شف ولا رف
ولا فتح بابه من أصله لضيوف‏,
‏ فغالبية المحسوكات من قبل بلوغهن الأربعين
في استطاعتك تفنيطهن
من مواصفات خاصة تدمغهن‏..
‏ بشرة باهتة مسحوب دماءها‏..
‏ شعر محروق أطرافه‏,‏ قش قوامه‏..
‏ أظافر متآكلة بأصابع وارمة‏..
‏ قشف في مواضع لا يتطرقها القشف‏..‏
ظهر لا يصلب طوله
رقدت فقرته الكظرية علي القطنية‏..
‏ تجاعيد مروحية في مواطن الاستقامة‏,
‏ وأفقية في المنحنيات الدائرية‏,‏
ورأسية كضربات سكين
في مواقع الشنب والمقاصيص‏,
‏ وحواجب مفرغة ورموش منحولة‏,‏
ومية بيضاء وزرقاء‏,‏
وذبابة طائرة فوق إنسان كل عين‏,
‏ ودوالي سوداء وزرقاء
هضابا علي أرضية الساقين‏,‏
وبحة في الصوت نتيجة إدمان استنشاق أبخرة
مستحضرات الإبادة والتعقيم‏..‏
وتسأل مثل هذه الزوجة عن زوجها راح فين؟‏!..
‏ فتعيد عليك نفس السؤال‏..‏ هو صحيح راح فين؟‏
!‏فإذا ما ساقك سوء الحظ ضيفا علي
مثل هذه النوعية من ربات البيوت المحسوكات
بحكم القرابة أو الصداقة أو المعرفة‏,‏
فلا راحة لك في مقام ولا طيب منام‏,‏
ومهما حاولت أن تزيل من آثار جريمتك
من تلويث البيئة بعد دخولك للحمام كمثال‏,
‏ فسوف تجدها قد دخلته بعدك مباشرة
لقلب كيانه رأسا علي عقب‏,‏
فتتواري خجلا في ركن ضيافتك ترقب من بعيد
أوجه نشاطها المكثف في تعقيم الجو الفاسد
الذي خلفته من ورائك مع تغيير كل ما يمكن تغييره‏,‏
ولو كان بيدها لنسفت الحمام من أصله واقتنت آخر بديلا‏..‏
وأبدا لن ترضي هذه المحسوكة
بمساعدتها في رفع أطباق المائدة
أو غسلها أو تجفيفها
بل سوف تقول لك
وكأنه من باب كرم الضيافة
‏:‏ اتفضلي يا حبيبتي ارتاحي هناك
وشوفي لك حاجة تقريها أو تقزقزيها
أو تنأنئيها وماتتعبيش نفسك
وهذا القول سينقل لك معني في بطن الشاعر
روحي العبي لك في حاجة هناك
وقبلها اغسلي إيدك وبلاش عطلة وحياة أبوك‏,
‏ فإذا ما قمت من فرشتك في فراش ضيافتك
وحاولت محو آثار رقدتك بشد الملاءة علي الآخر
وعدل أكياس المخدات وتسوية الكوفيرتة
كما في اللوكاندات‏
فلا تخدعن سوي نفسك
بأن كل شيء قد غدا في حكم التمام‏,‏
وأنك قد قمت بفعل الذوق كضيف
نازل علي أهل البيت‏,‏ فصاحبتك
سوف تقتحم مخدعك المؤقت
بابتسامة ليتها من سماجتها تسحبها
أو تمسحها أو تبلعها‏,‏ لتنزع جميع الأغطية
التي لم يمض عليها يوم واحد‏,
‏ وتعري جميع المخدات لتحملها
كالجثث المهدلة في أحضانها
إلي النوافذ المفتوحة لتعريضها
لأشعة الشمس القاتلة للجراثيم‏,
‏ وليس ببعيد ثني المراتب
وخلع كام لوح
من ملة السرير
وتسييق ما تحتها بالماء والديتول والفنيك‏..‏
ومازلت أذكر أفعال قريبتنا
عندما كنا نسافر إليها
في إجازة الصيف
لنصحو عنوة مع خيوط الفجر‏,‏
فنجد أطراف الأغطية قد رفعت جوانبها المتدلية فوقنا‏,‏
وهناك شغالة مقروضة مندسة تحت السرير
تدعك الأرضية بالفرشاة والصابون ــ
علي نسق مستشفيات الحميات ــ
بخروشة مدوية تصحي الميت‏,‏
إلي جانب ما يفعله ضوء النوافذ
بسهام الأشعة الثاقبة للقرنية‏..
‏ وضجة ست البيت
الآمرة الناهية الآتية من الصالة
موجهة للمزغودة الصغيرة تحت أسرتنا البيضاء‏:‏
مدي إيدك يا بنت الكلب للركن البعيد هناك‏..‏
و‏..
‏الآن وبعد عشرات السنين
أدركت أن الله يرحمها كانت تستخدم
طريقتها الفذة تلك في إعلان استيائها
من قدوم أهل زوجها وأنجالهم الهابطين
علي بيتها كالقضاء المستعجل
لأن الصيف قد حل وحصيرته واسعة
وبيتها الله يعمره يقع في الثغر‏,‏
البحر أمامه والهواء بيطس من خلفه‏.