عريس لبنت اختى:تدوينة قديمة

النهاردة جاى لبنت اختى عريس
(جوازة عادية او جوازة صالونات كما يقولون)

هى الشقيقة الكبرى لتلك التى تزوجت الشهر الماضى

وما ادراك ان تتزوج شقيقتك الصغرى قبلك؟؟

نار مابعدها نار!!خاصةها اصغر منها ب4 سنوات !!

كل ما حد يشوفك:يدعى لك ربنا ياحبيبتى يعدلهالك
وتبقى فى نص هدومك من النظرات اللى من تحت لتحت والاشارات الخفيه بالعيون والروؤس :ربنا ياختى يجبر بخاطرك.....حاجات بتخليك تكره تشوف حد اساسا...

و جميع البنات ممن هن فى مثل سنك قد تزوجن بالفعل ولديهن طفل وطفلان الان!!

هى انسانه عادية شكلا وموضوعآ
(اقل جمالا حقيقة من اختها الصغرى)
ولكن الا تتزوج الفتيات العاديات
بل هن الاقرب احتمالا للزواج
بأعتبار ان قاعدة :خير الامور الوسط قاعدة صحيحة

ولماذا لم تتزوج حتى الان اذآ؟

كانت هناك لن اقول خطبة او شبكة ولكن تعارف
(صالوناتى ايضا)
وشعور بالارتياح مره واحدة قبل حوالى 8سنوات
(بمجرد ان تخرجت من الكليه)
وحضر العريس مره ثانيه للزيارة ومعه اخته وبعدها لم يعد.....!!
(منها لله لو كانت هى السبب)

وطبعا لن اذكر كم المعانةوالالم والعذاب والاحساس بالخيانة التى احست بهم
(بصراحه عندها حق)

بعد كده حدثت زيارتين لنفس الهدف ولم تكلل اى منهما بالنجاح وخد وخدى عندك عياط ودموع واحباط من هنا
(لبكرهلأ بكره ايه للسنه اللى بعدها)

فى النهايه وشويه شويه بدات فى التقوقع على نفسها
ورفضت الاستمرار فى العمل
(كانت تعمل مدرسة )
واذدادت عزلتها اكثر واكثرودخلنا فى سلسلة متواليه من الاكتئابات والخروج منهاوكنا دائما فى شد وجذب معها
اشد فترة علينا وعليها فترتى الخطوبه والزفاف لاختها الاصغر (كان عندنا تقريبا حالتين فى البيت: الصالون الخارجى والانتريه والسفرة كان فيهم فرح
(زينة وكهارب وناس كتييييير جايين من هنا وهناك)
و(الانتريه الداخلى وحجرة نومها والمطبخ مأتم بعيد عن السامعين)
والله ما بكذب والمفروض انت بتنتقل بين المنظرين كل شويه وتخللى بالك من ده وده.

واقول ايه ربنا يستر ويجيب العواقب سليمه ويعدي الزيارة على خير.

قولوا اميييييين
يارب العالمين

===========

دى تدوينة قديمة اوووووى
من أوائل التدوينات يمكن
حطيتها بكل ما فيها
من أخطاء لغوية وتركيبية
كمان المهم عاوزة أقولكم
ان بنت أختى لم تتزوج بعد
لكن الحمد لله أشتغلت أو رجعت لشغلها
مدرسة لغة أنجليزية فى مدرسة إبتدائية خاصة
وحطت موضوع الجواز دا فى (الصندرة)حاليا