Monday, May 16, 2011

هل سيكون هناك إضراب؟وووملحق ...






على صبــــاحة


ربنا لاقينا

يافطططططة
قد كده محطوطة فى لوحة الإعلانات ؟

ايه ياجماعة ..

اللى شايف حاجه يقول لنا


قال ممنوع الاضرابات

إضرابات ايه؟؟

!!!!!


وبعدين افتكرت ان

د.حمدى السيد نقيب الاطباء

الراجل ده انا سلمت عليه شخصيآ

اه والله ثلاث مرات

..حتقولوا وايه يعنى..

وبعدين......بلاش نقفل على بعض

القعده لسه فى اولها

المهم الدكتور حمدى

دعا لعمل إضراب عام للأطباء

زى الجماعه بتوع الضرائب العقارية

لما عسكروا بعيالهم وحالهم ومحتالهم

ادام مجلس الشعب

علشان يتساووا فى الحوافز والمكافأت

مع بتوع الضرائب العامه

وكمان الجماعة عمال مصانع

الغزل والنسيج فى المحلة

وعمال مصانع الغزل بتوع كفر الدوار

قبل كده برضه

والاضراب المقصود منه الضغط

على الحكومة لأصدار كادر خاص للأطباء

زى كادر المدرسين اللى بيه بداية التعين

يكون حاطط فى باله السنتين الزيادة


فى الدراسة وطبيعة العمل المختلفه وكل حاجة بقى

ده لو بقى فيه تعيين بعد كده

والبركة فى الجامعات الخاصة اللى غرقتنا خريجين

المهم الإدارة

(والادارة شطاره زى ما بيقولوا)

استبقت الاحداث وسبقت بوضع اليافطة

(امال يتشالوا من على الكراسى وهم مش حاسيين)

المهم بكل صراحة لا اعتقد على الاطلاق

ان موضوع إضراب الاطباء ده حينجح ليه؟

لان نقابتنا من اضعف النقابات فى مصر

وده عامة حال كل النقابات

ماتبصش لحكاية الغزل والنسيج

دى كانت مره ومش حتكرر

الأطباء شأننا كلنا فى مصر

اما فوووووووووووق

يعنى الكبار

(اقصد المبسوطين ماديآ اوى)

مشغولين بالعيادات والاولاد

اللى لازم يطلعوا دكاتره

والشاليه فى مارينا

وحضور المؤتمرات العالمية

صيفآ فى اوروبا

وشتاءاً فى أسوان والأقصر
دول المبسوطين

اما المجموعة التانيه اللى ماشين على قد حالهم

فيدوبك بيدبروها من هنا علشان

تتقطع من الناحيه التانيه

ولأ الناس بتعاملهم بمنطق انهم دكاترة

وبياخدوا قد كده فى كل حاجه

(ابدآ والله)

اما شباب الأطباء

فدول غلابه وخليهم على جنب

امالهم كبيرة ولكن العقبات كثيرة

التخصص -الجواز -الشقه

والـــــ والــــ واللستة لاتنتهى

-ا-انا دمى تقيل النهاردة

وعامله زى هانى رمزى فى مسرحية وجهة نظر

لما كل حاجه يقول عليها ..

لا مفيش فايدة لا مفيش فايدة
المهم انتى حتعملى الاضراب ولا لا ؟

انا عارفة ان ده السؤال اللى بتسال

بصراحه
لألألألألألألألألألألألألألألألأ
اولا الثورات وال حاجات دى بتاعه الشباب مش بتاعتنا

ولو حبيت اجيب لك مثل

عبد الناصركان عنده كام سنه لما قام

مع زملاؤه بالثورة تقريبا 35 سنه

نابليون كان عنده 28 سنه

وتشى جيفارا كان برضة شاب فى العشرينات

ومحدش يسالنى هو انتى

سنك كام احسن ميحصلش طيب

ثانيا لى تجربه سابقة فى حكاية الإضراب عن العمل

والناس اللى حرضوا المجموعة بتاعتنا على كده

تانى يوم لاقينهم موجودين وشغالين عادى

واحنا اللى طلعنا وحشين

اخخخخخخخخخخخ

!!!!كدة برضه عيب!!!!

وتالت حاجة كمان وأهم حاجة

بيجى العيان يسالنى او يقولى

وأنا ذنبى أيه يادكتورة

أنا عايز دوايــا

عــايز عـــلاجى

عــــــــايز حــــــــقى

!!!!!

متهياللى لو أى حد من المضربين

مكانه او هو والده او هى الدته

مش حيقدر يقول لأ مفيش شغل

وعلشان كده ياساده ياكرام

انا شخصياً أول واحدة

مش حاقدر

أعمل لا إضراب ولا يحزنون

ولما نشوف يوم 14 ده حيحصل فيه ايه؟؟؟

وربنا يسهل للخير دايما

============
تدوينة قديمة زى ما هو واضح
كانت برضه عن إضراب الأطباء
بس سنة 2008
صراحة غيرت فيها شوية

لأن الواحد كان لسه جديد

فى دنيا التدوين

وبيقول او بيحكى بطبيعته

المهم ابقى احكى

إن شاء الله

عن اللى حصل يوم

إضراب10-مايو

(الثلاثاء اللى فات يعنى)

واللى حيحصل بكرة كمان بأذن الله


*******
الجيزة


الثلاثاء 17-مايو-2011


الساعة 7صباحاً


(أحب اوثق انا المواضيع)


عايزة معلش أضيف ملحق أو ملحقين للكلام
الملحق الأول انهم سألوا الست المديرة أمبارح
بكرة إضراب يادكتورة؟!
ردت هى بكل ثقة:
بـــــكرة إضراب بس
أنا حأشـــــغل العيادة عادى
لما نشوف كلام مين اللى حيمشى:دا انا اللى بقول دلوقتى
والملحق التانى بعيد عن التلامذة والطلبة كلهم يارب
لو ما رجعتش أو لو ما كملتش الموضوع اعرفوا انتم السبب بقى
لأما أتبطحت لأما أتبطحت برضة

21 comments:

يا مراكبي said...

الحقيقة مش وقت أي اضرابات خالص دلوقت

ولا وقت أي زيادات في الرواتب والمُخصصات

الدولة أصلاً مش لاقية تجيب قمح وغاز

والقطاع الخاص فيه منه ملايين قعدت في البيت

أنا شايف إن الإضرابات دي هتزدينا في داهية بسرعة ومش هتحل حاجة زي ما الناس فاكرة، لوي الدراع ممكن يخلي القيادة توافق على المطالب لكن مش هتعرف تنفذها

ليلى الصباحى.. lolocat said...

السلام عليكم

يارب اخت ى الفاضلة الامور تمر على كل مصر والمصريين بسلام تعبنا من الاعتصامات والاضرابات عايزين نشوف شوية فعل حقيقى


دمك زى السكر فى البوست ده اتكلمى براحتك وبطبيعتك انت خفيفة الظل ماشاء الله ههههههه

اسال الله السلامة والامان والنصر دائما لمصر
لك تحياتى الدائمة

لــــ زهــــــراء ــــولا said...

"
ومحدش يسالنى هو انتى

سنك كام احسن ميحصلش طيب

ثانيا لى تجربه سابقة فى حكاية الإضراب عن العمل

والناس اللى حرضوا المجموعة بتاعتنا على كده

تانى يوم لاقينهم موجودين وشغالين عادى

واحنا اللى طلعنا وحشين
"
هاهاهاهاهااااااااا

زقوكم وطلعوا هما زي الشعرة من العجينة

الاضرابات بقت سمة من سمات بعد 25/1

لولا

Unknown said...

يامراكبى
والله دا رأيى
ومن زمـان مش
المرة دى بس لكن للأسف
فيه ناس(مشعليلانها)بجهالة
ربنا يستر ياباشمهندس

Unknown said...

أم هريرة (lolocat)
وعليكم السلام ورحمة
الله تعالى وبركاتــه
الله يحفظك ويبارك فيكِ
ويعطيكى الصحة والعافية.
آمين لكل دعواتك الطيبة لبلدنا ولجميع بلاد المسلمين أجمعين

Unknown said...

لولا وزهــراء
اهـ يالولا:) شفتى
عمايلهم زقونا وقعدوا هم
وطلعنا احنا الوحشين فى نظر
الكل ربنا يستر علينا جميعاً

Anonymous said...

صباح الخير يادكتوره
اولا واضح انك صلحتى جهازك وبتكتبي بالعربي
ثانيا احيك علي موقفك من الاضراب
ثالثا الاضربات حصلت ومحصلش حاجه والخاسر هو المرضي الغلابه
رابعا حمدى السيد فقد مصدقيته مع جموع الاطباء
خامسا لك ربنا
صبحك فل


onyx

Unknown said...

onyx
صباح النور يافندم
ارد على السررريع
الحمد لله اشتريت
واحد جديد
ديسك توب:)
وخليها حكاية
أحكيها بالتتتتفصيل
بأذن الله لما تسمح الظروف
ايووة صحيح :فيه ملحق للموضوع
لما ما كنتش لسه قريتهم
وصباح الفل مرة تانية

حفيدة عرابى said...

:)
عسولة يادكتورة
وموافقاكِ على رأيك فى الاضرابات عموما واضراب الأطباء خصوصا
هو بس مفيش مانع من تطمينات انهم هيعيدوا هيكلة الاجور داخل بعض المؤسسات علشان يهونوا الحياة على ناس مرتباتهم فعلا مشكلة

سلوى said...

مش وقت الاضرابات خااااااالص

رأيك تمام

مدونة رحلة حياه said...

السلام عليكم
دكتورة ازيك
والله يا دكتورة البلد ما بقت حمل اضرابات ولا غيره
الناس بجد بالشكل اللى بيحصل دا بتاخد البلد وراها لطريق لا يعلم عواقبه الا الله
احنا فى وقت المفروض كلنا نهتم ببلادنا وبشغلنا شوية عشان نعدى مرحلة المخاض على خير
الوقت اللى بلدنا تحتاجنا فيه نعمل اضراب
فعلا فى اوضاع كتير غلط محتاجة تتعدل
بس مينفعش نلاقى واحد بيموت ونلوى ذراعه اكتر عشان ناخد حاجة مش فى ايده اصلا دلوقتى
تقبلى مرورى

Anonymous said...

مستنى الملاحق
ومبروك الديسك توب
عقبالنا يارب لما يبقي عندنا ونعمل مدونه
علي فكره انا لي مدونه بس خاصه لي مش بيدخلها حد

Anonymous said...

السلام عليكم:
تصحيح.
ليس نابليون من قام بالثورة الفرنسية، و انما هو جاء بعد الثورة بحوالي 10 سنوات من الفوضي و القتل و الاغتيالات و انعدام الأمن خصوصا بعد انقلاب من قاموا بالثورة علي أنفسهم، و لم تستطع فرنسا تعويض كل هذا الخراب الا بعد مجيء نابليون و سيطرته علي الحكم بطريقة أكثر ديكتاتورية من الملك (لويس السادس عشر) نفسه، و كل ما فعله نابليون هو الحكم بالحديد و النار لانهاء حالة الفوضي و تسخير البلد لتقوية الجيش الفرنسي ليتصدي لهجمات الدول الغربية المجاورة، و في نفس الوقت يحافظ علي المستعمرات الفرنسية التي استولت عليها الامبراطورية الفرنسية في القرن السابع عشر سواء في العالم القديم و شعوبه(المتخلفة) في أفريقيا و أجزاء من أسيا، و العالم الجديد و شعوبه (البدائية) في أمريكا الشمالية (ما يعرف بالولايات المتحدة و كندا الآن).
الرفاهية التي لا يزال يعيش فيها طبقات عريضة من الشعب الفرنسي الآن راجعة الي استمرار الاحتلال (الاقتصادي السياسي الثقافي) للبلاد المتخلفة و استنزاف ثرواتها حتي الآن، بعد انتهاء الاحتلال العسكري من عشرات السنين، نظرا لكلفته العالية، و ينطبق نفس الكلام علي دول مثل انجلترا، و الولايات المتحدة (المكونة من خليط من الأوروبيون الذين انتقلوا للعيش في أراضي ليست ملكا لهم و أبادوا السكان الأصليين لتلك الأراضي منذ ما يقرب من 250 عاما-مثل الهنود الحمر كان عددهم يقدر بما يزيد عن 60 مليون انسانا لم يتبق منهم الآن بعد ابادتهم تدريجيا سوي حوالي 2.5 مليون، في جريمة لم يسبق لها مثيل في تاريخ البشرية (افناء شعب بأكمله و الاستيلاء علي أرضه و ثرواته)

تري من يطالب بحقوق الهنود الحمر الآن، و برجوع الأروبيون الي أرضهم و تعويض الهنود الحمر الباقين و ترك أمريكا الشمالية و استراليا لسكانها الأصليين؟
هل لو لم يحكم بونابرت فرنسا بالحديد و النار بشكل دموي ديكتاتوري لتخليصها من الفوضي، لكانت هناك دولة تسمي فرنسا الآن؟
هل يمكن ان تتخلي فرنسا عن الاحتلال ( الاقتصادي السياسي) الثقافي لمستعمراتها القديمة، و تكتفي بمواردها فقط؟
يتبع
حازم

Anonymous said...

نسيت توقيعى علي لملاحق


onyx

Anonymous said...

السلام عليكم:
انقلاب ضباط الجيش عام 52 لم يكن هو الثورة و انما الثورة كانت فيما حدث بعد ذلك (تغير ايديلوجي)، التحول من النظام الملكي الي نظام جمهوري، ثم التحول من الرأسمالية المتوحشة الي اشتراكية.
طبعا لا يهمنا كثيرا التحول الأول (من الملكية الي الجمهورية)، حيث ظلت السلطة شبه المطلقة في يد شخص واحد هو الرئيس.
طبعا ما يهمنا هنا هو التحول الي الاشتراكية، و التأميم، و لماذا حدث ذلك، و هل للتأميم شكل واحد، و هل هو ظلم للشرفاء الذين كونوا ثرواتهم في ظل حكومات و نظم فاسدة متعاقبة، و هل كانت تلك النظم تسمح لأي شخص غير فاسد بتكوين تلك الثروات؟ و ما هو نوع العمل الذي يجعل من يمتلك مليونا يصبح لديه عشرة ملايين بعد عام، و من لديه عشرة ملايين يصبح لديه 1000 مليون بعد عشرة أعوام؟
هل كان هؤلاء يعطون العمال لديهم حقوقهم؟ أم أنهم كانوا يستغلون حاجة هؤلاء الي العمل و لا يعطونهم ربع ما يستحقونه، لكي يزيدوا هم ثرواتهم علي حساب مص دم هؤلاء العاملين.
هل كانوا يدفون الضرائب؟
هل كان نظام الضرائب القائم عادل؟
هل لم يستفيدوا من الفساد و لم يقدموا رشاوي لتسهيل أمورهم و زيادة ملايينهم؟
الحساب بأثر رجعي لا يكون فقط للحكومات و لكن يكون أيضا (و هذا هو المهم) لمن استفادوا من فساد تلك الحكومات-حتي لا نكون نحاسب المرتشي و لكننا نترك الراشي و نترك له ما كونه من أموال بعد أن استولي علي شيء ليس من حقه عن طريق المرتشي.
و لأنه من الصعب محاكمة مئات الآلاف من الأشخاص الذين كونوا مئات الملايين و عشرات المليارات في سنوات معدودة في ظل نظام لا يسمح سوي بالسرقة و الرشوة و الاحتكار و الغش و الاستغلال.
مرة أخري أؤكد أن التأميم له أشكال عديدة، و مرة أخري أؤكد أن نسبة من كونوا مئات الملايين و عشرات المليارات بدون الاستفادة من فساد القوانين أو عدم تطبيق الصالح منها أو فساد الظام ككل قد لا تتعدي 1%-و مشكوك أساسا في وجود تلك النسبة- مما يجعل البعض يقول أن هناك شرفاء سيضيعون من جراء التأميم (علي اعتبار أن للتأميم شكل واحد و هذا ما لم يقل به أحد).
و قد يقول البعض أنه يجب أن يظل غني و فقير اعتقادا منهم بأن معني كلمة اشتراكية أو تأميم بأنها تعني أن جميع الناس سيكونون متساويين في كمية الأموال التي يمتلكونها، و هذا ما لم يقل به أحد أيضا، فالتأميم لا يعني ذلك، و انما هو نتيجة طبيعية و رد فعل وقتي لاعادة ما تمت سرقته و التطهير الفعلي من الفساد بأثر رجعي حتي يبدأ الجميع في ظل نظام جديد عادل.
و بدون ذلك فسوف تظل طبقة ال1% تحكم كل شيء و ان تغيرت الوجوه، و ستظل الدولة تقترض من الخارج لتنفذ نفس السياسات التي كانت متبعة لاكمال تدميرها، (فمن يدفع للزمار يفرض عليه اللحن)، و هذا ما كانت تفعله الدول و المؤسسات التي تحتل مصر (اقتصاديا) مع مبارك، و لم يكن يملك الا الاستجابة لهم.
تري هل ستحدث ثورة في مصر أم سيبقي الحال علي ما هو عليه؟ غير أننا لو دققنا النظر قليلا نجد أنه أسوأ كثيرا مما كان عليه قبل 3 أشهر.
حازم

Unknown said...

حفيدة عرابى
دا من ذوقك حبيبتى
والحمد لله متهياللى الكل
دلوقتى اقتنع ان الإضراب
لا فائدة منه الأ(للمستشفيات الخاصة والعيادات الخاصة برضة

Unknown said...

سلوى
شكرا لكِ
وفعلا مش وقته
ابدااااااااااا

Unknown said...

مدونة رحلة حياة
ربنا يهدى الجميع
ويعرفهم ازاى و فين
يخدموا بلادهم بحق وحقيق

Unknown said...

onyx
الملاحق اتحطت
ومنتظرين العنوان
لمدونتك (السرية)جداً

Unknown said...

أستاذ حازم
تعليقاتك دروس
نستفيد منها وسامحنى
فأنا غير متخصصة واكتب
ما هو متداول بين الناس
العاديين.

هبة فاروق said...

بصى فى البدايه عايزه اقولك ان المدونه فيها مشكله وخاصه فى التعليقات بتظهر بصعوبه جدااا واحيانا صفحه بيضا لانى كذا مره ادخل المدونه واحاول أعلق ومعرفش اعلق لصعوبه ظهور صفحه التعليقات ياريت تحلى المشكله دى او لو امكن تظهر التعليقات وراء البوست على طول
ثانيا بقى تعليقى على البوست اوعى تضربى عن العمل لو الدنيا كلها اضربت قولى انتى لا الا الطب وحياه الناس قد يتعرض انسان للموت بسبب عدم وجود طبيب لاسعافه ارجوكى يا دكتوره لانى واجهت تلك المشكله فى العيد عندما تعرضت لمرض شديد ووجدت المستشفيات والاطباء فى اجازه
لا لاضراب الاطباء
تحياتى لك حبيبتى وربنا يكرمك بس انتى تخصصك ايه انا معرفتش

Post a Comment

قول ولا تجرحـش