Thursday, December 17, 2015

...العيادة....1



لما فتحت العيادة
فى شقتى
كانت عبارة عن اوضة فى الشقة
لها باب على السلم
وبالتالى
الداخل والخارج منها
ملهوش ان يدخل الشقة
وزى ما قلت قبل كده
وبصراحة
لا جبت ممرضة ولا تمرجية ولا فراشة
ليه؟
حيقعدوا فين؟ وامتى؟ ومع مين؟
زباين العيادة كانوا سكان الشارع فقط
او اقارب سكان الشارع
لما ربنا سبحانه وتعالى يشاء بالشفاء لحد فيهم
فيذكرنى عند قريبه او حد من اصدقائه
ويجى معاه او يقوله عليا
ومعظهم ان لم يكن كلهم
لا يلتزموا بميعاد العيادة
(!!مش دا بيت حضرتك برضه)
المهم
كان ليا زميل فاتح فى بيته زيي بس كان فى الدرب الأحمر
اشار عليا انى لازمن ولابدن
 !!العيان يكون خف
اوعلى الأقل يكون استريح قليل قبل ما يسيب العيادة
طب ودا يحصل أزاى يافلان؟
هو سحر ولا شعوذة
قال اديله اى حاجة عندك
من العينات المجانية اللى بتيجى لك
واتكلمى معاه حبة عقبال ما الدوا يشتغل
المهم ماكذبتش خبر
وكنت فعلا دايما محضرة دورق الميه
والعينات المجانية فى العيادة
وزدت على كده
جبت شوية حقن
مضادة للتقلصات
او مسكنة
او فيتامينات
وبقيت اديها للمريض قبل ما ينزل
بحيث عقبال ما يروح بيته
يكون الوجع او الألم خف شوية

وللأطفال الصغيرين العيانين
جبت مصاصة ولبان وملبس
برضه بقيت افرقهم عليهم
الأمور مشيت عادى والعيال الصغيرة
اللى كانت بتيجى لتانى مرة او تالت مرة
كانوا بيبقوا قاعدين مستنظرين افتح العلبة اللى فيها الملبس
الحال مشى والحمد لله
بس فى يوم من الأيام وكنت فى زيارة منزلية
ولسه حاخرج من باب العمارة
لقيت واحدة
عفوا
بترقع
"بالصووووووووت الحيانى"
اول شىء خطر ببالى ان العيان بتاعى مات
يا لهوووووووووشى
طب وبعدين حيقولوا انى انا اللى موته
بالدوا اللى اديته له
وحيسيبوا
كل الأمراض اللى كانت عنده
ويمسكوا فى الحباية اللى
الضطتورة اديتها له
مش حاكذب عليكم
روحت البيت وانا حالتى حالة
وبقيت مستنظرة البوليس يجى فى اى وقت
او حتى استدعاااااااااء من القسم
لكن الحمد لله
طلعت ان الصويت جاى من شقة تانية
والعيان بتاعى صاغ سليم
لكن اتعلمت وحرمت
ما ادى اى دوا لمريض
ابداااااااااااا
ولا اى حلويات كمان
للأطفال
الحقن
 بقيت أكتبها فى روشتة
واخلى اهل العيان يجيبوها

كنت بانتظر 
اعطها له بالمرة
بس لقيت انه افضل
يجيبوا الحقن ويخلوا حد يعطيها له
والأطفال استبدلت الحلويات
بالالعاب
 اقلام رصاص او الوان وبلالين وزمامير  وخلافه
ومابقتش اديها لهم الأ وهم مخلصين الكشف
ومروحين خلاص
(هو انا ناقصة وجع دماغ)
فعلا الحياة تجارب
واللى ما يتعلمش من تجاربه لا يلوم الأ نفسه







ليا تجربة فى إطعام الطعام للغرباء

(وهى مكرمة وفضيلة كبيرة على فكرة)
!!!
ولكن 
اه من لكن دى
اقووووووولكم
نخليها لمرة تانية
والحمد لله على
جميل ســتر ربنا 
علينا وعلى عباده

اجمعين

6 comments:

Gamal Abu El-ezz said...

جميل ما قمتى به دكتورة نور
والاجمل نقل التجربه لنا
لأننا بعيدن عن مجال الطب
ربنا يوفقك فى حياتك العلمية والعمليه اللهم امين
مودتى وإحترامى

شركة سواعد للخدمات المنزلية said...

Mr. Director of the Forum and Gentlemen, Dear Thank you all invite you to visit our website on the following link


شركة كشف تسربات المياه بالدمام
شركة كشف تسربات المياه
شركة كشف تسربات الدمام
كشف تسربات المياه بالدمام
كشف تسربات فى الدمام
افضل شركة كشف تسربات مياة بالدمام

شركة سواعد للخدمات المنزلية said...

Mr. Director of the Forum and Gentlemen, Dear Thank you all invite you to visit our website on the following link


شركة كشف تسربات المياه بالدمام
شركة كشف تسربات المياه
شركة كشف تسربات الدمام
كشف تسربات المياه بالدمام
كشف تسربات فى الدمام
افضل شركة كشف تسربات مياة بالدمام

norahaty mo said...

جمال ابو العز
الأجمل حضورك وتعليقك هنـا
اشكرك للمدوامة على الزيارة والتعليق

زهــــراء said...

صباح الورد يا دكتورتي
عن جد ضحكت في أول اليوم ربنا يسعد قلبك ويريح بالك
النوعيه بتاعتك انقرضت خلاص دلوقتي الدكتور بيكون عاوز ياخد منك اللي معاكي ومع اللي معاكي كمان لو امكن ويكتب على علاج يطلع عين اهلي عشان اقدر اوصل له وكأنه هو السحر اللي فيه الشفا
في انتظار البوست الجديد بسرعه اوي

norahaty mo said...

زهووووورة
ظالمة الدكاتييييررر ليه بس
دول ناس أمرا وآخر طيبة