Sunday, October 11, 2015

...مدام فهيمة الحكيمة...


مدام فهيمة حكيمة اشتغلت معايا

كبيرة فى السن والمقام والعقل والقلب
المهم
فى يوم من الأيام قلتلها
تصدقى يامدام فهيمة
انى مش فاكرة أذا كنت
شربت الشاى الصبح ولا لأ؟
قالت أزاى؟
قلتلها
انا أعمل الشاى
وافضل رايحة جاية
وجــــــــــــاية رايحة

اكمل الأستعداد للنزول للشغل
والم شوية غسيل
املا أزايز الميه
اخرج عفوا
(الزبالة)
اشوف خبر على الفيس
والأخر انزل للشغل
ساعات لما برجع بأكتشف
ان كوباية الشاى زى ماهى
او يادوبك شربت ربعها
قالت الأ دى
كوباية الشاى باللبن الصبح دى
لازمن ولابدن نتفرغ لها خالص
قالتلها أزاى ياعنى؟
قالت
ياعنى
هو احنا ملناش فى نفسنا 10 دقايق؟
انا مهما اكون متأخرة
لازم اقعد واشرب كوباية الشاى
برواقة
امخمخ فيها كدا
!!واتسلطن
المهم
بقى انا اتبعت كلامها
 شووووووية

لكن رجعت لعوايدى
وبرضه
كتير
((بزلط))
كوباية الشاى
(زلطاً)
وكأنها مهمة رسمية
عاوزة أخلص منها
(طبعى وحش انا عارفة)

12 comments:

رحاب صالح said...

ههههههههههههه كله الا الشاي ده له معايا طقوس خاصة جدااا
مقدرش استغني عنه \وكل ما الدكتور يقولي قللي شوية منه مقدرش

زهــــراء said...

انا بقى مج النيس كافيه صديقي اول اليوم مع الفطار ولازم يفضل معايا لحد ما يخلص اقولك بقى على فكره رائعه تعرفي انك شربتيه اغسلي الكوبايه قبل تنزلي هنا بقى هتعرفي انك شربتيه بالهنا

سعودي اوتو said...

thank you

سعودي اوتو

شركة تنظيف said...

thx

شركة نقل عفش بالرياض


محمد سلامة said...

كل ما يمتعنا يستحق أن نتفرغ لنستمتع به
أخريه لما تروحي الشغل
أو هاتى مج من اللي بحفظ الشاي ده وخديه العربية :)

Tarkieb said...

شايك وكلامك مظبوووووط

Gamal Abu El-ezz said...

الحل بسيط اشربى شاى فى الشغل مع إنه بيبقى حاجه تانيه غير شاى البيت
أما لو موضوع مزاج بقى فيبقى يوم الغستمتاع هو يوم العطلة
أنا علشان بشرب شاى كتير فبقيت بعتبره مهمه رسميه بالذات بداية اليوم :)
تحياتى

norahaty mo said...

رحاب صالح
!ومين سمعــــــــك
انا كمان ما استغناش عنه
وخصوصا كوباية الشاى باللبن
بتاعة الصباااااااااااااااااااااااح دى

norahaty mo said...

زهــــــراء
☺لأ نسكافية ايه!الشاى باللبن والأ فلاااا☺
وشكرا على الفكرة حانفذهاااااااا كل ما اقدر☺

norahaty mo said...

محمد سلامة
صاحب مزاج انت باين عليك☺
شرب الشاى بالشغل دا انا الحمد
لله بطلته من زمان☺لأسباب كتير
والله والحمد مازلت مستمرة

norahaty mo said...

تراكيبواااا
دا انت اللى كل حاجاتك
ظبط الظبط والربط كمان☺

norahaty mo said...

جمال ابو العز
الشاى فى الشغل دا
بطلته والله الحمد لله وزى
ما قلت الأسباب كتير اما الحل
اللى انا ماشية عليه حاليا هو الصحيان
بدرى ولو ربع ساعة اعمل الشاى بسرعة
واقعد اشربه بتأنى ☺☺وعلى راىمدام
فهيمة هو احنا ملناش فى نفسنا 10دقايق☺