Wednesday, September 7, 2011

........جـــــهــــاز الضغط:برطمان العسل السايح النايح


جهاز الضغط من الاساسيات

للكشف على المريض


له معى حكايات وروايات


وبسببه اتحولت للشئون القانونية


للتحقيق واخدت الجزاء الوحيد


!!!والله فى حياتى الوظيفية :


خصم يوم من المرتب ...


-مظلوم يابيه-


المهم انا اسميه المغناطيس


واحيانآ برطمان العسل


واحيانا ال.... عيب ما اقدرش اكتبها


ليه لانى اتحدى اى مريض


لأ مش اى مريض لكن اى انسان عادى


يفوت عليه وما يريد يقيس الضغط


تقولش ياخويا احنا كملنا الاوصاف


فى كل مجالات حياتنا ومشينا على الصراط المستقيم


فى اكلنا وشربنا وعوايدنا التانية


وبالتالى لازم نقيس ضغطنا كل شوية للاطمئنان عليه.


واحد حيقولى ماتقيسى انت وراكى ايه؟


بس شاطرة تقولى بتشتغلى مش عارف كل يوم كام حالة!!!


والله ما مشكلة القياس لكن انا بشر برضة


ولما اكون بكشف على 40-60عيان كل يوم


مش ممكن الــــــ60دول كلهم عندهم ضغط


وكلهم لازم يقيسوا الحكاية ساعات بتزيد عن حدها


وودانى بتبقى زى النار من السماعة


من طول الوقت اللى محطوطة فيها


وكمان العيان يقعد يتحايل قيسى لى الضغط


والمهم بعد ما يقيس له وتقوله مثلآ140/80


يبص لك كده ويرفع حاجب وينزل التانى


ويقولك امال الدكتور فلان قاسه لى وقال 145/85


امتى ياسيدى؟ دلوقتى؟امال ايه اللى جابك تقيسه تانى؟


عايز اتأكد!!!فيها حاجة دى!!!

تعمل ايه فيه ده........بالضبط كده


بس مش ممكن للاسف اصلى بتكسف .


وبرضةما يمنع واحد من المرافقين للمريض


(قيسلنا بالمرة الهى ماتتحرمى من نضرك ياضكتورة)


وواحد يجر التانى وممكن التالت كمان


ولو قلت لأ تسمع طبعآ مصمصة الشفايف


وتشوف لوية البوز التمام وهو ما فيش حاجة لله ابدآ


واحد حيقول ماتجيبى الجهاز اللى زى الساعة


ولو على حسابك لو تعبانة اوى كده من السماعة


حاأقول ما هو مش مضبوط زى الزئبقى ابدآ


او يمكن انا اللى موضة قديمة


واللى اتعودت عليه هو ده


ومش سهل الواحد يغير عوايده .


طبعآ كمان الزميلات الحوامل من ساعة


ما يعرفوا ويمكن من قبل ما يعرفوا بالخبر السعيد


معلش يادكتورة ممكن تقيسيلى الضغط؟


وليه ياستى؟ اصلى دااااااايخة شوية!!!


الجمله دى ممكن تتكرركل يوم


لوممكن لحد الست ما


(توضّع بالسلامة)


وقيس على كده الزملاء المخطوبين

اول الواحد فيهم مايقول تعبان التانى يجيبه جرى


معلش والنبى يادكتورة ممكن تقيسيى


له الضغط بيقول تعباااااان!!طيب


ما هو ممكن من العشر سندوتشات


فول اللى فطر بيهم مثلا.......!!!


او البادنجان المخلل اللى فتحت


نفسها به على الفطار......!!!


وطبعاً الاقارب والزوار بتوع الموظفين


الاداريين والجماعة بتوع الحسابات


والا حيغلطوا فى كشف المرتبات واستنى بقى يادكتورة........


(وخللى بالك من استنى دى)


لما يتعمل لك شيك بالمبلغ الناقص


طبعآ فى مواسم الامتحانات


بتاعة العيال ونتايج المدارس والشهادات


وخصوصآ الشهادة الماحقة الفتاكة


لقهارة المسماة الثانوية العامة


القياس فيها بيبقى للركب وكل عيل


خايب سقطان تيجى الست الوالدة منهارة


تانى يوم ومعيطة ومبكررة عينها اد كده


وقيسى لى الضغط عندى صداع


ماهولازم ياستى يجى لك الصداع بعد العياط ده كله


...لأ ابدآ مش معيطه ولا حاجة!!


وحاجات كتير من ده الواحد بيقابلها كل يوم


ولو الواحد قعد يحكى من هنا لبكرة


على عجائب البشر ما حيخلص


اما التحقيق الوحيد والجزاءالوحيد


فده حكاية تانية احكيها بعدين


علشان ما أطول والناس تزهق مننا


والناس مش ناقصة زهقان :الحر والغلاء مكفينهم


.........................................................

البوست المرة دى من وحى

الحياة اليومية فى العيادة
وكمان من وحى بوست

يمكن قديم شويه فى مدونة صديقة

كنت قرأته من مدة لكن

لم انساه ابدآ لانه فعلا بيصور

العلاقة بين الطبيب والمريض

(وخاصة المريض المصرى )

بمنتهى الاتقان

=============
تدوينة قديمة
اووووووووى
ولــكن برضه أحبها
اووووووووووووووى


12 comments:

شمس النهار said...

ضحتيني يادكتورة

المصريين فعلا من هواة قياس الضغط

:))
كل سنة وانتي طيبة وبخير وسعادة

Unknown said...

شموووسة
وانتى بالف صحة
وسلامة يارب واقولك
ربنا يعينى ويشفى كل
مريض.

سلوى said...

:) يمكن زياده اطمئنان
ويمكن عشان الفيسيتا اللي احيانا بتكون فلكيه
اذا فلازم المريض ياخد حقه في الكشف بالتماااااااااام

هى المشكله فعلا في انسان مش تعبان ولا حاسس بأي اعراض لارتفاع او انخفاض الضغط وبيبقى عايز يقيسه برضو
لانه حاجه ببلاش كده :)

ربنا يقويكى دكتور ويشفى مرضانا ومرضى المسلمين

Unknown said...

ســـــلوى
اللهم أمين.فعلا
المشكلة فى اللى
(حاجة ببلاش كدا)مجننانى

تــركــي الــغــامــدي said...

تحياتي لشخصك الكريم ... أولاً أسأل الله تعالى أن يمن بالشفاء على كل مريض وأن يوفقك لمداواة مرضاك بمايحقق لهم الشفاء بإذن الله تعالى .
موضوع شيق يصور مواقف ملاحظة عن قرب .

Unknown said...

تركى الغامدى
جزاكم الله خيرا
على دعاءكم الكريم
وجعل الله لكم ولنا نصيبا
فيه

Emtiaz Zourob said...

مش بس المصريين من هواة قياس الضغط برضه الفلسطينيين هيك ..
في عندنا في بيت اهلي جهاز مثله بالضبط ، وذلك علشان كنا نقيس الضغط باستمرار لامي المريضة وكان زي الموضة او ما نطلعه الكل بده يقيس ضغطه ، عيان مش عيان المهم بده يقيس ,, ونقعد ساعة نقيس بالدور لكل المتواجدين من اعمامي واخوالي وجيراني واخواني واخواتي واولادهم وبناتهم ومانخلصش خالص طول اليوم .. ذكرتيني بالذي مضى ، الله يرحمك يا امي ويرحم جهاز الضغط ؟؟ مابعرف شو اخباره هاليومين بعد مغادرتي لبيت اهلي لبيت الزوجية .. ولكني ارتحت من هالشغلانة ..

الله يعينك بس طولي بالك ، والله بيستاهل التعب دعوة حلوة من مريض او حتى عابر طريق .. اتعبي شوية وخذي دعوات ، مافي احلى من عمل الخير ..

ويكا said...

هههههههههههههه

Unknown said...

البنفسج الجميل
يعنى انتى أهوه
عانيتى من نفس المشكلة
وعذرانى فى الموضوع دا:اقولك
ايه ربنا يشفى كل مريض.

Unknown said...

ويـكا
نورتنا:)

Khaled Selim said...

ممتع السرد ده .. حلو الكلام وربنا يكون في العون

Unknown said...

Khaled Selim
أكيد أنت
بتشوف من كل
اللى أنا حكيته دا
الحال من بعضه كما أعتقد
ونورتنا يادكتور خالد
فى أول زيارة للمدونة

Post a Comment

قول ولا تجرحـش