....زى النــهاردة مـــن ســـنة ويـــوم....

نص الخطاب الأخير
للرئيس التونسى السابق
زين العــــــــــــابدين بن على
!!قبل يوم واحد من مغادرته تونس

******
بسم الله الرحمن الرحيم
أيها الشعب التونسي
نكلمكم اليوم
ونكلمكم لكل في تونس
وخارج تونس نكلمكم لغة
كل التونسيين والتونسيات
نكلمكم لان الوضع يفرض
تغيير عميق.. تغيير عميق وشامل
وأنا فهمتكم فهمت الجميع
البطال والمحتاج والسياسي
واللي طالب مزيد من الحريات
فهمتكم فهمتكم الكل لكن الاحداث
اللي جارية اليوم في بلادنا
ما هيش متاعنا والتخريب
ما هوش من عادات التونسي
التونسي المتحضر، التونسي المتسامح
العنف ما هوش متاعنا ولا هو من سلوكنا
ولا بد أن يتوقف التيار
يتوقف بتكاتف جهود الجميع
أحزاب سياسية، منظمات وطنية
مجتمع مدني ، مثقفين ومواطنين
اليد في اليد من أجل بلادنا
اليد في اليد من أجل أمان كل أولادنا
سيكون التغيير اللي أعلن عليه الآن
أستجابة لمطالبكم اللي تفاعلنا معاها
وتألمنا لما حدث شديد الألم
حزني وألمي كبيران
لأني مضيت أكثر من 50 سنة
من عمري في خدمة تونس
في مختلف المواقع من الجيش الوطني
الى المسؤوليات المختلفة
و23 سنة على رأس الدولة
كل يوم من حياتي كان ومازال لخدمة البلاد
وقدمت التضحيات
- وما نحبش نعددها -
ولم أقبل يوما «وما نقبلش» باش
تسيل قطرة دم واحدة من دماء التونسيين
تألمنا لسقوط ضحايا وتضرر أشخاص
وأنا نرفض أن يسقط المزيد
بسبب تواصل العنف والنهب
أولادنا اليوم في الدار، وموش في المدرسة
وهذا حرام وعيب لان أصبحنا
خائفين عليهم من عنف مجموعات
سطو ونهب واعتداء على الاشخاص
وهذا اجرام موش احتجاج وهذا حرام
والمواطنين ،كل المواطنين
لا بد أن يقفوا أمامهم، وأحنا أعطينا
التعليمات ونعول على تعاون الجميع
حتى نفرق بين هذه العصابات
والمجموعات من المنحرفين الذين يستغلون الظرف
، وبين الاحتجاجات السلمية المشروعة التي لا نرى فيها مانعا
وأسفي كبير، كبير جدا
وعميق جدا، وعميق جدا
فكفى عنفا كفى عنفا
وعطيت التعليمات كذلك لوزير الداخلية
وكررت، واليوم نؤكد يزي
من اللجوء للكرطوش الحي
الكرطوش موش مقبول
ما عندوش مبرر الا لا قدر الله حد
يحاول يفك سلاحك ويهجم عليك بالنار وغيرها
ويجبرك على الدفاع عن النفس
وأطلب من اللجنة المستقله، أكرر المستقله
التي ستحقق في الاحداث والتجاوزات
والوفيات المأسوف عليها تحديد مسؤوليات كل الاطراف
كل الاطراف بدون استثناء
بكل انصاف ونزاهة وموضوعية
ونستنى من كل تونسي
اللي يساندنا واللي ما يساندناش
باش يدعم الجهود، جهود التهدئة
والتخلي عن العنف والتخريب والافساد
فالاصلاح لازمو الهدوء
والاحداث اللي شفناها كانت في منطلقها
احتجاج على أوضاع اجتماعية
كنا عملنا جهود كبيرة لمعالجتها
ولكن مازال أمامنا مجهود أكبر لتدارك النقائص
ولازم نعطي لانفسنا جميعا الفرصة والوقت
باش تتجسم كل الاجراءات الهامة التي اتخذناها
وزيادة على هذا كلفت الحكومة
باش نقوم بتخفيض في أسعار المواد
والمرافق الاساسية والرفع في ميزانية التعويض
أما المطالب السياسية
«وقلتلكم أنا فهمتكم»
وقررت
الحرية الكاملة للاعلام بكل وسائلو
وعدم غلق مواقع الانترنات
ورفض أي شكل من أشكال الرقابة عليها
مع الحرص على احترام أخلاقياتنا ومبادئ المهنة الاعلامية
أما بالنسبة للجنة اللي أعلنت عليها
منذ يومين للنظر في ظواهر الفساد
والرشوة وأخطاء المسؤولين
وباش تكون هذه اللجنة مستقلة
«نعم باش تكون مستقلة»
وسنحرص على نزاهتها وانصافها
والمجال مفتوح من اليوم
لحرية التعبير السياسي
بما في ذلك التظاهر السلمي
التظاهر السلمي المؤطر والمنظم
التظاهر الحضاري
فلا بأس حزب أو منظمة
يريد تنظيم تظاهرة سلمية
يتفضل، لكن يعلم بيها
ويحدد وقتها ومكانها ويؤطرها
ويتعاون مع الاطراف المسؤولة
للمحافظة على طابعها السلمي
ونحب نأكد أن العديد من الامور
لم تجر كيما حبيتها تكون
وخصوصا في مجالي الديمقراطية والحريات
وغلطوني أحيانا بحجب الحقائق وسيحاسبون
ولذا أجدد لكم، وبكل وضوح
راني باش نعمل على دعم الديمقراطية
وتفعيل التعددية، نعم على دعم الديمقراطية وتفعيل التعددية
وسأعمل على صون دستور البلاد واحترامه
ونحب نكرر هنا وخلافا لما ادعاه البعض
أني تعهدت يوم السابع من نوفمبر
بأن لا رئاسة مدى الحياة
لا رئاسة مدى الحياة،
ولذلك فإني أجدد الشكر
لكل من ناشدني للترشح
لسنة 2014
ولكني أرفض المساس بشرط السن
للترشح لرئاسة الجمهورية
اننا نريد بلوغ سنة 2014 في
اطار وفاق مدني فعلي وجو
من الحوار الوطني وبمشاركة
الاطراف الوطنية في المسؤوليات
تونس بلادنا الكل
تونس نحبوها وكل شعبها يحبها
ويلزم نصونها، فلتبق ارادة شعبها
بين أيديه وبين الايادي الامينة
التي سيختارها لتواصل المسيرة
المسيرة التي انطلقت منذ الاستقلال
والتي واصلناها منذ سنة 1987
ولهذا سنكون لجنة وطنية تترأسها
شخصية وطنية مستقلة لها المصداقية
لدى كل الاطراف السياسية والاجتماعية
للنظر في مراجعة المجلة الانتخابية
ومجلة الصحافة وقانون الجمعيات
وتقترح اللجنة التصورات المرحلية اللازمة
حتى انتخابات سنة 2014 بما في ذلك
امكانية فصل الانتخابات التشريعية عن الانتخابات الرئاسية
ـ تونس لنا جميعا فلنحافظ عليها جميعا
ومستقبلها بين ايدينا فلنؤمنه جميعا وكل واحد منا
مسؤول من موقعه على اعادة أمنها واستقرارها
وترميم جراحها والدخول بها
في مرحلة جديدة تؤهلها أكثر لمستقبل أفضل
عاشت تونس عاش شعبها عاشت الجمهورية
والسلام عليكم ورحمة الله وبركاته
*******