Sunday, March 29, 2015

كلمة فى ودن حبيباتى وأحبابى(تدوينة قديمة)

21 comments
 شهر مارس قرب ينتهى
ودكتوررررات ودكاتيرررر حبوبين
doctor Pictures, Images and Photos

حيستلموا الشغل لأول مرة
وحابه أقولهم كلمتين
يسمعوهم
ولو عجبوهم ينفذهم
ولو ما عجبوهمش ما ينفذهمش
ولو عجبهم جزء منه وماله يعملو به
اهو كله فايدة
ومعلش لو كنتم حتشوفوا الموضوع
إنشاء وأوامر ونواهى
لكن والله ما أقصد
الأ النصح فى الله
ونبتدى الكلام
اشتغل بذمة وضمير واتعلم وأعتبر نفسك **
Animated Man Medical Pictures, Images and Photos
لسه طالب كل حالة تشوفها روح اقرأها تانى فى الكتاب
ومش بس لحد الأمتياز ما يخلص
لألألألألألألألألألألأ
أعتبر نفسك طالب لحد ما تاخد الماجستر او الدبلوم

Animated Doctor Smiley Pictures, Images and Photos

فى مهنتنا مش كافى انك تاخد البكالوريوس
لكن لازم التخصص
بص للمريض على انه قريبك اخوك ابوك جارك وأعمل  **
اللى يرضيك بعد كده مش قادر تعمل له حاجة على الأقل ابتسم
فى وشه بس مش ابتسامة تكلف لا ابتسامة شكر لله أن أنت فى
Animated Doc Pictures, Images and Photos
الجهة الاخرى من السريرأو المكتب او صالة الانتظار
فاهمين قصدى
ماتستكبرش على عامل ولا ممرض ولا ممرضة **
ممكن واحد من دول
ابنهم أوبنتهم دكاترة واساتذة كمان قى الجامعة :ليه لأ؟
وكمان حاجة ممكن الواحد منهم
من دول ماهيته وخبرته اكتر منك الف مرة
وشغلتنا مزاولة بالاساس قبل ما تكون كتاب أو كراس
(ايه ياخواتى العسل اللى انا بكتبه دا؟!)
حبيباتى الدكتورات خلى بالك من ضوافرك **
ياريت تقصيهم بتكلم جد قصيهم زى أيام المدرسة الابتدائى
مش الثانوى لأ الابتدائى يعنى مفيش ضوافر
مش سنة الامتياز وبس
لأ على طول اعرفى انك طبيبة أولا ً
ولما ياستى تبقى رايحة فرح أو مناسبة ابقى حطى الضوافر
(المستعارة زى الرموش وحاجات تانية وش مكسوف)
ايووووووة صحيح ليه حتقصيهم؟
قصيهم رحمة بك اولا قبل ما يكون للعيان انتى حتشتغلى بحق وحقيق
يعنى حتشوفى ناس
(من كل لون ياباتتسة )
وبالتالى مهما حاولت ظوفرك
تنضفيهم حيلموا ياما ياما
doctor Pictures, Images and Photos
 غلطة غلطتها **
ومش عايزاكوا تغلطوها
التكبر على الحكيمة أو الممرضة
ونصب روح العداء بينك وبينها
هى من غير حاجة ما بتحبكيش
ماتحاووووووووووووليش
يبقى مفيش داعى كمان
تكرهك او تزعل منك
يبقى لو حصل ياويلك منها مش حترد عليك
وحتعّقد لك كل حاجة حاولى تكسبيها
(عارفة انه صعب بس حااااااااااااااااولى)
     **لبسك حبيبتى خلى بالك منه
بلاش الدي كولتيه الواسع بلاش البدى الضيق القصير أنتى
حتوطى على عيانين وناس منهم الكويس ومنهم الوحش
منهم الشبعان ومنهم الجعان
فاهمينى!
البارفان حبيبتى بالله عليكن بلاش منه **
الدياودرنت وبس
بلاش البارفان بالله عليكن
    البالطو البسووووووووه اول ما تروحوا الشغل  **
انا عارفة انكم فى منتهى الشياكة
وعايزين تبينوا الحتة الآيافة :)
واللبس الجميل والشياكة والاناقة لكن معلش
البسوا
البالطو
اول ما تروحوا الشغل
مش دا البالطو اللى نفسنا كنا
نلبسه من زماااااااااااااااااان
اهى جت الفرصة
وخلوا بالكم منه خلوه نضيف دايما
بتصرفوا كتير اشتروا بفلوس كسوة الصيف
السنة دى بلاطى بيضا ايوة بالفلوس
اشتروا بيها بلاطى بيضا جديدة
متخليش الحكيمة بلطيها اجدد واشيك
من بلطيكى لانها بتغسله بالبوتاس وتغليه وتزهره بالزهــرة
وانتِ بتعملى كدهـ؟
لأ طبعاً
كمان لانها عارفة الراجل بتاع المخزن
وكل شوية يديها واحد جديد فى الخباثة الدساسة
وانتى البالطو بتاعك هو بتاع سنة اولى بالكلية
الشوز بردون الجزم**
(ايه حكايتها هى كمان؟دا اكيد انتو بتسألوا)
بلاش الكعب والتيك تيك تيك طول ما انتى ماشية
فى الممرات والاوض بتاعة المستشفى
وبلاش بردون كمان
اللبان!
(سوووووو باد سووووووو باد!)
Animated Doc Pictures, Images and Photos
اول ماهية بأذن الله حتقبضيها اشترى منها حاجة حلوة جاتوة تورتة**
ربع كيلو بسبوسة أى حاجة المهم انك تشترى اى شىء للبيت عندك
وتدخلى عليهم وفى ايدك الحاجة الحلوة دى
اينعم بسيطة لكن حتدخل فرحة
ادددددددددددددددددددددد
كدددددددددددددددددة
عليهم
أن الأمورة الصغنونة بتاعتهم
كبرت واشتغلت
وبتجيب
ربع كيلو بسبوسة
وهى راجعة من الشغل
أنا لو قعدت اكتب مش حاخلص
لكن أنا حأترك الموضوع مفتوح واللى
عايز يزود حاجة او فيه سلوك أو مظهر فى
الأطباء أو الطبيبات الجداد
مش بيعجبه
يتفضل يقووووووووول
وكلنا
ودان صاغية
(على رأى الباشمهندس TIMMY)
تدوينة قديمة متجددة
كل شهر مارس
واحنا طيبين



Saturday, March 28, 2015

...زلــــــــزال يا اماااااتى زلزاااااال...

13 comments

ما أذكره عن زلزال 1992
انه حصل  حوالى الثالثة ظهرا
 تـــــــــــــقريبا
المهم كانت فيه
ازازة بيبسى
كبيرة
ازاز

(مش بلاستك)
محطوطة
على تربيزة السفرة
 مسكتها بسرعة قبل ما تقع تتكسر
وتكسر أزاز التربيزة معاها

 ونزلت جرى
على السلم لقيت اختى
بتسألنى عن أبنها
 فين ؟؟
(كان نايم عندى)
قلتلها بكل براءة

!!نسيته
نسيت أبن أختى
!! وافتكرت الأزازة
ومن يومها وهم مسكينها
ليا ذلة
(تفتكرى أزازة البيبسى وتنسى ابن أختك)
وأهو امبارح اتجددت الذكرى
لكن فين اختى ؟
وفين أبنها؟
وفين اللمة؟
وفين الضحك؟
وفين؟ وفين ؟ وفين؟
سبحان من يُغير ولا يتغير
سبحان الله
كتب الله لكم السلامة جميعاً
الخبر من الوطن

Friday, March 27, 2015

..آدعــــــــو للمعتقلين...


جمعة مباركة علينا وعليكم
أدعو للمعتقلين اليوم
فى صلاة الجمعة
ان يخفف
 الله 
عنهم ما هم فيه
وأن يفك آسرهم
وآن يكتب لهم
ًالســــــــلامة
جمــــــــيعاً

Thursday, March 26, 2015

...مستنقع اليمن مرة أخرى...


عاصفة الحزم
هــــــــــــى
عاصفة الحزن
للأمــــــــــهات
للأبنـــــــــــاء
للجــــــــرحى
والفقـــــــــــــراء

Tuesday, March 24, 2015

...الخياطة...

27 comments

الخياطة
 هى من المهارات اليدوية
اللى أتعلمتها من زمان وبــ أحمد ربنا
ليل ونهار عليهــــــــــــا
مش حاقول أنى خياطة بريمو
ولا ياخىّ أسطى درجة اولى
ولا بأعمل بلاطى شتوى
بحشو الشعر والبطانة
ولا تيايرات
بكورشال
لكـــــــن
بلوزاتى
جونلاتى
فساتينى
عباياتى
كلها
او نقول
معظمها
صنعة أيديا
وحياة عينيا
وانا فى السعودية
من اوائل الحاجات
اللى اشتريتها وانا بجهز
لحياتى هناك
كانت ماكينة خياطة
اشتريتها
 مستعملة
ما اكذبش
عليكم
ومش حاقدر اوصف أد ايه نفعتنى
سواء لخياطة الهدوم او لشغل الوقت
 فى حاجة نافعة
 بدل الفكر والتفكير
فى اللى حصل واللى وصل
أول ما أتعلمت
كان ممكن أسهر الليلة كلها
لاجل ما البس
(الطقم الجديد)
تانى يوم الصبح
لكن كل شىء فعلا بيتغير
واللى بتحبه النهاردة
ممكن تزهق منه بكرة
وعلشان كدا وشوية شوية
بطلت أخيط خالص
واتعرفت على ست خياطة
ساكنة جنبنا
بقت تعمل لى طلباتى كلها
لكن وللأسف دوام الحال من المحال
الست عزلت وادينى رجعت
اخيط تانى
انتم عارفين
الصيف على الأبواب
ولازم الواحد يفتتح الموسم
بحاجة جديدة
مش كدا ولا أيه؟
بأستئذنكم
فى


 
اجازة قصيرة 
من التدوين 
وممكن الفيس
وحارجع تانى
بأذن الله
لو كان
فى العمر بقية

انا عارفة ناس حيقولوا
(ولو حتى فى نفسهم)
المقدمة الطويلة العريضة دى
علشان مش حتكتبى يومين تلاتة اربعة خمسة
لازم ياعنى
الحبتشكنات دى
(الله يرحمك يااستاذ عمرو بدر)
وآشى استئذان وآشى مش عارف ايه
 وآشى ابصر أيه ومدرك ايه
لكل دول اقولهم




















موتوا بغيظكم

Monday, March 23, 2015

...فضيلة الشيخ أبو العينين شعيشع...


أبو العينين شعيشع
 صوت من أعذب الأصوات المصرية
التي نطقت بآيات القرآن الكريم
 قارئ يرتاح القلب وتهتز المشاعر
 عند سماع حنجرته الذهبية
الميلاد والنشأة
يقول الشيخ أبو العينين شعيشع
 كانت ولادتي غير مرغوب فيها
لأنني كنت الابن رقم 12
ووالدتي كانت تفعل المستحيل
 للتخلص مني ولكني
تشبثت بها حتى وضعتني
.. وذلك لحكمة يعلمها الله حيث كنت
 فيما بعد مسئولاً وسبباً
في إطعام كل هذه الأفواه في ذلك الحين
ولد الشيخ أبو العنين شعيشع
في 12 أغسطس في عام1922
بمدينة “بيلا” بمحافظة كفر الشيخ
بجمهورية مصر العربية
 وهو الابن الثانى عشر لأبيه
 والتحق بالكتاب ببيلا
وهو في السادسة من عمره
 وحفظ القران قبل سن العاشرة
 والتحق بالمدرسة الابتدائية
 فشجعه ذلك وساعده على قراءة القرآن
 بالمدرسة أمام المدرسين والتلاميذ كل صباح
 وخاصة في المناسبات الدينية والرسمية
 فنال إعجاب واحترام الجميع 
فأشار ناظر المدرسة على والدته
أن تذهب به إلى أحد علماء القراءات والتجويد
 ليبدأ مشواره في تلاوة القرآن الكريم
حبه لسهرات القرآن
وحينما كان الشيخ طالبا
بمدرسة المنصورة الثانوية
 حكم عليه جميع أساتذته بأنه لا يصلح لشئ
 وذلك لعدم التزامه في الدراسة بسبب سهراته
 في الليالي التي يحييها القراء والمنشدون 
كان الشيخ أبو العينين يخرج إلى الشارع
باحثا عن ليالي القراء ويحوم حول المنشدين
 ويطرب كلما سمع أن أحداً من كبار القراء
سيسهر في ليالي المنصورة
 وكان شقيقه الشيخ أحمد شعيشع
من مشاهير القراء في المنصورة
 فكانت فرصة طيبة لشعيشع
أن يذهب معه كل مساء
 ليقابل مع أخيه القراء ويستمع لهم
عمله بالإذاعة
دخل الشيخ أبو العينين شعيشع الإذاعة سنة 1939م
 وكان وقتئذ متأثراً بالشيخ محمد رفعت
 وكان على علاقة وطيدة به
 وقد استعانت به الإذاعة لإصلاح
الأجزاء التالفة من تسجيلات الشيخ رفعت
واتخذ الشيخ أبو العينين لنفسه
 أسلوباً خاصاً في التلاوة بدءاً من منتصف الأربعينيات
 وكان أول قارئ مصري يقرأ بالمسجد الأقصى
 وزار سوريا والعراق في الخمسينيات
أصيب بمرض في صوته مطلع الستينيات
 ثم عاد للتلاوة وعين قارئاً لمسجد عمر مكرم سنة 1969م
 ثم لمسجد السيدة زينب منذ 1992م 
أشهر مواقفه
ناضل الشيخ في السبعينيات
لإنشاء نقابة القراء مع كبار القراء وقتئذ
 مثل الشيخ محمود على البنا
 وانتخب نقيبا للقراء سنة 1988م
خلفاً للشيخ عبد الباسط عبد الصمد
وعين عضوًا بالمجلس الأعلى للشئون الإسلامية
 وعميدًا للمعهد الدولي لتحفيظ القرآن الكريم
 وعضوًا للجنة اختبار القراء بالإذاعة والتليفزيون
 وعضوًا باللجنة العليا للقرآن الكريم بوزارة الأوقاف
 وعضوًا بلجنة عمارة المساجد بالقاهرة
وللشيخ جولات واسعة في ريف مصر
 لاكتشاف المواهب الجديدة
 وله رأي في عدم وجود أصوات جديدة واعدة
 حيث قال أن السبب في رأيه
هو اختفاء الكتاتيب في الريف
 كما أن أكل البلاستيك والماء الملوث
واستخدام المبيدات الكيميائية أثرت عضويا
 على صحة الإنسان، وكان الشيخ دائما
 يصف قراء اليوم
(بأكلة البلاستيك) 
رحـــــــــلاتـــــــــه
سافر الشيخ أبوالعينين شعيشع
 إلى معظم دول العالم
 وقرأ بأكبر وأشهر المساجد في العالم
 أشهرها المسجد الحرام بمكة
 والمسجد الأقصى بفلسطين
 والأموي بسوريا
 ومسجد المركز الإسلامي بلندن
 وأسلم عدد غير قليل تأثراً بتلاوته
ولم يترك دولة عربية ولا إسلامية
 إلا وقرأ بها عشرات المرات
على مدى مشوار يزيد
على ستين عاما قارئاً بالإذاعة
الجوائز التي حصل عليها
حصل أبو العنين على وسام الرافدين من العراق
 ووسام الأرز من لبنان
 ووسام الاستحقاق من سوريا وفلسطين
 وأوسمة من تركيا والصومال وباكستان
 والإمارات وبعض الدول الإسلامية 
وفــــاتـــــه
توفى الشيخ
 أبو العينين عام 23 يونيو
2011 عن عمر يناهز 89 عاما
 بعد أن ترك أثرا ضخما
من التسجيلات القرآنية الخالدة
 و تلاوات رائعة لكتاب الله العظيم
أتحفت العالم الإسلامي شاهدة
على عطائه إلى أن يشاء الله


منقووووووووول

Sunday, March 22, 2015

...احتـــــــفالات هنا وصرخات هناك...


فى الوقت اللى كانت
احتفالات عيد الأم
على أشدها
فى كثير
من الأماكن ببلدنا
كانت هناك صرخات
واستغاثات ووفيات
بالعشرات
نتيجة سقوط
اتوبيس
لشركة أوراسكوم
(المتخصصة فى البناء والإنشاءات)
فى ترعة المريوطية
ترجح التحقيقات الأولية
ان عجلة القيادة أختلت
بيد سائق الأتوبيس
أما بسبب السرعة الزائدة
او لأنفجار أحدى أطارات الأتوبيس
مما أدى الى إنحرافه بشدة
عن الطريق وسقوطه
بالترعة
عدد الجثث التى تم إنتشالها
الى الأن 
جـــــــــ35ثـــــة
مع الأخذ بأن هناك
أفادات تشير ان الأتوبيس
كان يقل أكثر من 50راكباً
رحمة الله على من ماتوا
وكان الله فى عون من عاشوا
الضحايا الحقيقين فى رأىى

المصابين والأيتام والثكالى

الذين أتووا من

 محافظات مختلفة جاءوا إلى القاهرة
بحثاً عن لقمة العيش ارتضوا العمل تحت ظروف 
صعبة وبلا مظلة تأمينية تحميهم وتكفل ذويهم إذا أصابهم مكروه
 وهو ما أدى إلى سيطرة حالة من الغضب على العاملين
بشركة «أوراسكوم» المتخصصة فى مجال البناء والإنشاءات
 أدت إلى نشوب مشاجرات بينهم وبين قوات الأمن فى موقع الحادث لرغبتهم فى إنقاذ ذويهم
قال أيمن محمود، أحد موظفى الشركة، إن رجال الإنقاذ وصلوا إلى موقع الحادث بعد ساعة، وبالتعاون مع زملائه أخرجوا الجثث من قاع الترعة، ونقلوهم إلى مستشفيات القاهرة والجيزة، مؤكداً أنه استخدم سيارة الشركة فى نقل جثة صديقه أحمد عبدالله إلى مشرحة زينهم بعد مرور نحو ساعة، بينما كانت جثته ملقاة على جانب الترعة.
وقال محمد أحمد، عامل بالشركة، إنه كان يستقل أتوبيساً يسير خلف الأتوبيس المنكوب، وإن أتوبيس الشركة كان قادماً من المقطم لنقل العمال إلى مقر العمل فى 6 أكتوبر، مشيراً إلى إغلاق سيارة ملاكى الطريق أمام الأتوبيس، ما أسفر عن اختلال عجلة القيادة بيد السائق، واصطدامه بالسور الحديدى وانقلابه فى الترعة
وقال أحد العاملين بالشركة، طلب عدم ذكر اسمه، إن الشركة لم تؤمن على العاملين فيها، مؤكداً أن ضحايا ومصابى الحادث جميعهم عمال «غلابة»، معظمهم جاء من محافظات الصعيد للبحث عن «لقمة العيش»، مؤكداً تأخر قوات الحماية المدنية فى إنقاذ زملائه، ما جعلهم يشاركون فى عملية الإنقاذ لمدة ساعة قبل وصول رجال الحماية المدنية إلى موقع الحادث.
وقال أحمد السيد، أحد العاملين بالشركة: استخدم العمال ونش الشركة لرفع الأتوبيس والضحايا من قاع الترعة، مضيفاً أن ونش الحماية المدنية فشل فى انتشال الأتوبيس، ما دفع رئيس العمال إلى الاستعانة بونش الشركة.
وقال علاء، أحد موظفى الشركة، إن جميع العاملين بالشركة معرضون للموت فى أى وقت، وإن سيارات الشركة غير صالحة لنقل الموظفين. وأثناء حديثه مع «المصرى اليوم» قام أحد زملائه بتكميم فمه قائلاً: «بلاش كلام ليقطعوا عيشنا.. حرام عليكم»، ورد «علاء»: «الشركة مش بتأمن علينا وسيبانا فى إيد سواقين بيشربوا مخدرات»، مضيفاً: «هناك سائقون بالشركة يستخدمون السيارات فى نقل الطلاب إلى المدارس، ثم يتولون نقل الموظفين، ما يؤدى بهم إلى قيادة السيارات بسرعة جنونية وقطع الطريق»
منقووووول من مصادر متعددة
بتصرف فى طريقة ولغة العرض

Saturday, March 21, 2015

...امهـــــات ولـــــكن...

15 comments
النهاردة عيد الأم
والأم عادة يُضرب بيها المثل 
فى العطاء والحب والتضحية
لكن لكل قاعدة شواذ زى ما بيقولوا
فى حياتى قابلت 
ثلاثة أمثلة 
للحالات
الغير طبيعية دى
الأولى كانت جارة من جاراتنا
تزوجت فى سن مبكرة نسبياً
 وانجبت ثـــــــــــــلاث بنات
حرمــــت عليهن نهائيا
قول
!!مـــــــــــــــــــــــــاما
أزاى ياوليه ياعنى؟
هو كدا
!!انتو حتكبرونى قبل الأوان
انا مش عاوزة اسمع كلمة ماما دى ابدا
يـــــــــــــــــــــــــاسبحان الله
وياويلها وياسواد ليلها اللى تغلط وتقول
مــــــــــــــــــــامـــــــــــــــــا
وخاصة وهن بالشارع
 او بحضور ضيوف

يبقى 
حتترن علقة ما حصلتش
اه زى ما بقولكوا كدا
طبعا بناتها بمجرد
ما اشتغلوا 
واتجوزا 
نادرا ما كنت المح واحدة منهن 
فى زيارة لأمها 
ياسبحان الله
المثل التانى
خالة من خالاتى
جوزت بناتها واولادها 
وبقى الولد الأخير معها
يشهد له الجميع بالجدية والأستقامة
وايضا بالنجاح فى عمله وشغله
وكلما فاتحها فى امر زواجه
ماطلت فى الموضوع
وكلما أخبرها بمن 
راقت له فى عمله
لتكون زوجة
رفضتها هى
قلبا وقالبا
وطلعت فيها
 القطط الفطسانة زى ما بيقولوا

استعان الشاب بالأقارب
والخالات
لتغيير راى أمه
ولكن لم يفلحن فى ذلك
وعندما واجهتها امى
رحمة الله عليهما 
بالكلام وطلبت
منها أن تقول
السبب
بكل صراحة
قالت

!!الله 
عاوزانى أجيب واحدة 
تكايدنى وتقرفنى فى عيشتى؟
تكايدك ليه؟ انتى فى بيت وهى فى بيت؟
يــــــــــــــــــــــــــاسلاااااااااااام 
!وتاخد خيره كله!واتحرم انا من خيره
طب وبعدين يا فلانة؟
مش عاوزة تشوفيله عيل ولا أتنين؟
!ياختى بلا خيبة
هم العيال بيعملوا ايه؟
طيب ما مسيرك بعد عمر طويل ولا قصير
(حتموتى)
وتسيبيه وحيد فى الدنيا؟
مين يكون معاه ساعتها؟
!! ساعتها يبقى يتجوز 
وحصل وماتت
وهو ما اتجوزش
وفى أخر ايامه الله يرحمه
راح بيت
 المسنانين
(مش خطأ كتابى على فكرة ولكن هكذا كان يقولها)
 لان محدش بقى فاضى لحد

اما المثل التالت فأنا
قابلته فى شغلى  
وحكيته قبل كدا فى
تدوينة 
الضنا غالى
على صعبان على حالنا
نمـــــــــــــــر ونلأ
لأ
لأ
لأ لسه فى مثل رابع
(ام مسعود)
حالة خاصة جداً
ابقى احكى عنها بعدين بقى

Friday, March 20, 2015

...المفرحتــــان المبهجتان...

8 comments


!!سبحان الله 
ما أكون فى ضيق أو كرب
الا وأجد السورتين امامى
أما مكتوبتين فى المصحف
او فى ورقة كتاب أو جرنال
او اسمعهما من الراديو او التليفزيون
او عبر الهواء من عند الجيران
واخر مرة كان (بائع البرتقال )هذا الصباح
مشغل الراديو على عربيته
أعلم أن الكلام موجه
من

الله
عز وجل

الى الرسول صلى الله عليه وسلم
ولكن والله ما أن أسمع
بداية السورة الاولى
الأ وينشرح صدرى ويزول همى
الحمد والشكر لله رب العالمين
-----
*****
تحديث
******
معلش حأحط 
التعليقات
اللى جت المرة اللى فاتت
لأنها من أعزاء باعدت بيننا
الأيـــــــــــــــام والسياسة

12 COMMENTS:

norahaty said...
الحمد لله رب
العالمين والصلاة
والسلام على خاتم
المرسلين سيدنا محمد
وآله وصحبه ومن أهتدى
بهديه الى يوم الدين
خواطر شابة said...
الا بذكر الله تطمئن القلوب
richardCatheart said...
طبعا الايات الكريمه نزلت موجه للمصطفى عليه افضل الصلاه والسلام
لكن مايمنعش ابدا ان ربنا عز وجل يستخدمها لطمئنه القوب المؤمنه به عز وجل
ليه لاء تبقى متضاايقه وتقولى يارب تفتحى التلفزيون تلاقى تلاوة لسوره تحسى انها ليكى ربنا بيطمن بيها قلبلك
اعتقد ان فعلا موجود ودا نوع من الخصوصيه بين الله عز وجل وعباده المحتاجين له
وربنا ديما يطمن قلبك يانور ويجعل فيه النور ديما

تسلمى تقبلى مرورى
romansy said...
الحمد لله رب العالمين على كل شئ
الله اد ايه قراننا جميل وديينا جميل قوى قوى

سبحان الله
راجى said...
يجب ان نعتبر ان ايات الله فى القران الكريم تخاطب كل من يقرأها
Haytham Alsayes said...
السلام عليكم


السورتين دول احب سورتين الي في القرأن


جزاكي الله خيرا

تحياتي
لولا وزهراء said...
صباح الورد يا دكتوره نورا

القران يصلح لكل زمان ومكان وفى كتير من الاحيان تحسى ان فى ايه او يمكن سوره ربنا ارسل لكى حد يخليكى تسمعيها او بطريقه ما تقرايه وكانها رساله علشان تطمنى

ربنا يكرمك ويوفقك


زهراء
سمع هوص (Abo 3li) said...
الحمدلله ..

ربنا يطمن قلبك.. يادكتورة
شاب مصري مفروس said...
اروع شيء ان الانسان يقدر يفهم الرسائل الربانية الموجهة له
ويحس ان ربنا معاه وبيبعتله رسايل علشان يصححله الطريق ويقويه
اللهم اجعلنا من اللذين يستمعون القول فيتبعون احسنه
آمين
تحيتي
هانى زينهم said...
والله يا دكتور القران كله بيريح . الحمد لله على نعمة الاسلام .
بس تعبتينى يا دكتور فى العنوان الجديد ده . عموما ربنا يجعلها عتبة مبروكة عليكى يا رب !!
أحمد الصعيدي said...
السلام عليكم ورحمة الله

باك الله فيكي


وأشكر لك وجودك بين أوراق مدونتي

http://rorosweetangel.blogspot.com/
Anonymous said...
السلام عليكم:

قَالَ الْإِمَام أَحْمَد حَدَّثَنَا أَبُو نُعَيْم حَدَّثَنَا سُفْيَان عَنْ الْأَسْوَد بْن قَيْس قَالَ سَمِعْت جُنْدُبًا يَقُول : اِشْتَكَى النَّبِيّ صَلَّى اللَّه عَلَيْهِ وَسَلَّمَ فَلَمْ يَقُمْ لَيْلَة أَوْ لَيْلَتَيْنِ فَأَتَتْ اِمْرَأَة فَقَالَتْ يَا مُحَمَّد مَا أَرَى شَيْطَانَك إِلَّا قَدْ تَرَكَك فَأَنْزَلَ اللَّه عَزَّ وَجَلَّ " وَالضُّحَى وَاللَّيْل إِذَا سَجَّى مَا وَدَّعَك رَبُّك وَمَا قَلَى " رَوَاهُ الْبُخَارِيّ وَمُسْلِم وَالتِّرْمِذِيّ وَالنَّسَائِيّ وَابْن أَبِي حَاتِم وَابْن جَرِير مِنْ طُرُق عَنْ الْأَسْوَد بْن قَيْس عَنْ جُنْدُب هُوَ اِبْن عَبْد اللَّه الْبَجَلِيّ ثُمَّ الْعَلَقِيّ بِهِ وَفِي رِوَايَة سُفْيَان بْن عُيَيْنَة عَنْ الْأَسْوَد بْن قَيْس سَمِعَ جُنْدُبًا قَالَ : أَبْطَأَ جِبْرِيل عَلَى رَسُول اللَّه صَلَّى اللَّه عَلَيْهِ وَسَلَّمَ فَقَالَ الْمُشْرِكُونَ وَدَّعَ مُحَمَّدًا رَبُّهُ فَأَنْزَلَ اللَّه تَعَالَى " وَالضُّحَى وَاللَّيْل إِذَا سَجَى مَا وَدَّعَك رَبّك وَمَا قَلَى " .

حازم
واليوم سمعتهما
من الدكتور 
احمد نعينع
فى قران 
 صلاة الجمعة
التى تنقلها 
محطة إذاعة القرآن الكريم