عنداً فى حكومتنا الإليكترونية
المـــنورة المـــــــوقرة
واللى ما ادتنــاش
يوم أجــــــــــازة
بدال 23يوليو
واللى ما ادتنــاش
يوم أجــــــــــازة
بدال 23يوليو
اللى راح
علينـا
علينـا
أونطة
آلــ أيه؟
آلــ أيه؟
علشان جه
يوم جمــعة
ياسلاااااااااااااام
كانوا جابوه يوم السبت مثلاً
هى دى صعبة عليهم
مش هم الحكومة
المهم عنّدا فيها
المهم عنّدا فيها
(الحكومة يعنى )
أخذت اربع ايام إعتيادى
من يوم السبت اللى فات
أخذت اربع ايام إعتيادى
من يوم السبت اللى فات
لحد النهاردة
بـــــس
وأهـ من بس دى
ايه الفايدة اهم
فاتووووووا
ايه الفايدة اهم
فاتووووووا
لأ لأ لأ
مش فاتوااا
طااااااااروا
هواااااا
ومروااااااااا
مرور السحاب
ومروااااااااا
مرور السحاب
وبكرة راااااااجعة الشغل
حــــــــــدفاً
كتير بأحس
وكأنى لم أتغير
فى الناحية دى بالذات
عن وقت ما كنت فى
المدرسة وكان برضه بيجيلى
الشعور دا وكانت ليلة الجمعة دى
او أخر ليلة فى الأجازة الصيفية
أو أجازة نص السنة
كانت
بتبقى ليلة
كحلى غاااااااامق
(كنت بهرى نفسى عياط )
ولمّا بحس بكده
دلوقتى
بفكر كتير
مخدش اجازة
وأوفر الزعل
على نفسى
لكن كل مرة بأنسى
30 comments:
ربنا أغفر لنا ذنوبنا
وإسرافنا فى أمرنا وثبت
أقدامنا وأنصرنا
على القوم الظالمين
دكتوره نورا
ويلكم باك اكيد الشغل اللى بيقول كده مش انا
ياترى فى ايام الاجازه دى عملتى ايه روحتى فين ده مش سؤال مطلوب الاجابه عليه لكن انتى عارفه اننا مش بنعرف نتمتع بالاجازه عشان كده بنكون راجعين الشغل وكأننا مش اخدنا اى راحه
بره فى اوروبا والدول المتقدمه بيعرفوا يستغلوا كل دقيقه اجازه بجد
كل اجازه وانتى بخير وسعاده
كل سنه وانتى طيبه بمناسبة قرب حلول شهر رمضان المعظم
زهــــــــراء
كل اجازه اعتياديه وانتى طيبه
ويارب تكونى قضتى اربعه ايام ممتعين وعلى الاقل ريحتى دماغك شويه من دربكة الشغل ووجع القلب
كل سنه وانتى طيبه
ورمضان كريم
دمتى فى حفظ الرحمن
لشغلك ميزة جميلة، ناس كتير ممكن يتمنوها... وهي إنك بتتاح لك فرصة لتخفيف آلام ناس كتير... سواء البدنية منها أو النفسية، لأن فيه ناس كتير بترتاح نفسيا بمجرد زيارتهم للطبيب... ده طبعا غير إن إختفاء الألم أو تخفيفه، في أحيان كتير بيجلب بسمة لوجوه كتيرة، كتير منها كانت محرومة منها لزمن... فكري في ده، ومين يعرف، ممكن يقلل إحساسك بمرارة الرجوع للشغل بعد الأجازة.
إنما يعني إيه "إعتيادي"؟ أعرف إن عارض أو عارضة بتعني ظرف طارئ... إنما إه إعتيادي دي؟
لولا وزهراء
مكذبش عليكِ يازهرة
كان فيه واجبات أجتماعية
وزيارات عائلية لأبد منهاوبالتالى
زى ما بتقولى كده ما حسيت بالأجازة
او أى تغير فيها لكن الحمد لله على
كل شىء.نورتينى يازهرة وسلامى للولا
الحب الجميل
ول لحظة وأنتِ بألف خير
يارب هو الحمد لله بعدت عن
دربكة الشغل أهـ لكن الحمد لله
دربكة الضيوف بالبيت مستمرة وموجودة:)الصيف والأجازات
زى ما أنتِ عارفة:)
Hina wi Hinak
كلامك مضبوط وجميل بس
ساعات بتزهق وتصعب عليك
نفسك من سماع الشكوى فقط
ولا شىء غيرها ومن (الصويت والصريخ)اللى بيقابلوك على الصبح من باب العيادة أو المستشفى حتقولى قولى الحمد لله الذى عافنا مما أبتلى به قوم أخرين حأقولك بقول والله لكن أعتبرها فضفضة للأصدقاء.
عامة هى مهنة فيها....وفيها....زى أى مهنة تانية
حاسة بك ياحبيبتى
ومجربة الشعور ده
لكن أحيانا لما تكون الاجازة طويلة واستمتعت بيها بيوحشنى الشغل
صحيح برجع اندم على الشعور ده
لكن ده اللى بيحصل
أحيانا بحاول اضغط على نفسى واخلص أغلب المشاوير والواجبات قبل الاجازة
واوفر لنفسى على اد مااقدر وسائل الراحة
بتفرق كتير قوى فى نفسيتى المستفزة دائما:)
ربنا يسعدك يادكتورة فى الشغل والاجازة
السلام عليكم
ليه ؟
ليه بتحسي بكده ؟
هل عشان انتِ بيتوتية وبتحبي قاعدة البيت ولا عشان مكان الشغل منفر وكأنك رايحة السجن مثلاً ؟
متهيألي لو كنتِ بتلاقي في الشغل متعة مكنتيش حسيتي بكده واحنا في مصر ينقصنا إننا نعمل ما نحب ونحب ما نعمل
كان ده احساسي في مكان عملي السابق لما كنت بأحس فيه بالغربة ولما غيرته وانسجمت مع الجو الجديد المناسب ليا
لقيتني بحب أروح هناك
فمبقاش الأمر نوع من التعذيب للنفس
ومع ذلك باحب البيت أكتر
:)
كاس وداير يا دكتورة
:)
دايما الأجازات بتفرقع كده و نقول عايزين اجازة تانيه ...اينعم أنا مش باشتغل بس نفسي في اجازة من نفسي ومن البيت والاولاد وووووووو اقضيها ادام البحر ومعايا كوب قهوة وباكو شوكولاته وكتاب والام بي ثري وبس ....ايه رايك؟
السلام عليكم:
تعليق صغير يا دكتورة عال بوست بتاع العلاج اللي بيصرفوه للمرضي في المستشفيات الحكومية، لو ممكن توضحيلي بعض المعلومات.
ازاي يكون فيه علاج واحد هو هو اللي بيكتبوا الدكتور لكل الحالات اللي بتجيلوا؟
هل المادة الفعالة في الأدوية بتاعة التأمين الصحي (ان وجدت) هي نفسها في الأدوية اللي في الصيدليات و اللي بتعالج نفس المرض في تأثيراتها الايجابية أو السلبية؟
يعني هل في معظم الحالات العلاج ده بيكون مفيد؟ و لا زي قلته؟ و لا قلته أحسن؟
بالمناسبة كان فيه مؤتمر لبعض الأطباء المحترمين أمس عنوانه العلاج علي نفقة الدولة أذاعته الجزيرة مباشر، بعد ما هاتشوفيه هاتحسي انه مافيش علاج علشان مافيش دولة.
كنت عاوز أعلق عالبوست بتاع الايجارات بس انت برده كنتي قافلة التعليق...
حازم
ياولكم يا ولكم باك
الحمد لله نور فتحت التعليقات
يابنتى بتنزلى مواضيع حلو وتسيبينا متشعلقين
المهم انت وحشتينى جدااااااااااااا
انا معاكى طبعااااااااااا
المداومه على فعل شىء فيه مسئوليه وارهاق بالنسبالى مقبض صراحه
انا بموت فى الشتا طول عمرى كنت بكره طول الدراسه بسببها
ماستمتعتش به الا السنه اللى خلصت واتجوزت لللللللللللللغايه مابنتى دخلت الكى جى رجعت كرهتو تانى
وانت مستغربه ليه اذا كان 3 شهور اجازه من المدرسه بيعدو هوووووووووووف هوا
ولا بنحس بيهم اربع ايام هاتحسى بيهم
يلا شدى حيلك كده واجدعنى وروحى اشربيلك كوبيتين اسمنت يشدوكى
ربنا معاكى
السلام عليكم و رحمة الله و بركاته
يلا الشغل للجدعان ...متخافيش العيش و الحلاوة هيكونوا عندك
اللهم بلغنا رمضان
لالالالا مش معقول هعلق
ياةةةة دا أنا نسيت ان فيه تعلقات عندك ونزلت على التعليقات على انها تبع الموضوع (:(:(:
يا رب تكون الأجازة كانت سعيدة
يا رامى اهم حاجة انها كانت اجازة (:
على رايك (:
انت عارفة الشعور بنهاية الأجازة دة كان عندنا كلنا
بس انا و صغير كان يبدأمعايا من بعد مغرب الجمعة كدة (:(:
متقطعيش علينا التعليقات عالينا كدة
ربنا معاكى فى اول يوم شغل
و معاكى علطول طبعا
(:
اصبري تؤجري
وكفاية ان عملك اصلا يحتاجه الناس وفيه من أبواب الأجر العظيم
4ايام طاروا
انا شهر الاجازة طار
و كل اللي حلمت و خططت له ما اتعملش
كنت باحلم اشوف ناس كتييير و ما حصلش
كنت باحلم ارتاح يوم و امدد بدون قلق
و ما حصلش
كنت باحلم اعيش يوم من ايام زماااان و ما حصلش
كنت باحلم اني احلم
و برضه ما حصلش
بس الحاجه الوحيده اللي حصلت اني رجعت تاني الشغل و بدات احلم بكل اللي ما حصلش
ورجعت للمدونه و كنتي اول مكان ازوره
تحياتي
السلام عليكم ورحمة
الله تعــالى وبركــاته
وأسفـــة لكم جميعاً
للتأخير فى الرد
ونبتدى :
Hina wi Hinak
معلش نسيت ارد على
الجزئية دى:الأجازة الأعتيادية
اللى هى الأجازة السنوية لأما بتاخدها مرة واحدة لأما على فترات على حسب رغبتك ودى بتبقى على حسب مدة شغلك فى البداية بتبقى 15يوم بعد شوية 21 وبعد شويه كمان 30 يوم وأخيرا بعد سن الخمسين بتبقى شهر ونص.
حضرة الحفيدة الهُمامة
ايوة عدم الأستقرار دا
هو اللى واجع قلبنا بس
البيت حلو أو قعدة البيت أحلى شوية وخصوصا لمّا البيت بيكون مريح وفيه أهم حاجة فى زماننا دا
التكيييييييييييييف
ويسعدك ربى
أد ما بتسعدينى
بزيارتك وتعليقك
مجداوية
وعليكم السلام ورحمة
الله تعــالى وبركاته
برافو عليكِي يامجداوية
أنا الأتنين دول بحب بيتنا وكمان
الشغل الأيام دى مش (لطيف)كمّاً ونوعاً
ربنا يسعدك فى شغلك وحياتك
ويفرحك بنسمة كمان وكمان
كلمات من نور
أجازة من البيت
هههههه ما ينفعش:)
كان غيرك أشطر
ياأم الأبناء
ربنا يخليكِ
لبيتك ولأولادك
ويهديهم لكِ ويفرحك بيهم
أستاذ حــــازم
لو قلتلك أن المادة الفعالة
فى الأدوية واحدة حتصدقنى :)؟
التأمين مظلوم وظالم أحيانا
مش حأكذب عليك
لكن صدقنى المادة الفعالة واحدة
شركات الأدوية هى اللى بتتنافس فى اخراج نفس المنتج بكذا أسم وكذا شكل وطبعا المريض وخاصة (المزمنين )منهم بيبقوا عايزين اللى(ما أخدوه)قبل كده واول ما ياخدوه يقولولك بس هو دا ولا غير دا لكن صدقنى المادة الفعالة واحدة وما تنساش كمان أختلاف الأستجابة الشخصية للدواء من شخص لشخص
ياترى جاوبت كده؟
ولمّا تلاقى التعليقات مقفلة
على تدوينة اكتب التعليق
فى التدوينة اللى قبلها
او اللى بعدها
مشكلة دى؟:)
المهم تشرفنا بالتعليق والزيارة
Tarkieb
Willkommen zurück
بالألمانى:على حسب الهر جوجل ترجمة:)
richardCatheart
وأنتِ وحشتينى أكتر
ووحشتنى تعليقات
الجميلة ياريتشارد
ولما انتِ بتقولى كده الله يكون فى عون التلامذة بقى اللى رايحين وكمان حيذاكروا ويمتحنوا ويننجحوا وواجبات وتعب كتير اووووى لزمته ايه العذاب دا بس:)
ونكمل بأذن الله
بعد صلاة الفجر
د/على خميس
وعليكم السلام ورحمة
الله تعــألى وبركاته
كده:)طيب ربنا يطمنك
ويصلحنا شأننا كله فى رمضان
وفى غير رمضان.نورتنا دكتور على
Ramy
ياااارامى!
مش اوى كده
بقى كنت بتبتدى
وصلة الزعل من المغرب
طب دا انا رحمة بقى
(:طمنتنى على نفسى
ربنا معانا كلنا
فى حياتنا كلها.
عصفور المدينة
جزاك الله خيراً على
الكلام الطيب دا ويجعلنا
من الصابرين المتصبرين.
دكتور أحوال الهوى
والهوى أحــوال
حمــدلله على سلامتك
الف مرة وربنا يقرب
البعيد والأجازة الجاية
تنجز فيها اللى أنت عايز
تعمله كله
Post a Comment
قول ولا تجرحـش