بكرة العيد وحنعيّد
وندبحك يا سى السيد
ونحطك فى الاروانة
ونضربك بالخرازنة!
كل سنة وانتم واحنا وهم وهن
بألف مليون خير يارب
أحترت اكتب أيه بالمناسبة
الجميلة دى
لقيتنى بأفتكر أغنية كنا بنقولها
فى بيتنا وحتتنا القديمة زمان
ونفضل نغنيها أدام الخروف
ونغيظه اوى
معتمدين على أنه مربوط
ومش حيعمل لنا حاجة
لكن فى مرة
الحبل ماكنش متين كفاية
والخروف قطعه
وجرى ورانا
وعينكم ما تشوف الا النور بقى
أصطاد واحد من ولاد اخواتى
الصغيرين
ونطحة حتة نطحة
تقولش بيليه فى زمانه
النطحة حدفت الولد 4متر ادام
والحمدلله
جت سليمة شوية كدمات على سجاحات
على ذكرى ما قدرش ينساها ابداً
و بطل بعدها
كتير من الشقاوة ومعاكسة الخرفان
ولما بيشوف خروف لحد دلوقتى
بيحاول ما يقربش منه
من ذكريات العيد الكبير
زى ما كنا متعودين نسميه زمان
برضه
لما الخروف بتاعنا جه له زكام
واشار علينا
(الخبراء)
أن لازم ننفخ فى وشه
(دخان سجاير)
طيب دى مشكلة !
مكانش عندنا حد بيدخن
أو بالأصح بيعترف انه بيدخن
فى الزمن دا لانه كان عيبة كبيرة اوى
..أيه دُنيا
المهم طب نعمل ايه ؟
أم نادية
مدبرة منزلنا ربنا يشفيها ويعافيها ويخليها يارب
مالقتش منه بد
مسكينة جابت علبة سجاير
(ماركة بلمونت الاصلى)
وبقت كل يوم تطلع تدخن فى وش
(حضرته)
سيجارة او سيجارتين
على حسب ما تسمح الظروف
ولحد حضرته
(الخروف)
ما يعطس!
هكذا اشار علينا الخبراء
العلبة كانت قربت نخلص
وحضرة الخروف المحترم
لسه ما بيعطسش!
يادى الوقعة يارب !
بقينا خايفين ان الست هى اللى تحب السجاير
من كتر ما دخنت
لجناب الخروف
وخصوصاً انها بقت تطول فى القعدة فى السطوح
لكن قدر ولطف الحمد لله
الخروف خف قبل ما نبعت نشترى
العلبة التانية
الحمد والشكر لله
ذكريات كتيرة اوى ممكن الواحد يفتكرها
ودا جزءمن الرصيد اللى بتعطيه
الأسرة لأولادها
بعد كده
ذكريات وتجارب وخبرات
يستعين بها الأولاد
فى حياتهم بعد كدهـ
******
معانى الكلمات:
الأروانة:طشت صغير:)
الخرزانة:عصاية رفيعة بتوجع موووت
سجاير بلمونت:ماركةسجاير للناس العادية
بيليه:لاعب كرةبرازيلى ماتقوليش بقى:)
:::::::
تدوينة قديمة
فى صعبان على حالنا
نمر ون
لكنها عزيزة عليا
اوووووووى
وكمان لا بيروح
عليها الزمان ولا بيجى
زى ما بيقولوا
قلت احطها النهاردة
ومرة تانية
كل لحظة وأنتم بألف خير
++++++++++++++++++++++
