Monday, November 16, 2015

...صفحة الوفيات:تدوينة قديمة..

حتقولولى ياساتر يارب
الله!!!الله!!الله

ما الموت علينا حق ياجماعة
وشىء لابد منه
وبرضه من ضمن الامثال الشعبية
اللى ما يموت منين يفوت
المهم انا بعدت عن الموضوع وهو صفحة الوفيات

مالها بقى صفحة الوفيات :خلصينا؟
ده اكيد انت او انتى بتقولى كده
حاقول انها صفحة عجيبة
يعنى ممكن تقعد تقرأها ما تخلص منها
وتاخد منها شوية معلومات عجب وعجب العجب كمان
نعطى امثلة
خد عندك ياسيدى:-

سقط سهوا وخللى بالك من سهو دى
وبعد كده يافطة طويلة
امال لو كان عمدآ كنتوا نسيتو كام واحد
وساعات تلاقى المنسين اقارب من بعيد
دول اكيد زعلوا وحلفوا ما حيجوا المأتم
الأ لما أسمهم يتكتب
وساعات المنسيه تكون الزوجة!!!
(تكون الزوجة الثانية ولا حاجة؟)

:-توفى الى رحمة الله:-
مسكينا فى عالم الرضا فلان الفلانى
ويرجو التخفيف على كل من له علاقة به
فلا عزاء وان أصر البعض
(دماغه ناشفه البعض دا وبصراحه كمان تلم)
لواجب فليتصدق بثمن تليغراف العزاء على روحه
وليدعو الله وتلك هى رغبتى
(فلان)
الله يرحمه راجل بيفهم
مش عايز الناس تتعب نفسها
وتتلم وتعمل ازمة وزحمة من غير لزوم
والدنيا مش ناقصه زحمة
ورايحين فين ياجماعة؟
رايحين العزاء بتاع فلان:(
طب خدونى معاكم
واتوبيسات المصلحه تطلع
وتدور على موظف واحد
ما تلاقى واحد يقضوا لك طلبك
معلش اصلهم فى عزاء زميلهم
وكمان اللى رايح يجرى ده
يمكن ما كان بيصبح
على فلان ده وهو حى!!!

-:توفيت الى رحمة الله:-

الحاجه فلانه
زوجة الاستاذ/الدكتور/ المهندس/المستشار/
رئيس مجلس ادارة كذا/
العضو المنتدب لكذا/
حائز وسام كذا
وخد من ده حاجه بتاعة
نص متر فى الجرنال ليه؟
الله!!!!!الله!!!!!!الله !!!!!
جوزها بيعلن عن نفسه شويه0000فيها ايه؟

-:نيجى بقى للكلام اللى بيتقال:-

ماما الحبيبه
بابا الغالى
ياتوأم الروح
يارفيق العمر
ياجوهرة
يامحبة
يـــــاأغلى حبيب
ومـــــــن ده كتيرجداااا
عايزه اعرف الناس دول بيكتبوا الكلام
ده لمين؟
للميت !!هو حيقرأ!!!!

:-برضه مثلا فلانة-:
زوجة العميد او العقيد
كذا مدير إدارة كذا
فى سلاح كذا
وطبعا عنوان البيت
علشان التليغرفات
من الاخر معلومات كثيرة
وعديدة ممكن تتحط جنب
بعضها وتبقى حكايه

:-دايما بفتكر فيلم زمان اووووى:-
كان بيجى فى التليفزيون
اعتقد اسمه : كلهم أبنائى
كان هندى, ومدبلج بالعربى
أيوة كانت زمان موضة
دبلجة الافلام الروسيه والهندية
علشان اللى مابيعرفش يقرأ
ورمز لدول اوكتلة عدم الانحياز
المهم الفيلم بيبتدى وكالعادة
فى السينما الهنديه بمأساة موت الاب
عائل الاسرة الوحيد وطبعا ماحيلتهومش حاجه
ومع ذلك اضطروا يعملوا واجب العزاء بالكامل
ويضيفوا المعزين استضافه كاملة
ولا فندق 5 نجوم وكانوا أولاد الميت
حيموتوا من الجوع والضيوف بياكلوا كل حاجه
!!!!!!!!!
وده صحيح اللى بيحصل فى الهند
زى صاحبتى سوسيلا ما حكت لى
حتقولوا سوسيلا مين ؟

وصحبتك الهندية دى عرفتيها فين؟
دى حكاية تانيه بعدين بقى ابقى احكيها

باىىىىىىىىىىىىىىى

----------------
تدوينة قديمة اوى

من اوائل التدوينات

اللى عملتها

فى

صعبان على حالنا

نمر ون

ساعتها جه لى تعليق واحد

وماتتصوروش فرحتى يومها كانت أد ايه

4 comments:

Unknown said...

اهو كدا المواضيع المفيدة دي

Unknown said...

محمد الحسينى
اشكرك للتعليق ☺

محمد سلامة said...

تصدقى لو قرأت جرايد
عمرى ما تفحصت فى الصفحة دى
ممكن أخد نظرة خاطفة كدة
وزى الجرنال عندنا فى الأرياف النعى
وهو عبارة عن عربية بتلف بميكروفون تعلن موت واحد
وتلاقي فى بعض
توفى فلان الفلانى
والد فلان وفلان اللى شغال فين
وابن عم فلان اللى شغال فين
وقريب ونسيب فلان
لدرجة إنك لو ماسمعتيش الأسم من أول مرة
حيفوتك لأن العربية بيكون عدت خلاص :)
حلو ذكر الموت :)

Unknown said...

محمـــد سلامة
ذكر الموت موعظة وتنبية
اما قراءة صفحة النعى فى الجرايد
فصراحة فى وقت من الاوقات(ادمنتها) بالفعل
وبقت (مزاج)عندى بس الحمد لله بطلت اقراها
مش هى بس والجرنال كله☺☺