Friday, April 16, 2010

صبـــــاح الخير:أنا أنشفطت!


صباح الياسمين
على الناس الحلوين
أهالى بلوجر الغالين
بقى لى شوية كده لا صبحت
ولا مسيت عليكم لمّا أنا حاسة
كأنى كنت مسافرة لحتة بعيدة اوى وأنقطعت
فيها ودا فعلاً حصل أصل أنا انشفطت!!
ايوووة
للفيس بوك
كان هو اول حاجة عرفتها لما عرفت يعنى ايه النت
لكن ما هوتهوش وما حبتهوش
ويمكن كمان كرهته جداً
وبقيت بهرب من حاجة اسمها
الفيس بووووووووووك
مش عارفة ايه اللى رجعنى تانى له وكمان
زى ماأنا كاتبة كده:انشفطت!!
طول الوقت فاتحاه وبتفرج
على الكلام المكتوب عليه
والردود على الكلام
والمداخلات
والتعليقات اللى عليه
زاد وغطى بقى على كل اللى فات
(الفارم فيل)

لعبة بردون برضه(هايفة)لكن

هوًِِتها وحبيتها وبقيت مترددة عليها كل شوية

زراعة وفلاحة وزيادة ونقصان وحساب لزمــان

امتى حأكون موجودة علشان احصد وأمتى مش حأكون

وأزرع نخلة ولا شجرة
وابيع خضار ولا اجيب جرار!

وأبنى عشة ولا ابنى فيلا
ولا أهادى جيرانى واشركهم معايا

فى الصندوق السحرى اللى لقيته

ولا احتفظ به لنفسى

يمكن ينفعنى بعد

كده

بأختصار انا

مشفووووووطة

الى الفيس بوك

والى الفارم فيل

ومش عارفة ارجــع

لكن برضه عارفة أنى

بأذن الله حأرجع وافوت كل دا ورايا

وارجع لعزيزتى وحبيبتى

صعبان على حالنا2

اللى حالها لا يسر عدو ولا حبيب

وبقت عاملة زى بيتنا القديم

له مــــعّزة

(غلاوة يعنى علشان محدش يفهمنى غلط)

اكمل

واقول زى بيتنا القديم له معّزة لكن

ما بنروحه الأ نادرا

إن لم نهجره كليةًً ولا نزوره ابداً

وقبل ما انسى صحيح

اللى زاد وغطى
أن صعبان2والعلم عند

الله

سبحانه وتعالى

حيجى لها الدورأياه برضه زى صعبان 1

بمعنى ان انا أكتشفت ان الموضوع اللى فات

ما اتنشرش

على الريدر بتاع الأصدقاء

ومش عارفة اعمل ايه؟

مش كل يوم بقى حأعمل مدونة

والا حتبقى صعبان السادس عشر

أقولكم

ربنا يستر ويسلم علينا كلنا

يااااااااااااااااااااااااارب

62 comments:

Unknown said...

رَبَّنَا اغْفِرْ لَنَا
ذُنُوبَنَا وَإِسْرَافَنَا
فِي أَمْرِنَا وَثَبِّتْ أَقْدَامَنَا
وَانْصُرْنَا عَلَى الْقَوْمِ الْكَافِرِينَ
اللهم آمين يارب العالمين

عين فى الجنة said...

التدوين افضل من الفيس بووك مافيش كلام
ارجو ان تتخلصى من اسر تلك اللعبة قريبا

Haytham Alsayes said...

السلام عليكم

علي فكرة ااكد اللي قاله راجي التدوين احسن وافضل من الالعاب والفييس بوك علي الاقل بتفيدي الناس بفكرة وتستفادي

وتقرييبا في مشكلة كمان كانت في التعليقات اللي فاتت مكنتش عارف اعلق

تحياتي لكي

Unknown said...

باشمهندس راجى
كلامك مضبوط وعارفاهـ
ربنا يسهل وارررررررع
الى قواعدى سالمة وبسرعة
احتراماتى ياباشمهندس .

salma mohamed said...

صباح الخير يا نور،
أنا زعلانة بجد ان اهل التدوين كلهم
انسحبوا للفيس،
وسابوا ساحة التدوين فاضية رغم انها احسن بكتير،على الاقل افيد

Unknown said...

Haytham Alsayes
وعليكم السلام ورحمة
الله تعالى وبركاتـــه
ربنا يقوينا وتمر المرحلة
دى على خير.المدونة ساعات بتجنن يظهر ياأستاذ هيثم لانى كمان لقيت الريدر بتاع الجيران ثابت على التدوينة بتاعة(العيال
كبرت2)واتجمدبلوجر كل شوية بحال!

Unknown said...

salma mohamed
صباح الفل ياسلمى
نهارك وايامك كلها فل
وبيضا بأذن الله.الفيس بوك متنوع اوى الصراحة ياسلمى
وتلاقى فيه كل حاجة فعلا بيشد
ربنا يلطف بنا وبالناس كلهم
ويستر عليكِ ويشفى كل مريض يارب

richardCatheart said...

صباح الفل والجمال عليكى يانور
انا لسه مابحبش التيس بوك بالرغم ان بقى فى ناس كتير عايزانى بس بستتقله بدخل ابوص واسلم على الناس واخلع فى السريع بس انا معاكى هو مليان هاتبعى حاجات كتير وبسرعه بس بحس انه مافهوش روح صراحه
حتى لعبه المزرعه صحبتى حببتى بتلعبها بس معرفش شايفها وجع دماغ

اما ياجميل فكك من موضوع يظهر البوست الجديد فى العرض عند المدونات الصديقه دا
اللى عايز يتابعك هايدور من غير حاجه
انا ديما باجيلك من عند تيكو فى البلوج واخر بوست ماكنش ظاهر بس دخلت اتاكد ان مافيش حاجه تتقرا ولقيته وقراته واستمتعت ومشيت
ماتغيرش حاجه شكل بلوجر دا انتيخ البخ وغاوى يغلس على خلق الله
وصباحك نادى بطعم الزبادى
تقبلى مرورى

لــــ زهــــــراء ــــولا said...

دكتوه نورا

يا صباح الورد والفل والياسمين على نورا ست كل الحلوين

بالنسبه لموضوع الفيس بوك فى ناس ممكن تقعد بالساعات متواصله عليه ومش فاهمه بيعملوا ايه انا فعلا ليا 2 أكونت وساعات ادخل هناك اشوف اختبارات وشية حاجات كده ع الماشى وكمان ليا اصحاب هناك وممكن نعمل دردشه بس بصراحه انا جاهله برضه فيه ويشاء القدر ان من حوالى 3 ايام حد من اصدقائ لسه مشترك جديد فى الفيس بوك وطلب منى انى اعطى له درس خصوصى فى التعامل معاه شوفتى الهنا اللى انا فيه ههههههههههههههههههه

المهم مش مهم البوستات الجديده تظهر فى الريدر بس بكل بساطه احنا بنشعر بيكى بقلوبنا من غير ريدر

ربنا يوفقك ويكرمك ويحقق لكى كل احلامك فى الحياه
فى انتظار بوستات جديده

زهراء

Dr-Ibrahim said...

بالتوفيق

سمع هوص (Abo 3li) said...

طب مش تبعتيلي حصان ولا شجرة علي الفرم فيل... هههههههههه... انا ربنا تاب عليا منها ... وعوااد بااع ارضه ياولاد..

صعبان 2 بتناديلك... بلاش تسيبيها كده

صيدلانيه طالعه نازله said...

هههههههههههههههه
انا برضه خدت فتره كبيرهكده
لغايه ما عملت اكونت جديد فى الفيس من غير لعب خااااااااااااالص عشان الشيطان ميشفطنيش تانى و انسى مدونتى حبيبتى

ربنا يفك شفطتك يا حبيبتى

محمد خالد said...

لا بلاش الفيس بوك الله يكرمك

انا وهو مش بنحب بعض خالص

أخري عليه اني ادخل اغير الاستيتاس واعمل اي حاجة وخلاص

مش بحبه ابدا

التدوين احسن مليون المية

-----

الموضوع اللي فات كانت التعليقات فيه مقفولة .. مبروك وربنا يتمم بخير يارب

-----

الريدر عندي في الموقع قاري ان حضرتك عملتي بوست جديد

ودايما بيقرأ بانتظام

فكرة من الزمن ده said...

وباء
ههههههه
البوست اللي قبل ده ما ظاهر عندي في الريدر
لكن لاقيته غية حمام وانا قريته عند استاذ وليد
اما بالنسبة لعكننة بلوجر فالمشكلة بتكون في الريدر بمعنى بعض اوقات البوست بيظهر عند ناس وناس لا
فا إطمني
تحياتي

مجرد بنت said...

انا اكتر حاجة اكرها فى حياتى الفيس بوووووووووك ده

شمس النهار said...

ازيك
يارب تكوني بخير

الفيس خفيف مابيحتاجش وقت طويل للمتابعة

وبالنسبة ليا هو عائلي جدا
بناتي واهلي وبس


وربنا يحفظ لك المدونة

ويبارك لك في الفارم
:))

سلامي

الشاعر الفنان أحمد فتحى فؤاد said...

أختنا العزيزة نورهاتى

انا كمان ما حبيت الفيس بوك ابدا

بالنسبة لمدونتك ... هتبقى صعبان السادس عشر .. أو صعبان الألف هنفضل وراكى وراكى

ربنا يديم الأخوة و الصداقة لكل الإخوة و الأصدقاء و
أمين يا رب العالمين

دمتى بخير

rovy said...

حصلى زيك كده بس مش بسبب اللعب ..
الحقيقه ممكن يكون بسبب ان الفيس بوك خلانى متواصله مع أصدقاء دراسه و أصحاب كثير بأحس أنى من خلال الفيس بوك معاهم و هما معايا .. كمان البوست فيه بينتشر اسرع و بيكون فيه مجال أوسع لان يشوفوه أكبر قدر من الناس .. بس برضه البلوج حيفضل بيتى الأول و الحبيب جدا و له طعم تانى متميز ..
المهم أننا نحاول نضبط وقتنا و ندى البلوج حقه و اصدقائنا فيه حقوقهم علينا على قدر الأمكان ..
و منوره دايما يا دكتوره نور سواء الفيس بوك او البلوج .. :)
تحياتى لكى

Anonymous said...

السلام عليكم:
أخرج الإمام الترمذي عن عبد الله بن مسعود رضي الله تعالى عنه قال: قال رسول الله : { لا تزول قدما ابن آدم يوم القيامة من عند الله حتى يسأل عن خمس: عن عمره فيما أفناه؟ وعن شبابه فيم أبلاه؟ وعن ماله من أين اكتسبه وفيم أنفقه؟ وماذا عمل فيما علم؟ }.

وفي رواية للترمذي أيضاً عن أبي هريرة رضي الله تعالى عنه قال: قال رسول الله : { لا تزول قدما عبد حتى يسأل عن أربع، عن عمره فيم أفناه؟ وعن علمه ما فعل فيه؟ وعن ماله من أين اكتسبه وفيم أنفقه؟ وعن جسمه فيم أبلاه؟ }.
حازم

تــركــي الــغــامــدي said...

لا أعلم لذلك سبباً محدداً إلا أنني لم أغرفم بالفيس بوك ... ربما لأنه سبق ذلك معلومات مغلوطة عن هذه الخاصية للتواصل بين البشر ، وبالمقابل تعلقت بالتدوين والمدونين الذين أجد في التواصل معهم راحة نفسية عميقة أيضاً تكونت لدي صداقات محترمة جداً تحنو علي كما أحمل لها نفس الشعور ، وأنت يامدونتنا الموقرة نعدك كذلك ، ربما يكون للممل بعض التأثير عليك أو لأن الفيس بوك به تأثير آخر لايوجد في خاصية التدوين ، وكل ما آمله أن تكون مرتاحة في التدوين وفي الفيس بوك . وأن لك متابعين في التدوين يقدرون حرفك ورؤاك .
تحياتي واحترامي لشخصك الكريم

حصان المرجيحة said...

المشكلة اني مش حابب الفيس بوك ده اصلا
يمكن علشان مش فاهم فيه
هههههههههههه
بس التدوين هدفه اشمل و احسن
ده رايي
يمكن يكون غلط
ربنا يوفقنا للخير دايما

Mostafa Abdelmoneam Badr said...

نووور
أنا فكيت من زينجا وأسره
مرة واحدة كدة
جيت على منشور من منشورات فارم فيل
وكنت متضايق من نفسى ومستخسر الوقت
المهم رحت دايس حظر التطبيق
ومن يوميها ما عرفتش أرجعه تانى
مش راضى أحاول اتعلم ازاى
ربنا يقك أسرك وتحبى اللى ينفعك
وتنفعى اللى بيحبوكى
وأنا من الأوائل
تحياتى

يا مراكبي said...

الفيس بوك شفط الناس كلها مش إنتي بس

وده من قبل الفارم فيل كمان .. واللي هي الحمد لله ما أدمنتهاش ولا دخلتها لسه

الناس لقت في الفيس بوك تفاعل أسرع وتقارب أكتر فيما بينهم أكتر من المدونة الللي التفاعل فيها - نظرا لطبيعتها - بيكون أبطأ بكثير

لكن نرجع ونقول إن المدونات هي الأصل ولازم مهما بعدنا نرجع لها

هراء لا داعى له ..... said...

كتاب الوجه دا محبتوش قد كدا

من وجهة نظرى المدونات أجمل و أفيد


ربنا يفك أسرك من ألعابة العجيبة

د/على خميس said...

السلام عليكم و رحمة الله و بركاته
الأخت الكريمة
انا سمعت كتير على الفارم دى و لقيت ناس كتير وصلوا فيها لدرجة الهوس
بس مش عارف حاسس انها مضيعة للوقت . ولا ايه؟
على العموم احنا منتظرينك قريبا ان شاء الله
بارك الله فيك

Unknown said...

richardCatheart
وصباح الانوار يارتشارد
ماهو انا كنت زيك كده لحد
ما حصل اللى حصل اللى هو ايه
اللى انا كتبت عليه:حبيته
وللأسف سواء الفيس بوك
او لعبة الفارم
بس شدّة وحتزول
بأذن الله
ويهديلنا بلوجر
ويظهر التدوينات اول بأول
ويبطل شغل(الانتخ الانتيخ دا):

Unknown said...

لولا وزهراء
صباح الورود كلها
ماهو انا برضه كنت بقول
زيك كده لكن فعلا هو مليان
كلام وأخد وعطا فى التو واللحظة
بمعنى كأنه(حى)فاهمنى!؟ قولى ربنا يسهل وأشفى منه عن قريب يارب
وتسلملى يازهوووورة يارب
وتفضلى منورانى كده .

Unknown said...

Dr-Ibrahim
شكراً

Unknown said...

سمع هوص (Abo 3li)
عواد باع ارضه!طب
حأبعت الحصان ليه بقى:)
عقبالى عن قريب يارب.

Unknown said...

صيدلانيه طالعه نازله
يعنى تفتكرى الحالة حتطول
ولا سريع ياابو سريع:)؟
ويسمع منك عن قريب
وتتفك عنى الشفطة:)

Unknown said...

محمد
تصدق يامحمد
كان دا هدفى فى
الاول انى أنــشر
التدوينات وكده لكن
بقى تيجى تُصيده يصيدك
وأنشغلت به عن المدونة:(
لكن معلش شوية وارجع أنا عارفة نفسى بفرمل وقت اللزوم
متشكرة يادكتور محمد وربنا يوفقك وينجحك يارب.

Unknown said...

فكرة من الزمن ده
فعلاً دا اصدق تشبية:وباء
ربنا يشيل من علينا كلنا
مش عارفة ايه حكايته الريدر
والمدونة مش متفقين مع بعض ليه؟

Unknown said...

مجرد بنت
نعمة كبيرة
احمدى ربنا عليها
وأدعى الأ تصيبك عدوى حبه:)

Unknown said...

شمووووووسة
حمدلله على السلامة
يارب منورانا دايما
أماالفارم:واه من الفارم والانشغال بيها وفيها مابتخلصش!.

Unknown said...

الشاعر الفنان
أحمد فــتحى فؤاد
ماهو انا كنت مبحبوش
لكن أهى العدوى صابتنى
اعمل ايه بقى:)متشكرة لكلامك
أستاذ أحمد وحمدلله على السلامة .

Unknown said...

rovy
أم يـاسمين العزيزة
ماهو كان دا قصدى فى
البداية لكن لقيتى بتشد
للى فيه:الكلام والمحاورات
والأخد والعطا اللى فيه
وانتِ اللى منورانا
سواء هنا
او فى الفيس بوك

Unknown said...

أستاذ حازم
ومقدرش اقول غير
كلامك صح الصح لانه كلام
الحبيب المصطفى صلى الله عليه
وسلم.ربنا يعافينا ويعفو عنا
ومتشكرة لتذكيرنا بهذا

Unknown said...

تركي الغامدي
التدوين فعلاً فيه تواصل
بين الناس والأفكار
بس الفيس بوك سريع فى التحرك
بالافكار وبالردود بتقول الكلمة وبسرعة يترد عليك بكلمة أخرى دا يمكن اللى حببنى فيه:سرعته
وتسلم يارب
على كلامك الطيب.

Unknown said...

حصـان المرجيحة
ماهو انا لسه مش
فاهمة فيه اوى لحد دلوقتى
تصدق دى؟:)واللهم أمين لدعواتك

Unknown said...

مع أصـرارى
وعزمى وتصميمى
اهلااااااااااااا
عاش من شافك أستاذ مصطفى
ايه الغيبة الطويلة دى ياراجل
ياطيب يارب تكون والأسرة بألف خير وأدعيلى يتفك عنى (سحره)هو والفارم.مرة تانية حمدلله على السلامةيااستاذ مصطفى.

Unknown said...

يـــامراكبى
متدخلهاش ياباشمهندس
احسن أحنا عايزينك وعايزين
قصصك الحلوة ومش عايزينك تنشغل
بالفارم عن التدوين والمدونة.

Unknown said...

هراء لا داعى له
ماهو انا برضه ما حبيته
فى الاول لكن استمرار الحال
من المحال حصل اللى حصل :يحلها ربنا.

Unknown said...

dr aly khamis
وعليكم السلام ورحمة
الله تعالى وبركاتـه
ربنا يستر يادكتور
مانوصلش لدرجة الهوس دى
بس أنا عارفة نفسى بأذن الله حأفرمل حافرمل حافرمل قرررريباً

كلمات من نور said...

فارم فيل؟؟؟؟؟؟؟؟؟؟؟؟؟؟

اخ حتى أنتي يا نورهاتي يا حياتي؟؟

سلامتك ألف سلامه ....أنا عندي 3 من أولادي أصابتهم نفس الأعراض بس زياده عليهم الفيش فيل ومن كام يوم لقيت يحيى ابني -9سنوات- الساعه 6 ونص الصبح وهو نازل رايح المدرسة لأخوه يوسف-7 - : منك لله يوسف خربت بيتي .....أنا قلت أخ يوسف عمل حاجه ليحيى وحيروح المدرسة يتعاقب وباسأل يحيى لقيته بيقولي : أصلي قلتله يحطلي زرع 24 ساعه حطلي 12 ساعه وكده حارجع من المدرسة الاقيه مات ......قلتله داه أنا حاشيل مشاعل زي بتاعة فؤاده كده وامشي في المزارع دي أولعها و أقول : اللعب عالفارم فيل والفيش فيل باطل ...خالص تحياتي يا فتاتي


أسرة منتدى زبد البحر يتمنى منكم التواجد معنا في منتدى عالم المدونيين والمدونات

http://mhg1962.ba7r.org/forum.htm

Unknown said...

مدونة من نور
شفتى ياأم الأولاد
حتى انا اصابتنى العدوى
وما تعيبيش ولا تستعجبيش
أحسن مش كويس:تيجى لك انتى
كمان وقولى ليحيى معلش تتعوض
وقولى ليوسف يبقى يخلى باله المرة القادمة ههههههههههه
وعينيى حاضر اشوف منتدى
زبد البحر لما ارجع من الشغل إن شاء الله

أحــوال الهـوي said...

كنت زيك يا دكتور
لقيت نفسي جاري ورا الفارم و عايز اوصل و ابيع و اشتري متعه
و لما فقت قلت ايه اللي انا باعمله ده
ووقفت كل شئ فقط اود اصحابي و اسال عليهم

بجد مضيعه للوقت بشكل خيالي
الحمد لله الذي عافانا

تحياتي

Unknown said...

دكتورررررر
أحوال الهوى
والهوى أحوال
واقولك بسرعة
قبل ما أنزل
للشغل عقبالنا
يااااااااارب
نورتنا وطمنتنا
عليك ودايماًمنورنا
يارب يارب يارب يارب

الشاعر الفنان أحمد فتحى فؤاد said...

مساء الخير
شفتى أغنيتى الجديدة؟

Anonymous said...

أنا بجد نفسي اعرف ايه المميز في لعبة فارم فيل

أغلب الناس اللى دخلو اللعبة دي اتشفطوا فيها :)

بس ان شاء الله ترجعي لمدونتك وتركزي فيها اكتر

:)

Unknown said...

الشاعر الفنان
أحمد فــتحى فؤاد
شفتها يافنان:
حزينة لكن جميلة

Unknown said...

سمو الأمـير
ماهو لو دخلتها
حتعرف فيها ايه !بس
ابشرك انى قربت أخف منها:)

Heba Faruq said...

ربنا يكون في عونك انت فعلا اخترتي احسن كلمة تعبر عن الحالة "اتشفطت" فحقيقي الكمبيوتر كله بيحسس بالموضوع ده في الأول أقول انا حاقعد حاجة بسيطة والاقي نفسي قعدت ساعات من غير احس
هو فعلا بياكل الوقت
لكن بصراحة انا محبتش قوي الفيس بوك جايز لاني جديدة قوي فيه ومش فاهمة حاجة لكن برضه باحس ان المدونات احسن بكتير
فيارب الموضوع ميخدكيش وتحرمينا من تدويناتك الرائعة التي ننتظرها دائما واللي بيحب مدونتك فعلا وهم كتير بيجوا دايما ومبتفرقش معاهم الرايدر فمتقلقيش

مع تحياتي

مهرة سالم said...

السلام عليكم ورحمة الله وبركاته..
تعرفي يا دكتوره أغلب إلي كلمتهم هو الفيس بوك فيه إيه
بيقولولي شاركنا عشان اللعب
أما كخدمه مش بيستخدموه
...
والله يستر باين بلوجر مزعلك
ما تقوليش حتسايري العصر وتنتقلي إلى وورد بريس
بس مش مهم فين مارحتي نحنا وراكي
.....
دمتِ في حفظ الله

Unknown said...

Heba Faruq
انتى كمان!دا
انا بقول انى بس
اللى كده!يظهر كلنا
فى الهم سواء ربنا يستر (ويعافينا)منه يارب:)
نورتينى ياهبة

Unknown said...

نهــــار
ما هو انااساسا كنت
داخلاه خدمة للمدونة كنت
بلاقى كل واحد وواحدة يقولوا انهم بينشروا التدوينات بتاعتهم على الفيس بوك وهذا بيجيب لهم قراء كتير!ربنا يرحمنا يانهار ويسامحنا ويعافينا منه .آمين.

Unknown said...

الحمد لله رب العالمين.

Emtiaz Zourob said...

واخيرا قدرت اعلق هنا يانورهاتي ..

انت يابنتي لاغية التعليقات ولا المشكلة عندي انا بس ؟؟
بالنسبة للفارم فيل انا كنت زيك مدمنة بس الحمدلله ربنا شفاني ههههه
عموما حبيت امر واقولك كل عام وانت بخير ، ينعاد عليك وعلى الأسرة الكريمة بالخير واليمن والبركات .

Unknown said...

البنفسجة الجميلة
ساعات انا فعلا بقفل
التعليقات اطمنى السبب
مش من عندك :عندى أنا.اما
الفارم فيل فالحمد لله:بقيت احسن شوية
ربنا يكمل الشفاء.

Anonymous said...

aint we all

oppppssss my god

Unknown said...

الغير معرف
شكرا لك

Anonymous said...

اشكر الادمن لقبولى بالمدونه واتمنى ان اكون عند حسن ظن الجميع خالص تقديرى
د/عماد بيومى

Unknown said...

استاذ عماد بيومى
الشكر لله رب العالمين
واسفة للتأخير بالرد

Post a Comment

قول ولا تجرحـش