Wednesday, October 3, 2012

الإضراب: و اللى حصل أمبارح؟


أنا حاحكى بأختصار اللى
حصل أمبارح لما رجعت الشغل
لأنى كنت أجـــ10ــازة ايام بسبب الضيوف الغالين

المهم رحت وانا ناسية خالص حكاية الإضراب
وحضرت الدفاترولبست البالطوعادى وحأبدأ بقى

(الكومبيوتر طبعا باظ بعد الفلوس اللى اتصرفت على الشبكة وووو)

لقيت الموظف بتاع التسجيل بيسألنى
هو حضرتك حتشتغلى
قلتله طبعا اومال انا جاية ليه؟
قال طب والإضراب؟
انا لسه بستفهم منه
لقيت قنبلة بشرية متحركة داخلة عليا
دكتور باطنة
(مفيش بنا صداقة لكن زمالة الشغل ياعنى)
اييييييييييييييييه دا انتى حتشتغلى
لا مش ممكن ابدا لازم كلنا نبقى ايد واحدة
لازم تبقى كلمتنا واحدة
طيب والعيانين ذنبهم ايه؟
(دا أنا اللى بقول)
ملناش دعوووووووة
!كده انتى حتبقى بره المجموع العام
!كده حيتكتب اسمك ويروح النقابة
كده مش عارفة ايه ؟ومش مدرك ايه؟
المهم اللى زود المشكلة كمان
امبارح كان عندنا فى الشغل حادث وفاة
زميل من الإداريين وجه أتوبيس كبيرلأجل
العزا وكل الأداريين بلا استثناء
وكمان الحكيمات والمدير
ررررررراحوا
وسابوا
الدنيا تتفلق
!!!
مش حأكذب عليكم
لقيت كدا القعاد خطر
انت متعرفش فى الظروف دى ممكن يحصل ايه؟
عملت أيه؟
قفلت النور والباب وأنتظرت مرور الوقت
عدووووكم كان حجر مش عاوز يمر
نسيت اقول أن السادة الزملاء
المتعاقدين مش متعينين اشتغلوا عادى
ومحدش فيهم قدر يقول لأ
ولا يقول فترتى 20حالة وبس اشتغلوا كل المرضى الموجودين
لييييييييييييييييييه؟
لأن الكـــــــــــــــــل
خايف على العقد والفترة بتاعته كمان
ياعنى الحمد لله مفيش مريض
مشى من غير ما يخلص مصلحته
طيب انا اتصرف ازاى؟
عملت عارضة للنهاردة
ولما نشوف بكرة حيحصل ايه؟
ربنا يستر




 

16 comments:

Mahmood البطراوى said...

يا دكتوره الاضراب المره دى مش انك متشتغليش
الاضراب ان حضرتك تشتغلى عادى بس مجانا بدون تذاكر والعلاج يتكتب من بره والاشعه من برا واى حاجه من برا
الكشف مجانى 100%

ظلالي البيضاء said...

الله يفرجها ويصلح أحوالها ..
مصر غالية جداً .. ربي يحفظها ..
مع التحية الطيبة ..

norahaty said...

Mahmood البطراوى
بجد!
مين قال كده؟

norahaty said...

ظلالي البيضاء
اللهم آمـــــين
يارب العـــــالمين
ويحفظ سوريا وكل بلاد المسلمين

شهد الملكات said...

ربنا معاكى يا دكتورة
و ياريت تشاركى فى الاضراب و انتى مقتنعه ان مفيش مريض هيتضرر لان ده اضراب سلمى و كمان مطالبه بتصب فى النهايه فى مصلحة المريض
ربنا يوفقك

norahaty said...

شهد الملكات
اهلااااااااااا
وحمدلله على السلامة
بصراحة مش مقتنعة بيه
لكن المضطر بقى حنعمل ايه؟

لـــولا وزهـــراء said...

ربنا يصلح الاحوال ويسترها على مصر ويكتبلها الخير

مش عارفة حقيقة تعليق الاخ البطراوي


لولا

norahaty said...

لولا وزهرة
يارب يالولا يارب
وتبقى بلدنا أحسن البلاد

momken said...

.....

بصى بقى بالنسبه لموضوع الاضراب

الدكتوره منى مينا برغم انى اعرفها من ايام الثوره والميدان
الا انها اتحولت بعد كده
غريب جدا ان وحده ثائره تهدد الى ميشاركش فى الاضراب الويل والثبور وعظائم الامور

الاضراب صوره من صور الحريه ازاى النقابه تستغله وتجعله اجبار وارهاب
والى مينضمش للاضراب هيحصل فيه كذا وكذا
الحجات دى جعلت من الاضراب رغم طهاره مقصده للتاثير على الحكومه لزياده ميزانيه الصحه
وتوفير الخدمات والامن بالمستشفيات
الا ان سؤ تصرف البعض وتحولهم الغريب فقد الاضراب قدسيته وطهارته

......
عاااااارضه

طول عمرك ثوريه وصاحبه مواقف يا دكتور


نهارك جميل

.....

norahaty said...

momken
الأيام بتغير الإنسان ياممكن
ما انت عارف !والثورة وما
بعدها اظهرت ناس كتير عكس
ما كنت انت متصورهم

Anonymous said...

-مش مطلوب اضراب في قطاعات مختلفة من البلد.
-مطلوب عصيان مدني في جميع القطاعات لتحقيق شيئين.
1-الربط بين الحد الأدني و الأعلي للأجور في جميع قطاعات الدولة بحيث لا يزيد أجر أكبر وزير أو محافظ عن أقل عامل في القطاع الحكومي أو الخاص ب 10 أضعاف.
تلك النسبة مطبقة في معظم بلدان العالم التي تحترم مواطنيها.
2-العمل بنظام الضرائب التصاعدية بحيث يدفع أصحاب الدخول المرتفعة ضرائب تصل الي 60% أو 70% من صافي الربح (في الولايات المتحدة بعد الحرب العالمية الثانية كانت نسبة الضرائب التصاعدية تصل الي 90% علي أصحاب الدخول المرتفعة، و هي الآن تصل الي 46% بعد استقرار الأوضاع نسبيا، و لا أظن أن حال فقراء مصر اليوم أفضل من حال فقراء أمريكا بعد الحرب العالمية الثانية).
3-وجود شفافية تامة في توضيح جميع البيانات لجميع أبناء الشعب بدءا من رواتب الوزراء و المحافظين و أعضاء المجالس النيابية و كبار المسؤلين، وصولا الي كمية الأموال التي ستجمعها الحكومة من دافعي الضرائب و الي كيفية انفاقها و أوجه الانفاق.
----------------------------------
-بالبلدي كده:
-ان حد يكون مرتبه 1000 جنيه في الشهر و حد تاني في نفس الدولة مرتبه 100000 جنيه في الشهر ده يبقي اسمه تهريج.
-ان اللي دخله السنوي 40 ألف جنيه يدفع نفس نسبة الضرايب اللي بيدفعها اللي دخله 400 ألف أو 4 مليون أو 400 مليون (محدش يستغرب علشان حديد عز حققت السنة اللي فاتت أرباح 950 مليون) ده يبقي اسمه قمة التهريج.
-و ان الناس في أي مجتمع يسكتوا علي الأوضاع دي...ده يبقي اسمه استمراء للعبودية.
----------------------------------
حازم

norahaty said...

استاذ حازم
الف أهلا وسهلا
ودا والله اللى أنا بطلبه
ربط الحد الأعلى ب(كذا ضعف)من
الحدالأدنى للأجور.عصيان مدنى؟
تفتكر حد او اهل بلدنا حيجتموا عليه
تفتكر؟عدم الأجماع على شىء
كما وان عدم حب الطوابير
آفتان من آفات ناس بلدنا

Tamer Nabil Moussa said...

السلام عليكم


ادعوكى لحضور حفل توقيع ديوانى الاول

يسعدنى حضورك

التفاصيل فى المدونة عندى

مع خالص تحياتى

norahaty said...

Tamer Nabil Moussa
وعليكم السلام يااستاذ تامر
الف مبروك وربنا يوفقك عقبال
ما تعزمنا على توقيع كتابك الثانى
بعد الألف الثانية بأذن الله.موفق إن شاء الله

شهد الملكات said...

norahaty
تعليقا على كلام حضرتك و كلام استاذ
حازم
الاضراب مش بس لزيادة اجور الاطباء اللى بالمناسبة فى المستشفى عندنا بيقبضوا اقل من التمريض و الفنيين و الكيميائيين
لكن الاضراب كمان لتحسين وضع مستشفيات وزارة الصحة اللى لو انا او حد غالى عليا تعب عمرى ما اخليه يتحجز فى مستشى عام علشان ينام جنب القطة على سرير واحد و الحشرات تمشى على اكله و عليه و ما يلاقيش العلاج المظبوط
احنا احيانا كنا بنبعت اهل العيان فى الاستقبال يشتروا كانيولا لابنهم واحيانا خيط جراحه
عمر العيانين اتخانقوا معاكى و ضربوكى او كانوا هيضربوكى؟
عمر عيانين فى خناقهم زقوا بعض عليكى وحاولتى تخرجى من المكان ما عرفتيش و مفيش امن فى المكان يحميكى
عمر واحد مسك مطوه و قرر ياخدك معاه لحد ما توصلى المريض اللى معاه الرعايه او توصلى الطفل للحضانه و يا عالم هيرجعك بعد كده و لا لا؟
انا مع الاضراب لانه مش بيضر حد من العيانين لكن بيضر جيب حيتان الوزارة
لو عايزه تعرفى اكتر عن الاضراب ادخلى على صفحة اطباء بلا حقوق على الفيس بوك

اسفه للاطاله

norahaty said...

شهد الملكات
انا معاكى فى كل كلامك
المشاكل كثيرة اوى ومتعددة
الأطراف دماغى ساعات بتوجعنى
لما بفكر فيها وبختار
نبتدى بأى منها

Post a Comment

قول ولا تجرحـش