..اشتريت خضار وفراخ ...

اشتريت خضار ووضبته
واشتريت فراخ بانية
وتبلتها وشيلتها
واشتريت
عيش كمان
وشيلته
فى الفريزر
وزى كل مرة
كل ما أعمل كدة
يتداعى الى ذاكرتى
(ولو انى لا أنساها)
ذكرى زميلة عزيزة عليا
اسمها عفاف
كانت اخدت ماجستير الباطنة
على حسابها لكن التامين الصحى عندنا
رفض انه يحطها على درجة اخصائى
الأ لو قضت سنة
(او سنتين مش متذكرة اوى الصراحة)
  نائب فى المستشفى فى قسم الباطنة
المهم عفاف
توكلت على الله وقدمت الطلب
وكانت اول نوبتشية لها
حتوافق اول يوم فى مضان
عفاف كانت ارملة ولها ابن واحد
كان فى الأعدادية
فحضرت اكل يكفى اسبوع
لأبنها ولها لما ترجع
بأعتبار انها حتكون تعبانة
واهوة كله محفوظ فى الثلاجة
راحت النوبتشية وفى وسط الشغل
فجاءة تعبت وحتى ما لحقوش
ينزولوها الأستقبال
كانت روحها
ذهبت الى خالقها
وبسرعة استدعوا
المدير واتصلوا بوالدها
وتمت اجراءات الدفن والجنازة
بسرعة البرق
سبحان الله
اجتمع الزملاء والأهل
والأبن اليتيم من الأم والأب

وفطروا من الأكل اللى كانت
الله يرحمها
محضراهـ
هى بأيدهاالأتنين
ياسبحان الله