Sunday, August 19, 2012

.....عُــــــكاشنا ....بــــــــوابـــنا........





اخيرا وبعد
جهد جهيد

وتعب شديد ومفاوضات
مضنية
وفريق من المفاوضين
الجامديين
اوى يا انت
وافق وتفضل وتكرم علينا
عمونا
عكاشة انه
يشتغل عندنا بواب
والله وااااااااااااااااااااااااااااااافق
طبعا كلوكواحتقولوا ياسلام وفيها ايه دى؟
اقولكم اصل انتم ممكن 

ماجربتوش العيشة من غير بواب
لكن انا او احنا جربنا وبقى لنا اكتر
من 20 سنة من غير بواب حتوقولوا
ومالله احسن! متهيألكم على قد ضرره
وبواخته وسماجته وتلامته
( هو هنا ولا بعيد!محدش يقوله ربنا يخليكوا )
لكن له فايدة او فوائد
اول هام
الباعة الجائلين باللغة العربية الفصحى
او بالبساط الاحمدى البياعين السريحة
يبقوا عارفين ان البيت فيه بواب
(هه مين هناك)
ومش كل شوية تلاقى حد بيخبط
على بابك وطلع لك
من ورا الحيطة
زى عفريت العلبة
بالظبط تشترى كلب ياهانم
امشاط فلايات
تلاجات بوتاجازات
انتريهات فضيات ملايات
حاجات ومحتاجات
دى اول حاجة واللى زاد وغطى 

الجماعة الصينين كمان
الباب يخبط
أصل انا شايلة الجرس بقى لى
 كتير علشان الازعاج بتاعه
لكن مش قادرة اشيل الباب كمان !!!
لاجل ما حدش يخبط عليه
المهم الباب يخبط ....مين؟
انا افتحى ماما
بالصوت الرفيع اياه ده
قلبى ينخطف منى صراحة
ومن قبل ما افكر الاقينى فاتحة
الاقى الست فى وشى ومابعرف
الحقيقة ما اشتريش منها بتصعب عليا
اصلها وليه برضة ومكسورة الجناح
ومتغربة لاجل ماتجيب القرش
وانا مجربة الغربة لاجل اكل العيش
ودى تلاقيها سايبة ابنها ولا بنتها
وجاية تزاحمنا فى اكل عيشنا
لكن الحقيقة حاجتهم حلووووة
ورررررررررخيصة اوى
واحلى ستين مرة من نفس المنتج
بتاعنا حتقولولى
بيستعملوا حاجات ضارة
اسم الله احنا اللى بنتج حاجاتنا
على الفرازة والحاجات المتعقمة
استنوا بقى ماتخلونيش
اسيب موضوعنا الاساسى
تالت هام برضه
ودى من ضمن الحاجات
اللى مش حاشرحها لكن الحدق يفهم
وانتم كلكم حداقة بالصلاة على
سيدنا النبى صلى الله عليه وسلم
احنا عندنا شقة مفروشة فى العمارة
بس خلاص كله يفهم
المهم طيب ليه مكانش عندنا
بواب طول المده اللى فاتت دى
اصلنا ما عندناش اوضة بواب
!!!اه والله
لأ استنوا بس كان عندنا اوضة بواب
وبعدين الراجل بتاع الجراج
استولى عليها وهد الحيطان
بتاعتها ودخلها من ضمن الجراج
ياسلام عويصة دى؟
طبعا عملنا قضيه وقعدت فى المحكمة
شهور وسنين واتجددت مش فاكرة
والله كام مرة لوفاة مستاجر الجراج الاصلى
او حد من الورثة او وفاة وارث من ورثة الورثة
وكل ده مصاريف وورق ومواسم قضائية
وأجازات واستشكالات ووووو
المهم الخلاصة فى المصاصة
اتحكم لنا بيهاحلو!!!!
لأ مش حلو ابدا
اتحدك لو عرفت تنفذ حكم فى بلدنا بالقانون
لو شاطر روح هاتلك 4- 8 قباضيات
فتوات يعنى بالبلدى
عريض المنكعين اشلولخ
ونفذ بيهم
وبعد كده على المتضرر اللجوء للقضاء
المهم احنا ماعندناش اوضة للبواب
وكل ما كنا نقول لحد تعالى اشتغل عندنا
يقعد كده ويبص بعين ويقفل التانية ويقولك
عندوووووووووووووووووووكم سكن!!!
طبعا احنا نسكت
ونتكسف
ووشنا يبقى احمرررر
امال معطلينى ليه
دا هو اللى بيقول
كل ده لحد ربنا يطرح فيه البركة
عم عكاشة ما وافق يشتغل عندنا
من غير اوضة
هههههههه
اصله ساكن قريب مننا
وعنده سكنه الخاص (لو سمحت) بس عايز
بدال ما يجعد على الجهوة كل يوم
يجى يجعد على الكراويته
اللى ادام الباب ده
(باب بيتنا يعنى)
نسيت اقولكم ان عم عكاشة كان مستوظف
ساعى بالعامية الدارجة بتاعتنا
الأوفس بوى بالدلع بتاع الايام دى


فى
الحكومة
بس طلع معاش
من عشرة خمستاشر سنه كده
وزهج من جعدة البيت مثل
(الحريمات بردون يعنى لأمؤاخذة)
وكمان المعايش
بتغلى كل يوم عن اليوم اللى جبله ياست
والولد مابيرحموش
عايزين!! عايزين!!!!! عايزين
اهه اجول ايه حجهم برضة ولا ايه!!!
ياسلااااااااااام عداك العيب ياراجل
كنت فين من زمان
وحشتنا
بس ادى الحكايه
واهو بقى له شهر معنا
مااعرفش احنا كنا عايشين ازاى
من قبله
طول النهار
الناس
(واحنا الصراحة)
مابنبطل ننده عليه
عم عكاااااااااااااااااااشة
يـــــــــــاعم عكاشة
يــــــاعم عكاشة
اخر حاجة حصلت اقولها وامشى
بنطلب دليفرى من الصيدليه وبنقوله على العنوان
يرد اللى على الخط
ويقولك
ااااااااه عارفة
مش بيت عم عكاشة
يالهوتىىىىىىىىى
هو بيتنا بقى بيت عم عكاشة وانا مش عارفة!!
الله يرحمك ياأبويا انت وجميع موتى المسلمين

عاوزة أضيف حاجتين فى الأخر
الأولى أن دى
تدوينة قديمة على حبيبتى
ومدونتى صعبان على حالنا نمر ون

قلت احطها النهاردة
بمناسبة العيد
بعيد عن السياسة والذى منه
وخلى اللى فى القلب فى القلب
والحاجةالتانية
أن عم عكاشة

ساب الشغلانة عندنا بعد ما اتعودنا عليه
قال انه تعب من جعدة الكراويتة!!المهم
احنا طبعا أتعودنا على وجود بواب
وبالتالى جبنا واحد تانى
الا وهو المعلم رجب
ودا خلينى أحكى حكايته بعدين
وكل سنة وانتم طيبين

2 comments:

Timo.. said...

كل عيد.. وانت اكتر حد سعيد :)

norahaty said...

Timo
وكل عيد وأحنا
كلنا سعداء يارب

Post a Comment

قول ولا تجرحـش