Thursday, May 27, 2010

..........فكرة مجنونة جتنى!!


بفتح الفريزر على صباحة ربنا
أجيب العيش لأجل اسخنه
وأعمل االساندوتشات
والذى منه
لقيت دى فى وشى
لززززززززززم
اسيبها ؟
مااسألش فيها ؟
ما أحييها ؟
ما أقربش منها؟
يصح برضه؟
هو أنا أقدر؟
ليه ما عنديش قلب؟
وحياتكم سكيت على الفينو
والشاى أبو لبن
واديتها ايس كريم
ايوووووووووة
فطرت
أيــــــــس كــــــــــــــريـــــــــــم
وكمان بعت ماسيج للحكيمة تبلغلى عارضة النهاردة
وسكيت على المذاكرة والكتب والكراريس
وليكن ما يكون على الأقل النهاردة
وعلى رأى صاحبتى اللى كنت برجع معاها
ولا يهمك
يا حــــــــبيتى
هم يعنى حيقلبونا عيانين لو ما نجحناش!!

47 comments:

Unknown said...

اللهم أنى لا
أسألك رد القضـاء
ولكنى أسألك اللطف فيه

فكرة من الزمن ده said...

ياصابح الايس كريمات والعارضات
برافو عليكي والله
مش مفروض نمشي على السطر دايما
قليل من اللخبطة زي المكسرات على الايس كريم
ربنا يوفقك

فكرة من الزمن ده said...

ايه ده انا كنت اول تعليق
ياعني تاكلي الايس كريم وكمان التعليق الاول
بالهنا والشفا برضة
اللهم امين

ahmed_k said...

صباح الفل عليكي يا دكتوره
وهي دي تيجي برضو تنطشيه ولا تبصيله
طبعا لأ
أنتي عملتي الصح بلا فينو بلا شاي بحليب
زهقنا من الفطار التقليدي ده
الحياه لابد لها من التجديد هههه

Unknown said...

فكووورة الأمووورة
مش كده برضه :)
قليل من اللخبطة اللذيذة
وخصوصا بالمكسرات والشوكولاتة
تحلى الحياة وتبقى أحلى وأحلى

Unknown said...

معلش يافكوررة
تبقى فى أيدك وتقسم لغيرك:)
نورتينى يافكرة من الزمن ده

Unknown said...

ahmed_k
استاذ أحمد عندنا
يامرررررحبا يامرحبا
يعنى عندى حق طيب:)
فال اسيبه قال!! طب أضمن منين
لمّا أرجع الاقيه أكله أضمن:)

richardCatheart said...

والله بحايكى جدا
جدعه وستين جدعه بادم عندك القدره تضربى الدنيا طناش هى دى الحياه
لازم تحاولى تضحكى عليها بادمتى بتعرفى تعملى كده وتسرقى منها وقت براحتك
ليكى كل تحياتى فعلا يانور

بس فين نصيبى يانى بردو كده يصح
يالا صحتين ياجميل وانا بضرب ايس كريم او جيلاتى زى مابنقول عليها هنا صيف شتا
مابعتقش هههههههههههههه افترى صح

نصحتى ليكى انتخى بقى وشغلى حاجه بتحبى تسمعيها او تشوفيها
وفكك من الدنيا

ويارب ديما بخير

بنت وولد said...

لا بقى ده انا تخصص فطار الايس كريم ده
انا اعز الجنان زى عنيا
و يا سلام لو الايس كريم ميجا بقى
و اقفل عليا المطبخ عشان محدش يشوفنى و ابقى انا و ميجا و بس

-_- said...

هههههههههه

بيحصلي حاجة غريبة من الايس كريم

بيجيلي صداع فظيع جدا و بقاله سنين الموضوع ده مش عايز يتحل !! كل ما الصيف يجي اقول اكيد دماغي هتتعود على السقعة السنة دي لكن اول ما ادوق الايس كريم يجيلي الصداع

Haytham Alsayes said...

ايس كريم
وعلي الصبح

ههههههه

فعلا فكرة مجنونة
بس ساعات الواحد بيحب الافكار دي وينفذها تبقي ليها متعة تانية


تحياتي يادكتورة

أحــوال الهـوي said...

بالف عافية يا دكتورة

طبعا انا مش عارف اكتب من الضحك

كنتي حضرتك برضه طلعتي الفينو و عملتي سندويش ايس كريم

باعمله في بلدنا و بينفع

بس المشكلة مش باعرف ليه ساقع

تحياتي

حفيدة عرابى said...

صباحك ايس كريم
عندك حق والله
مفيهاش حاجة لما نتخلى يوم واحد عن الروتين والمسئوليات والانضباط
الدنيا مش هيجرالها حاجة
بالعكس هنروح شغلنا تانى يوم اكثر نشاطا وانطلاقا ورغبة فى العمل
بصى فى مدونة اسمها وسط البلد
صاحبها وصف بطريقة جميلة قوى
لما اخد يوم اجازة وازاى استغله احسن استغلال
اجازة سعيدة يادكتورة

P A S H A said...

:))

أنا آيس من ده يا دكتوره

:))


تحياتي

Arsenal Way said...

عملتي طيب انك ما نزلتيش انهردة

الجو كان كله تراب و حر لا يطاق

:(

AHMED SAMIR said...

بس اوعي تغمسي الأيس كريم بالعيش
هههههههههه
بالهنا و الشفا

الميكروباص said...

ينفع حاجه تلج على الصبح كده يات
دكتوره؟

تــركــي الــغــامــدي said...

الله يجعل صباحاتك في حلاوة الآيس كريم ، والجنون فنون كما يقال .

يا مراكبي said...

:-)))

أنا قريت الإتنين بوست ورا بعض وده لحسن حظي لأنهم مترابطين جدا ببعض
:-)

كده انتي موضوع الإمتحان ده أثر على دماغك وخلاكي متوترة فقررتي لا إراديا كده تفطري آيس كريم .. بس ما قلتيش أكلتيه حاف وألا بالعيش البلدي
:-)

Unknown said...

richardCatheart
حلاوة الروح ياريتشارد
ادينا بحاول وربنا معانا
وعملت بالنصيحة بحذافيرها
:(:(وكمان بأظافرها
نورتينى ياريتشارد

Unknown said...

بنت وولد
لأ لأ لأ
الايس كريم دا
ملك على المشاع
يعنى اللى عايز يتفضل
ونورتونى فى اول زيارة لكم هنا

Unknown said...

Sharm
ايوة ياشارم
نوع من الانقباض
الشديد للأوعيةالدموية نتيجة
الساقع اللى بتاكله :)
فى الغالب بيروح لوحده مع السنين
ودعواتى لك بالشفاء منه لأجل ما
تستمتع (بعلبة جيلاتى)زى اللى استمتعت انا بيها دى.

Unknown said...

Haytham Alsayes
ايوة ماهى دى حلاوتها
على الصبح(وقبل ما حد تانى يصحى)يشاركك:):):)بالعافية

Unknown said...

دكتور أحوال الهوى
والهوى أحوال
انت مش واخد بالك
هو كان عرض
فوق العلبة بتاعة
الجيلاتى 2سويسرول
وخدلى بالك
ههههههههه

Unknown said...

الأستاذة الهُمامة
حفيدة عرابى باشا
مش حيجرى صحيح بس
احنا اللى شيالين للهموم
وبنحمل هم بكرة من النهاردة
ويمكن من أمبارح كمان .وحاضر اشوف
مدونة وسط البلد وربنا ما يحرمنى منك ابداً

Unknown said...

P A S H A
المرة الجاية حاعمل حسابك
حاضر عينيى

Unknown said...

مصطفى أبو زيد
الحمد لله وايه كمان
اكلت الجيلاتى لوحدى:)

Unknown said...

AHMED SAMIR
لأ ماتخافش
كان فيه سويسرول :):)
ماحتجتش الفينوههههههه

Unknown said...

لورنس العرب
ينفع يااستاذ معتز
اتوكل انت بس على الله
وسمّى بأسم الله وكُل ولا يهمك.

Unknown said...

أستاذ تركى الغامدى
صبحك الله بكل خير يارب
ومتعك بالصحة والعافية
ومثل ما بيقولوا يااستاذ
بعضاً من الجنون لا يضر:)

Unknown said...

يامراكبى
فعلا حكاية الأمتحان موترانى
ما اكذبش عليك ياباشمهندس مضيقانى
بالصراحة لانها (كلام فى كلام)ومفيش
حاجة حتتغير ابدا .أنما انت ياخويا مهندس ولا محلل نفساوى
بأسم الله ما شاء الله عليك:):)

كلمات من نور said...

هههههههههههههههههههه

أحلى صباح خاصة لما يكون الايس كريم شوكولاته وسلطانه ....ألف هنا على قلبك يا جميلة ........وبالنجاح إن شاء الله

سمع هوص (Abo 3li) said...

ههههههه
بالهنا والشفا

أمل حمدي said...

هههههههههههههههههههههه

ربنا يصلح حالك

لا مش هايقلبوكوا عيانين ولا حاجة

بس ابقي هاتي حتة

ههههههههههههههههه

كل الحب لكِ

Unknown said...

كلمات من نور
الله يهنيكِ ويبارك فيكِ
ياأم الابناء يارب ويعفو
عنك وعنا وعن الناس أجمعين

Unknown said...

سمع هوص (Abo 3li)
الله يهنيك المرة الجاية
بأذن الله حاعمل حسابى وأجيب
شرووووووووووووووووووووووة
ايس كريم بعدد الاصحاب والأصدقاء

Unknown said...

ماما أمولة
الله يهنيك يارب
حاضر المرة الجاية
زى ما قلت لأبو على
حأعمل حسابى وأجيب لكل
أهل بلوجر الغاليين :)

TIMMY !! said...

ههههههههههه

ساعات الواحد فعلا بيبقى حابب إنه يحس إنه حر و مش متقيد بحاجة لما يكون تحت ضغط ,

و حاجات زي دي بترجع للواحد نشاطه

الآيس كريم بالذات بيدي شعور جميل ,
أنا بحب آكله حتى في الشتاء

طهر فؤادك said...

السلام عليكم ورحمة الله وبركاتة

ماشاء الله المدونة جميلة ودمها خفيف
وربنا يكرمك يارب دايما بالخير

تقبلى مرورى الاول

Unknown said...

TIMMY !!
الأيس كريم له معّزة خاصة
ياتيمى بجد وتأثير جميل على
الروح(المعدنية)للأنسان:)

Unknown said...

طهـــر فؤادك
وعليكم السلام ورحمة
الله تـــعالى وبركاته
شكرا لكلماتك ومجاملتك
وأهلاً بك فى أول زيارة للمدونة.

د/على خميس said...

السلام عليكم و رحمة الله و بركاته
يا سلاااااام يا دكتورة
الموضوع كده شكله لذيذ .... لازم اضرب بكرة واحد ايس كريم على الريق
و لو حصل لى حاجة هقول دى وصفة طبية على مسئوليتك يعنى ..
تحياتى

افروديت said...

نورا بجداحسن حاجه عملتيها ومش في أحلي من الايس كريم في الدنيا"خاصة لوكان بالصبح..بالهناوالشفاياقمر

Maha Shahen said...

ههههههههههههههه والله انك عسل
لا مش هتقلبو عيانين ولا حاجه
ومفيش اجمل من الايس كريم اصلا صيف ولا شتا يا حياتى عليه
طيب اعزمى يعنى اللي ياكل لوحدو ايه
بالهنا هنا طبعا

قلـمـــــى يعنــــى أنــــــا said...

ههههههههههه ضحكتينى والله يا نورة بس

هما هيقلبونا عيانين لو منجحناش

تعرفي انتى جدعة والله ماشاءالله عليكى

ياريتنى زيك لانى للاسف عندى كل حاجة بعملها بجد وبالذات المذاكرة وبقسي علي نفسي كتير

بس شكلى كدا هعملها زيك مرة ههههههه

الشاعر الفنان أحمد فتحى فؤاد said...

صباح الخير

إزيك و إيه اخبارك
يا رب بخير
من زمان ما شفناكى عندنا
مخاصمانا و اللا إيه؟

بالنسبة للأيس كريم
فكرتينى أنا فعلا نفسى أكل أيس كريم... بس مش أيس كريم فايف ستار
عايز اكل أيس كريم من عربية عم عبده بتاع الأيس كريم
أول ما أنزل مصر أجازة هاروح أدور عليه
و أقولك إيه اللى حصل

momken said...

يلا انشالله ما عن حد حوش

بالهنا والشفا ياستى



تحياتى

Post a Comment

قول ولا تجرحـش