Saturday, March 21, 2015

...امهـــــات ولـــــكن...

النهاردة عيد الأم
والأم عادة يُضرب بيها المثل 
فى العطاء والحب والتضحية
لكن لكل قاعدة شواذ زى ما بيقولوا
فى حياتى قابلت 
ثلاثة أمثلة 
للحالات
الغير طبيعية دى
الأولى كانت جارة من جاراتنا
تزوجت فى سن مبكرة نسبياً
 وانجبت ثـــــــــــــلاث بنات
حرمــــت عليهن نهائيا
قول
!!مـــــــــــــــــــــــــاما
أزاى ياوليه ياعنى؟
هو كدا
!!انتو حتكبرونى قبل الأوان
انا مش عاوزة اسمع كلمة ماما دى ابدا
يـــــــــــــــــــــــــاسبحان الله
وياويلها وياسواد ليلها اللى تغلط وتقول
مــــــــــــــــــــامـــــــــــــــــا
وخاصة وهن بالشارع
 او بحضور ضيوف

يبقى 
حتترن علقة ما حصلتش
اه زى ما بقولكوا كدا
طبعا بناتها بمجرد
ما اشتغلوا 
واتجوزا 
نادرا ما كنت المح واحدة منهن 
فى زيارة لأمها 
ياسبحان الله
المثل التانى
خالة من خالاتى
جوزت بناتها واولادها 
وبقى الولد الأخير معها
يشهد له الجميع بالجدية والأستقامة
وايضا بالنجاح فى عمله وشغله
وكلما فاتحها فى امر زواجه
ماطلت فى الموضوع
وكلما أخبرها بمن 
راقت له فى عمله
لتكون زوجة
رفضتها هى
قلبا وقالبا
وطلعت فيها
 القطط الفطسانة زى ما بيقولوا

استعان الشاب بالأقارب
والخالات
لتغيير راى أمه
ولكن لم يفلحن فى ذلك
وعندما واجهتها امى
رحمة الله عليهما 
بالكلام وطلبت
منها أن تقول
السبب
بكل صراحة
قالت

!!الله 
عاوزانى أجيب واحدة 
تكايدنى وتقرفنى فى عيشتى؟
تكايدك ليه؟ انتى فى بيت وهى فى بيت؟
يــــــــــــــــــــــــــاسلاااااااااااام 
!وتاخد خيره كله!واتحرم انا من خيره
طب وبعدين يا فلانة؟
مش عاوزة تشوفيله عيل ولا أتنين؟
!ياختى بلا خيبة
هم العيال بيعملوا ايه؟
طيب ما مسيرك بعد عمر طويل ولا قصير
(حتموتى)
وتسيبيه وحيد فى الدنيا؟
مين يكون معاه ساعتها؟
!! ساعتها يبقى يتجوز 
وحصل وماتت
وهو ما اتجوزش
وفى أخر ايامه الله يرحمه
راح بيت
 المسنانين
(مش خطأ كتابى على فكرة ولكن هكذا كان يقولها)
 لان محدش بقى فاضى لحد

اما المثل التالت فأنا
قابلته فى شغلى  
وحكيته قبل كدا فى
تدوينة 
الضنا غالى
على صعبان على حالنا
نمـــــــــــــــر ونلأ
لأ
لأ
لأ لسه فى مثل رابع
(ام مسعود)
حالة خاصة جداً
ابقى احكى عنها بعدين بقى

15 comments:

زهــــراء said...

صباح الفل والياسمين و السعاده
كل ثانيه وانتي بخير وسعاده لأن النهارده عيد الأم ومن وجهة نظري المتواضعه الأم هي التي تعطف وتحن وليس من تنجب
راجعه من تانى

ظلالي البيضاء said...

الحمد لله .. والقصص لا تزال كثيرة لكنها مستورة .. نسأل الله العفو والعافية ..
مع التحية الطيبة

Mohamed Ashri said...

لم أجد الرد على الحالتين .. الأم المتصابية أو الأم الاناني ..
كلتاهما موجودتان فى المجتمع بكثرة ..
أما العلاج .. فأكيد تحتاجان علاج نفسى ..
والله المستعان ..

زهــــراء said...

مسا الورد رجعت من تانى
حالة الام اللى تزوجت فى سن صغيره هى متصابيه تشعر انها لم تعيش حياتها لذلك تفضل الا يقول لها احد الابناء ماما وبكل تاكيد لم تهب لهم الحب والحنان الكافى لان واضح انها كانت عاوزه ام تكمل تربيتها
تتشابه بعض الحالات او تتناقض ولكن تبقى الام رمز للعطاء والتضيحه والحب وحاجات كتيييييييير

سوف نظل نشاهد حولنا الكثير والكثير من الحالات

محمد سلامة said...

الأم لا شك أنها تحب أولادها
لكن لا تعرف كيف تربى
أو تربي كما تربت
أو أنها بإختصار ليست حنون
وهذه الأخيرة لا حل لها
أحسنتى فى نقل القصص

م م said...

وفي مثل خامس بقا وده اكتشافي
اب بيكون ام
يربي ويأكل ويحمي ويفلي ويطبخ ويغسل ويكوي وفي يوم من الايام بيخاف على عياله من الزمن والفقر
فبيدبحهم وهما نايمين وبعدين يحاول يموت نفسه ومايعرفش
وبعدين يجيبو طليقته تعيط وتقول منه لله
وفي بقى ام بتكون اب بتطرد جوزها من بيته وترمي له هدومه في الشارع
واحيانا بتضربه
مممم هو ايه اللي انا كاتبه ده
ههههه
كل عام وكل الامهات بخير
وتحية خاصة لام الشهيد

م م said...
This comment has been removed by the author.
مدونة الفرسان said...

النموذجان موجودان وبخاصة فى الريف
النموذج الثانى الأم المتسلطة
احترماتى

Gamal Abu El-ezz said...

شكلى إتأخرت كتير فى الرد

الام فى طبعتها الحنان واللطف واللين
ودائما لكا قاعدة شواذ وكون أن هناك أربع أمثله هكذا فى وسط ألوف الأمهات فإنها لا تعد نسبة مطلقا
وتبقى الام دائما هى كهف الحنان الذى نحتمى به من الخطر والحزن والهم
ربنا يبارك لنا فى أمهاتنا
ويرحم من لحقت بربها رحمة واسعه

رحاب صالح said...

والله مش عارفة اقولك اية يا كتورة
بس الحكايات كتير
وللأسف السيء فيها اكتر ...
عموما كل سنة وانت طيبة وعيد ام سعيد
عايزة اقولك حاجة كدة .. تعرفي زمان وانا صغيرة كنت بستغرب ان بعض زملائي وزميلاتي بالمدرسة كانوا بيعاملوا امهاتهم بشكل سيء واحيانا لدرجة الشتيمة الفظيعة ...انا عمري ما عملت كدة الحمد لله لا انا ولا واحدة من اخواتي والي الان الحمد لله يعني ...بس تشوفي المنظر ده تفكري ف نفسك مين السبب في اللي وصلناله ده ...؟ التربية ؟ الاهل ؟ التليفزيون والنت مثلا ..؟ مش عارفة ...؟ بس اعتقد ان التربية هي عامل اساسي ...والا انت اية رأيك...؟

norahaty mo said...

كل عام وانتم كلكم
كلكم كــــــــــــلــكم كلكم
طيبين وبخير وسعادة
وأتفضلـــــــــــــــوا
كل واحد يمد ايده
وياخـــــــــد
واحــــــدة

norahaty mo said...

ولنا لقاء بكرة
بأذن الله
إن
كان فى العمر
بقيـــــــــــــــة

قمر وليل وغيوم said...

السلام عليكم
طبغا لكل قاعده شواذ
وفى امثله على كده بالهبل
اول مثل انتى اتكلمتى عنه مش غريب والله لان فى امهات كتير اوى بتدلع وهى فى الاخر حصدت نتيجه تفكيرها وعمايلها مع بناتهم كفايه اوى انهم نادرا ما بيزوروها
انما المثل التانى بقه صعبان عليا ابن خالتك اوى
دنيا غريبه والله
تحياتى

norahaty mo said...

قمر وليل ونجوم☺
اكيد لأن زى ما بيقولوا
من زرع حصد وزى ما هى
بخلت بحنانها عليهن هن كمان
بخلواعليها بالعطف والحب

momken said...

صباح الخير
وكل عام وكل نساء الكون بخير

انا شايف ان الام هى كا من نلجأ له ونحتاج لهوننتمى له
حتى ان الكون والاجناس تشكلوا من ( امم ) وهى جمع امه ومشتقه من الامومه
وهى ما ننتمى اليه بشكل ما

تحياتى

Post a Comment

قول ولا تجرحـش