Tuesday, May 25, 2010

نوادر من الدورة التدريبية..





بعض التفاصيل الصغيرة أحكيها

الصبح بروح لوحدى أخذ تاكسى
(الأبيض ابو عداد ربنا يخليه)
من أدام بيتنا
ولكن فى الرجوع أكتشفت زميلة ساكنة جانبى
وبقينا نرجع مع بعض نتقاسم
ونتبادل أجرة التاكسى والحكايات
بداية قالوا ان المحاضرات
تبدأ فى العاشرة وتنتهى فى الرابعة ظهراً
ولكن يستحسن ياجماعة تيجوا بدرى شوية
يعنى من 9 او 9 ونص يبقى احسن
لأجل الغياب والحضوروكده
ولو فيه سؤال ولا تعليمات او شىء
المهم يبدأ المحاضر
(الدكتور أو الدكتورة )
وفى الغالب أساتذة من الجامعة فى الكلام عن المحاضرة
ويبدأ معه شغل البهلونات بصحيح!!!ازاى؟
الصوت يرقص!! بجد يرقص
بمعنى الصوت يعلى ويوطى ويقطع ويجى
وناس فى الفروع التانية تفتح المايك اللى عندهم
وتسمع أحلى كلام من عينة
شوفتى المبارة ؟
ياسيد هات واحد شاى!
الصوت مش واصل اسيوط!
يافرع اسكندرية ردوا علينا الصوت وصل ولا لسه؟
هى دى محاضرة ايه ؟
المشرفين على الدورة يبعتوا اسماء الحضور على الرياسة!
الحضور عندكم شكله أيه يا طنطا!
المنصورة تفتح الكاميرا !
عددكم كام فى الجيزة؟
يادمياط ردى علينا !!!
هى الدورة دى مفيهاش فلوس؟
طيب حتى يجيبوا لنا شاى على حسابهم!
يابيه يابيه يابيه
يادكتور صادق بيه
(كبير القعدة بقى)
سمعنا ان فرع الاسماعيلية بيجى لهم فطار!!
ناخد كتير فى الاخد والعطا دا كتير؟؟
حوالى نص او ساعة الاربع و يرجع المحاضر يتكلم

المهم بالطول ولا العرض يكمل محاضرته
وطبعا يتخللها كذا قطع
من عينة الصوت مش واصل قنا !
الصوت لسه واصل حالاً بس فى البحيرة !
انتم وصلتم لحد فين !
او الأسئلة العرضية فى موضوع المحاضرة
المهم يخلصوا المحاضرة الأولى وناخد فسحة
(هههههه فسحة هههههه)
نشرب شاى او ناكل ساندوتش
(على حسابنا)
او نرغى شوية مع بعض
ويستكملوا المحاضرة التانية
القاعة مممممممممممممممتازة مكيفة بالكامل
لكن طبعا لازم يطلعلك البردنين فى عز الصهد
اللى احنا فيه ويطلبوا يطفوا التكيف
(ما بيجبوش معاهم البطانية ليه انا مش عارفة)
ويطفوا التكيف وتقعد انت صهدان وحران !!
وزى ما قلت المحاضريين فى الغالب
أساتذة من الجامعة فيهم
النص نص
وفيهم المتمكنين من علمهم
يعنى ممكن فعلاً تطلع من المحاضرة
فاهم ايه اللى أتقال ولمّا تقرأها على النت
فى الموقع الخاص بالهيئة يكمل الفهم
بس ياسلاااااااام شوفتوا ازاى؟
يعنى لو كنت ماتعلمتش الشوية بتوع الكومبويوتر
اللى انا عارفهم دول كان زمانى متحيرة
زى زملاء لى فى الدورة دايخين السبع دوخات
للى ينزل لهم الكلام والمحاضرات
وبيضطروا يروحوا النت كافية
او السيبر وحاجات غريبة كده
شوفت زميلات وزملاء بقى لى كتيرما شفتهم !
وسبحان الله الطبع خىّ الروح
بمعنى الشكل ممكن اتغير بحكم الزمن
لكن الطبع واحد بمعنى الكويس كويس
... والمش ...برضة مش
اخر حاجة اقولها
ان فى نهاية الدورة دى كان لنا
مفاجأة مفزعة لنا احنا
اللى هى قالبة حالى كده
أيه هى؟؟
حيعملولنا امتحان
يالهوتىىىىىىىىى
كبير القعدة
اللى هو
المشرف العام على
الدورة ما كفاهـ المكافأت اللى خدها
هو والمشرفين اللى معاه
ولا التورتة
الأدددددددددددددددددددددددددددد
كددددددددددددددددددددددددددة
اللى جابها وعزم
رئيس الهيئة عليها
ونواب رئيس الهــيئة
ونواب نواب رئيس الهيئة
ونواب نواب نواب رئيس الهيئة

المهم بعد ما أكلوا التورتة
(وأحنا بنتفرج عليهم من شاشة الفيديو كونفرانس)
قعد يحكى عن الاستفادة المتوقعة
من الدورة دى وكده فى مجال تحسن الخدمة
وأد ايه المتدربين اللى هو أحنا استفدنا !؟؟
راح رئيس الهيئة (الأروب)قالوه:
لأ مفيش كلام وبس
المية تكدب الغطاس
اعمل امتحان
وورينى النتيجة
يالهوتىىىىىىىىى
واسيبكم دلوقتى
وابقى اكمل بعدين لو لىّ عمر
الخلاصة ...

عندى استمحاااااااااااااااااان
يوم 6-6-2010
ربنا يستر
وقالووووا اللى حيسقط ألف مليون
بعد الشر يارب عن الطلبة كلهم
حيحطوا السيخ المحمى فى صرصور ودنه
أو حيعلقوه على باب زويلة
بعد ما (يمّدوه)على رجليه
عشر عصيان
زى ما قيل
أن واحد من اولاد صدام حسين
عمل فى الفريق القومى العراقى لكرة القدم
بعد ما أتهزم فى كأس العالم
(من كذا سنة)
اشوووووووووووووووفكم
بخيررررررررررررر

التدوينة دى نصفها مكتوب من مدة كبيرة

اول ما رحت الدورة دى من حوالى ستة او سبعة أشهر

والنص التانى بعد ما عرفنا حكاية الأمتحان دى وبالتالى

لو لقيتم عدم ترابط بين الكلام فأعذرونى

معلش لأنى متوترة اوىىىى

!!!الله مش بقولكم حيمتحنوننا

18 comments:

norahaty said...

اللهم سترك ورضاك
ولطفك فى قضاك تسترنا
ولاتفضحنا فى الدنيا والأخرة

ماما أمولة said...

اللهم أمين يارب

ان شاء الله من الناجحات

ربنا يصلح حالك يارب

دمت بكل الخير

راجى said...

يارب تنجحى وتبقى رئيس الادارة المركزية لقطاع الوقائى والعلاجى بعموم الجمهورية
ويبعد عنك الدكتور سمير النمكى
امين

richardCatheart said...

ياصباح النور
ربنا يسهلك يانور وينورلك الورقه كده
وتشرفينا

معلش يابنتى مافيش حاجه بتخلص بالسهل كله بطلوع الروح
المهم انت ركزى كده وربنا هايسهل
ولا اعملك زى ام اللمبى واجل ميكروفون واجى اقولك الاجبات من بره
هههههههههههه
ان شاء الله خير
ويارب تنجح يا تتح

ربنا معاكى ويتقبل دعاكى

Haytham Alsayes said...

ربنا يوفقك
وتنجحي ان شاء الله

تحياتي

قلم رصاص said...

ان شاء الله النجاح حليفك

بس انا مبعملش شاي لحد

ههههههههههههههه

حمدلله على السلامه

وذاكري بقى وراكِ امتحانات

^_^

عطش الصبار said...

افهم ان الدوره هى اللى واخداكى منا
ان شاء الله تنجحى وتطلعى الاولى كمان
عموما يا دكتوره معروف الدورات دى بتتعمل ليه
تحياتى

خواطر شابة said...

باالتوفيق ان شاء الله ابقي طمنينا على النتيجة
دمت بكل ود

نهــــــــــار said...

السلام عليكم ورحمة الله وبركاته ..
لا يا دكتوره مش يتخاف عليكي
ماشاء الله تبارك الله دنتي دافعه لتاكسي قد كده وبتحضري كل يوم وبتستني الإتصال يكتمل مع الجمهوريه
رب حيكرمك أن شاء الله بس
برضوا ما فيش مانع من شوية مذاكره
....
أسأل الله ان يوفقك غاليتي ويسهل أمورك
عارفه إني مقصره معاكي
بس أكيد حتعذريني
لأنك طيبه من يومك
....
في حفظ الله

افروديت said...

مش تخافي يانورا توكلي علي الله وذاكري بس وانتي ان شاء الله تطلعي الأولي ربنا يوفقك

سمع هوص (Abo 3li) said...

طب شدي حيلك بقي وزكري كويس...
ولا اقولك شوفيلك مزكرات ولا ورق مراجعة نوهاااائية...
هههههههههههههههه


ربنا يوفقك ويكرمك..

mostafa rayan said...

ربنا يكتبلك النجاح والتوفيق

قبلاوى said...

"الموقع بتاع الهيئه"

هيئة ايه بقى ؟

nour shahen said...

الله يقويكى يا بنتى
معلش هنعمل ايه كلنا لها
خليكى سايبه الدنيا والامتحانات والدكاتره وقاعده تفصفصى وتفكرى بين طنطا والاسماعيليه يا بنتى دع الخلق للخالق هههههههههههههه دا علشان مش تكتئبى بس انا خايفه عليكى
بصى بقى انتى شدى حيلك كدا وركزى وربنا هيوفقك بأذن الله باقى وقت قليل ويوم الامتحان يكرم المرء او يكرم معندناش حد يهان ان شاء الله
اتمنالك التوفيق والنجاح يا رب
ودمتى بخفة دمك منوره علينا بأجمل الكلمات

وفاء بركات said...

لوووووووووووووووولي
الحمد الله التعليق فتح
كنت حطق مش عارفه أسلم عليك ولا أعلق عندك ..
يا أختي ربنا معاك وإن شاء الله بالنجاح والتوفيق وكل دورة تدربية وانتي طيبه
مع تمنياتي بالتوفيق

norahaty said...

ماما أمـــــولة
الباشمهندس راجى
richardCatheart
Haytham Alsayes
قــــــلم رصاص
عطش الصبار
خواطر شابة
نهـــــار
أفروديت
سمع هوس
mostafa rayan
قبلاوى
nour shahen
أستاذة وفاء بركات
لكل دووول ولكل من مر من النواااحيدى
ربنا ما يحرمنى منكم يارب يارب يارب
معلش انا رديت متأخر شوووية(سنتين تأخير (ياكسوفى ياكسوفى)لكن العباقرة بتوع التبرير يقولولك أنت تأتى متاخرا خيرا من ان لا تأتى ابدا
:) :) :)
المهم لكل من يسأل انا نجحت الحمد لله فى الدورة التدريبية لوىلوىىىى
لكن الله يجازى المسئولين لم يوفوا بأى من الوعود اللى كانوا وعدوا بيها المهم ياعنى انى نجحت وشفت شوية زملاء قدامى وعملت شوية ريفرشمنت للمعلومات وصراحة كمان (زوغت )كام مرة على حس الدورة من غير اجازات ولا خصومات :)

norahaty said...

دكتور قبلاااوى
الهيئة العامة للتأمين الصحى

norahaty said...

الحمد لله رب العالمين

Post a Comment

قول ولا تجرحـش