........رحـــــــــــلة ولا أى رحلة

صدق من قال إن الهم أربع أنواع
هم يبكي ، وهم يضحك ، وهمبورجر ، وهم يا جمل
بس عمرك شفت الأربع أنواع مجتمعين مع بعض ؟
أنا بقى حصلي الأربعة مع بعض في وقت واحد
تخيل دي بقى .. أصلي واد مبخت من يومي ..
كمل الموضوع وإنت تعرف بس إستحملني
شوية علشان حأشرح بالتفصيل اللذيذ
مدينة الإنتاج الإعلامي بمدينة 6 أكتوبر

صرح عملاق يشبه مدينة هوليود الأمريكية
وهو الأكبر في الشرق الأوسط كله

أنا فاكر لما عملوا إكتتاب عام ليها
والكل إشترى أسهمها وحقق أرباح خيالية من وراها ..
ولا الإفتتاح بتاعها كان على الهواء مباشر
والريس نفسه إفتتحها
مسلسلات كتير جداً إتصورت فيها
(تقريباً كل المسلسلات اللي من بعد إنشاءها)
وملحق بالمدينة ملاهي كبيرة إسمها

الماجيك لاند

واللي إشتهرت بعرض الدولفين
واللي بيميزها عن أي مدينة

ملاهي تانية في مصر ..
عمري ما زرتها قبل كده
ولما جاتلي أول فرصة قررت
إني مش أضيعها وقلت لازم أزورها
عرفت إن فيه رحلة تبع الكلية

لمدينة الإنتاج الإعلامي والماجيك لاند
، تمن التذكرة 37 جنيه لطلبة الكلية

و 42 جنيه للي من برا الكلية …
طب حتقولي عرفت منين

إذا كان مفيش إعلانات في الكلية
حأقولك سؤال لولبي ملفوف بس حأجاوب علي
عرفت من صديقي الصدوق الكاشف روح قلبي من جوا
(يا مدلعني وربنا)
وهو عرف من شئون الطلبة
والرحلة على الضيق كده
والمفروض إن الأماكن محددة من قبل ما يقولوا فيه رحلة
وعرفت إنه حاجز لوحده 5 أماكن ..
واحد لذيذ بيفهم زيادة
حيقولي طب حيقعد على 5 كراسي إزاي لوحده
حأقوله لأ يا عم الفهيم ده ليه وللعالم اللي تبعه
يعني بإختصار الرحلة شديدة وجروب ناري ..
عمرو قرر إنه مش حيطلع وبصراحة قلت أحسن
هي مش طالبة خنقة
(يا زين ما عملت يا عمرو)
.. المهم دفعنا الفلوس عداً ونقداً
وبقيت بأعد الأيام والليالي علشان الرحلة الموعودة
قعدت مع نفسي وحددت الحاجات
اللي عاوزها معايا في الرحلة
وكلمت خالد صحبى الأنتيخ
وقولتله أتصرفلى
فى
MP3او حتى MP4
علشان أروش
نفسي
في الرحلة ، ولو تعرف تشوفلي كاميرا ديجيتال
تبقى طحن مع إننا معانا بتاعة الكاشف
بس هي أي رحلة ولا إيه يا ولاد
دي لمدينة الإنتاج الإعلامي
يعني المسلسلات كلها والرحلة حتبقى
مووووووووز موووووووووز مووووووووووز
وقلت أنزل قبل الرحلة بيوم يعني يوم الجمعة
أجيب كوتشي جديد ألينه في الرحلة
وبالمرة أجيب الأكل اللي حناكله
أخدت خالد على العصر كده
وركبنا الناقة التويوتا لطنطا

ولفينا على المحلات لحد ما جبنا جاز
وجبنا حاجات كتير وشايلين أكياس بالهبل
(كله يهون لأجل الماجيك يا جماعة)
.. لأ وكمان رحت إتصرفت في
MP4 وكمان MP3
مرة واحدة من أبوماضي حبيبي
علشان الواحد يعيش حياته بجد ..
ورحت جبت طقم جديد أجربه في الرحلة برضه

جربت كل اللي في المحل
وكله طلع صغير
الطول ده خنقة قوي
جبت بنطلون موديل
Crush
اللي هو متكسر ومش محتاج مكوة
وإتفقت إني أجيب الباقي لما أرجع من الرحلة
على أساس يكون جاب مقاسات كبيرة
الله يخرب بيت المستورد
كله من الصين
على مقاس الصينيين
ومش عاملين
حساب إن فيه عمالقة في مصر
.. وبعدها رحت عند الحلاق
أخدني شعر ودقن وإتروشت آخر روشنة
(دي الماجيك يا جماعة)
رجعت البيت ونمت على الساعة واحدة الصبح
وظبطت الموبايل الجيل الرابع بتاعي
على الساعة 5:30 الفجر
علشان أستعد للرحلة لإن التحرك
من قدام مستشفى مبارك الساعة 7:30 الصبح
.. قمت جهزت السندوشتات


والحاجة الساقعة واللبان لزوم الطريق
لزوم الطريق والسماعات والـ
MP3&MP4
ولبست الحتة اللي على الحبل
وأخدت الحبل معايا إحتياطي
وإنطلقت على بركة الله وعديت على الكاشف
وطلعنا كلنا وركبنا الناقة الميتسوبيشى الميكروباص
على طنطا وإحنا بنتخيل الرحلة باللي فيها
وبنظبط مين يقعد جنب مين في التوتوبيس
وصلنا طنطا سالمين غانمين
وإتمشينا لحد أول شارع مستشفى مبارك
ولمحت توتوبيسين في آخر الشارع
إستحقرت شكلهم وقلت هو دول
اللي حنطلع بيهم ولا إيه
(يا ريتهم كانوا هم)

؟

؟؟؟
وقعدنا نتريق ونضحك على منظرهم
بس لما وصلنا للمكان كانت

المفاجأة الكبرى
؟؟

؟؟؟؟؟؟

؟؟؟؟؟؟؟؟؟؟؟؟؟

؟؟؟؟؟؟؟؟

؟؟؟

؟

ايه اللى حصل

دا اللى حنعرفه

المرة الجاية

أصل التدوينة طويلة

شوووووووووووووووية

واخاف تزهقوا فبأذن

الله

نكملها بكرة

وواضح طبعاً أن التدوينة

منقولة من مدونة تانية

حاقولكم عليها بكرة إن شاء الله