مُتعى الصــــغيرة

من المتع الصغيــرة
والتى ما زلت استمتع بها
برامج السياحة والرحلات
الفرجة على صور البلاد
قراءة عادات الشعوب الأخرى
اذكر أن أول كتاب (كبير) قراته
كان كتاب الاستاذ أنيس منصور
حول العالم فى 200 يوم ولا زلت الى
اليوم أذكر استمتاعى به وسرحانى فيه
وفي الاماكن اللى بيوصفها والناس اللى شافها
تطور الامر بعد هذا واحببت برامج الرحلات
فى التليفزيون وعلى الأخص برنامج كان
اسمه نافذة على العالم
ياسلاااااااااااام
لسه فاكرة المقدمة الموسيقية بتاعته
والفقرات المنوعة وانتقالى بين
الفرحة بمشاهدته وحزنى لأنتهائه بسرعة
لأنه كان 5دقائق فقط لا غير
المهم راحت موضة التليفوزيون وجه الدش
وصار يوم الخميس بعد الضهر هو ميعاد رحلتى وسفريتى
كان برنامج بيتقدم على البى بى سى وفاكرة انى كنت اضلم
الاوضة اللى فيها التلفزيون وافتح ازازة البيبسى
وكمان كيس الشيبسى واسرح مع البرنامج
لانه الصراحة كان برنامج حلو اوى اوى اوى
المهم فضل الدش والتليفزيون
(حبى الأول)
لحد
ما مرة فرجتنى بنت اختى على جوجل أيرث
ياخبر !!ايه دا ياعنى انا ممكن اشوف
الشوارع والعمارات والناس
فى بلاد تانية وانا قاعدة
فى بيتى وانا اللى اختار كمان البلد اللى عاوزة اشوفها
ومن ساعتها وقعت فى حب النت والكومبيوتر
ولحد دلوقتى كل ما ابقى زهقانة من نفسى
ومن الناس والدنيا اشوف اسماء البلاد
والمدن اللى على العداد الجانبى دا
(البرتقاااااااااااااااانى اللى على اليمين )
المهم اشوف اسماء البلاد واطلعهم من الخريطة
واعرف معلومة او اتنين عن البلد او المدينة دى

عـلى فكرة أنا
بـكره السفر جدا
ويـــمكن عشان كده
حبيت السفر على الورق