Monday, November 14, 2011

..... بيللا بيللا......من أعاجيب شارعنا .......



عايزة احكى عن حاجة حصلت بشارعنا

المهم انها حكاية حقيقية بصحيح

عن بنت الناس اللى على اول الناصية

اللى ساكنين بـ

(شبة ناطحة السحاب بتاعتهم)

ناس مقتدريين وعلى مستوى

ابوهم مقاول ياسيدى

وعنده شركة مقاولات كبيرة

(اه طبعاً امال عربية كشرى يعنى )

المهم البنت كان عندها بردون كلبة لولو

جميلةاوى اسمها بللا

اسم على مسمى صحيح

كانت بتنزل تفسحها كل يوم


(اتفسحى يازكزوكااتفسحى يابكبوكا)

على رأى مارى منيب

البنت انشغلت فى امتحانات الثانوية العامة

ومابقتش فاضية لبلللا تفسحها

بس بللا دى روح ولازم تتفسح

ادوها ياسيدى لحارس الجراج بتاعهم

يفسحها ويمشيها كل يوم

شوية ادام البيت

وفعلا عم بخاتى بقى كل يوم

يقوم بالمهمة على خير وجه

البنت خلصت امتحان ورجعت تفسح هى بللا

بس لقيت كده حالتها متغيرة

ومش زى عوايدها

ودوها للدكتور البيطرى

(مبروك المدام حامل قصدى الكلبة حامل)

الدنيا هاجت وماجت

وحاولوا يعرفوا مين

(ال... ابن ال....)

!!اللى عمل العاملة السودا دى

لكن ماعرفوش

لكن عرفوا وللأسف يرفتوا عم بخاتى من الشغلانة

اللى كان بيسترزق منها وعملوا

(إجهاض)
للانسة
(بللا)
وكمان سافرت

فرنسا هى وصاحبتها

لاجل ما تسترد عافيتها

المهم الايام دارت وقابلت

مرة عم بخاتى ده فى الشارع

ازيك وعامل ايه وكده ؟

حكى لى او قالى كلمة ما أنساهاش

شفتى ياست الدكتورة

لامؤاخذة الكلبة اثبتت وانا اترفدت

اثبتت ازاى يعنى ياعم؟

مش سفروها بره

يعنى عملوا لها باسبووورت

باسمها وسنها وطعموها من الامراض

اما انا العامل الاجير اللى باليومية فطردونى

الحقيقة ماعرفتش ارد عليه

الا بكلمتين أطيب خاطره واللى فيه القسمة

وكم فيكى يامصر من المضحكات المبكيات

........
حكاية حقيقية حصلت فى شارعنا العامر

اللى بقى ولا (لندن) فى تنوع سكانه

او زى مابيقولوا حدائق بابل

من الاعاجيب اللى فيه
.....................................

===============
تدوينة قديمة
على مدونتى صعبان نمر ون

أحطــــــها للتذكرة وكمان
للأصدقاء اللى يمكن

ما كانوش أصدقاء
ساعتها أرجو
انها
تعجبكوا كلكم

24 comments:

أم هريرة.. lolocat said...

السلام عليكم

هههههههه والله حبيبتى هم يضحك وهم يبكى
لم اجد انسان يحب الحيوانات فى حياتى بقدر حبى لها لكن السؤال ياترى هذا الحب يصل لمرتبة تكريم الله للانسان

انا لله وانا اليه راجعون
صحيح جنازة حارة (((والحامل )) كلب ههههههه

تحياتى وتقديرى

ظلالي البيضاء said...

لا حول ولا قوة إلا بالله ..
جمعيات الرفق بالحيوان تستفزنا لإنشاء جمعيات الرفق بالإنسان .. علشان نحاول نحصل للإنسان ده شوية من حقوقه .. زي ما حصلوا حقوق الحيوان .. ولسه باقي عليهم يعملوا حق الحيوان في المشاركة في الحياة السياسية والانتخابات ..

سلوى said...

ونفسويتها عامله ايه الوقت ؟؟؟؟؟
عموما تغيير الجو كويس
وده مش اي جو
دى فرنسا :)

شر البليه ما يضحك

مدونة رحلة حياه said...

السلام عليكم
ازيك يا ستى الدكتورة
عاملة ايه
مش عارف اضحك ولا ابكى بس لاسف سمعت اكتر من كدا
فى بيئة لما بتوصل للتعامل والتداخل معها بتختلط احاسيسك ومشاعرك وبتوه نفسك منك وبتبقى فى صراع صعب جدا لما بتشوف اللى بيحصل وبتقارنه باللى عشته وبتشوفه وبيحصل برضه
هقول ايه
ربنا يرحمنا
دومتى رائعة

ابراهيم رزق said...

ههههههههههههه

طب معرفش مين الكلب ابن .... اللى عمل العملة و اتسبب فى رفده

و يا ترى سافرت عادى و فرست كلاس
و هل ذهبت لطبيب نفسى

و هل هم سالوا نفسهم البواب اتعشى و لا

تحياتى

eng_semsem said...

طيب مش تطمنينا عليها
اخبار صحتها ايه
دنيا وفيها العجيب ولسه ياما نشوف
تحياتي

سواح في ملك اللــــــــــــــــــه- said...

فيه مثل كنا بنقوله زمان

ايام الحكومات القديمة

الهي لايرجعها

(كلب الوزير ماتالبلد كلها راحت جنازته
ولما الوزير مات محدش مشي في جنازتة()

بصي يادكتورة

دي عالم باذن الله ربنا هيولع فيهم

وكمان عندهم كلبة عينيها زايغة

طب ذنب الراجل ايه

لما هي كلبة لعوب

مش يكشفوا عليها في الاداب الاول يمكن ليها ملف

هههههه تحياتي يادكتورة

تركي الغامدي said...

تحياتي لشخصك الكريم .... حكاية بألف حكاية لأنها تحكي عن حقوق الإنسان المسلم مقارنة بحقوق الحيوان في عالمنا العربي ... آمل آلا تستمر حقوق الحيوان في صعود وحقوق الإنسان في نزول وخاصة بعد ماسمي بالربيع العربي

أم علي said...

السلام عليكم
و الله كثر الهم يضحّك
لا حول و لا قوة إلا بالله

تحياتي :)

rona ali said...

بيلا بيلا هههههههههههههههههه

حلوة يا نورهاتى بيجد

ضحكتينى لما لقوها حامل انا قولت هيطلع عم بخاتى اكلها حاجه او سيبها مع كلاب مش مستحميه ولا حاجه ههههههههه

انما الكلبه طلعت بتحب الصياعه :):)

norahaty said...

أم هريرة lolocat
وعليكم السلام ورحمة
الله تعالى وبركاته
فعلا هم يبكى وهم
يضحك بس ضحك
كالبكاء تماماً
نورتينى أم هريرة

norahaty said...

ظلالي البيضاء
ما تستعجلش!بكرة
يطالبوا بكل اللى
قلت عليه وزيادة

norahaty said...

ســلوى
نفسويتها
بقت فل الفل
مــش سافرت فرنسا
و(تركت الماضى ورائها)بكل
ما فيه!حسبنا الله ونعم الوكيل

norahaty said...

مدونة رحلة حياه
وعليكم السلام
أنا بخير والحمد
لله أستاذ محمد
أزيكم أنتم؟
أما أحوال الناس
فلا تتعجب منهم فى شىء
شخصياً رأيت منهم العجب
حتى صرت لا أتعجب على
تصرف منهم قط

norahaty said...

ابراهيم رزق
متهيألى سافرت
علىVIPكلاس
مع صاحبتها!

norahaty said...

eng_semsem
لأ اتــطمن خالص
من كام يوم شفتها
ماشيةزى(القرد)مع صاحبتها

norahaty said...

سواح في ملك الله
بيقولولك هى(كانت)ضحية
أنضحك عليها والحق مش عليها
على ال(مجرم)اللى عمل كده

norahaty said...

تركي الغامدي
واحتراماتى أستاذ تركى
وأدعـــو الله مــعك كى
ينال(الإنسان)كل
حقوقه يارب

norahaty said...

أم علي
ربنا يرحمنا
جميعا ويخفف عنا

norahaty said...

rona ali
يارونا هى ملهاش
ذنب (مجنى )عليها
ياحرررررررررررررام:(

momken said...

طريقه كتابتك كوميدى خطيره جداً

ضحكت جداً من تعليقاتك

تسلم ايدك يا دكتور

تحياتى

norahaty said...

momken
الف شكر ياممكن
على كلامك وربنا يرفعنا
عنا وعن بلادنا ما هى فيه

يا مراكبي said...

بغض النظر عن مستوى الرفاهية المُبالغ فيه

كون إن الكلبة طلعت حامل .. فده معناه ان العامل اياه ما كان أمين في شُغله وما انتبه للكلبة

وده في حد ذاته اهمال في العمل

أنا شايف ان عندهم حق في مُعاقبته

norahaty mo said...

يامراكبى
وجهة نظر برضه

Post a Comment

قول ولا تجرحـش