استدعوا عاملات النضافة بتوع الشغل بتاعنا
واعلموهم انهم لازمن ولابدن يجوا يوم الجمعة
لانهم مستنظريين ضيف مهم اوى يزورنا
ايووووة رامبو المنتصر
واعلموهم انهم حيكفأهم احسن مكافئة
وكمان يمكن يعيينوهم !!!
واو او اوا
المهم فعلا العاملات جم
وجردوا العيادة جردة ماحصلتش
مسح وكنس وتنفيض وغسيل وشبابيك وبيبان
وايه ياعنى
ياسلام ياووووووووله
تانى يوم رحت الشغل لقيته الصراحة بيبرق
شوية وجت عاملة من بتوع النضافة تاخد طلب
سألتها جيتى امبارح ياام عادل؟
ايوة ياستى الدكتورة
ها وعملوليك ايه كافئوكى كويس؟
ردت :الف حمد وشكر لله
جابولنا وجبة مغلفة من اللى بتتوزع فى المشتشفا
حتة لحمة اددددددد كده
ورزززز وخضااااااااار وفاكهة كمان
واحنا ماشيين ادوا كل واحدة فينا عشرين جنية فى ايدها
سألتها ياعنى مبسوطة ردت الحمد لله
كنت حاقعد فى البيت مين حيدينى العشرين جنية
غير وجع الدماغ بتاع ولاد بنتى وقرف جوزها
أدينى أرتحت من دوشتهم
شووووووووووية
وجت عاملة تانية تقيس الضغط
(موعودة انا والله بقياس الضغط دا)
بعد ما خلصت سألتها انتى جيتى امبارح ياشوشو
( اسمها كدا!اهلها دلعوها من اول ما ظلطوها)
اه يا دكتورة
ها وكافئوا زى ما قالوا
قالت حسرة
علينا وعليهم!!!وحياتك يادكتورة ما ادونا اى حاجة
استغربت اوى قلتلها ازاى!!!؟
دول بيقولوا جابوا وجبات جاهزة وفلوس وكده
بصتلى بنص عين كده
!!وجبات
حتة لحمة اد كده
وشوية رز ميجوش معلقة
وحبة فاصوليا بيضا سايطة
ويوسفندياية معفصة
!!!!!!
قلتلها وما ادكيش فلوس؟
قالتلى:ايه العشرة جنية اليتيمة بتاعتهم دى
!استغربت اوى قلتها دول بيقولوا عشرين جنية
!!ردت ايوة صحيح عشرين جنية
والله ما بتجيب حاجة الايام دى
فـعــــلاًإتفاق الناس
على رأى واحد
هو المستحيل بـعينه
8 comments:
في ناس بتبص انها كسبت ولو كان جزء ضئيل وفي ناس بترسم مكسب كبير صعب يتحقق ولما مش يتحقق تحسب الفرق خساره
وهي ده نظرية نصف الكوب المملؤ ونصف الكوب الفارغ
تحياتي
eng_semsem
فيه ناس بترضى
بقليلها وفى ناس لأ
بيعتبروا الرضا بالقليل
هذا ضعف وإستكانة
لكل منا وجهة نظر!!
فعلا يا دكتورة فى ناس بترضى بقليلها اما من منطلق الايمان او من منطلق الى يجى منهم أحسن منهم او اى حاجة أحسن من مفيش وعادة بيكون الرضا بالقليل بسبب أحسن من مفيش وفى ناس ما بترضاش بالقليل لكن مش كلهم بيكونوا شايفين الرضى بالقليل ضعف لكن بيكونوا شايفين ان جهودهم تستحق تقدير كذا وانهم لو لاقوا تقدير أقل يبقى تعبهم راح على الأرض
لميس
كلامك مضبوط
الناس مختلفة
مهما حاولتى
يظلوا مختلفين
اعجبتنى فعلا هذه الحكاية وانت صاحبة فعلا صاحبة قلم ساخر واسلوب بسيط ورائع
ما هو دة مفهوم القناعة
و الفرق بين شخصية و تانية
نفس قطعة اللحمة...
في ناس بتشوف حجمها مناسب جدا...
و حد تاني بيشوفها و لا لها لازمة
سبحان الله
Ayman Aziz
متشكرة لذوقك
ولكلامك وارجو ان
استحـقه ونورتنا فى
اول زيارة لصعبان
AHMED SAMIR
فعلاً يادكتوردا
الفرق بين الناس
وبعضهم فيه اللى بيرضى
بـأى حاجة وفــــيه اللى ما
بـــيعجبهوش اى حاجة برضه
Post a Comment
قول ولا تجرحـش