Tuesday, March 22, 2011

النهاردة أول مارس!!.....تـدوينة قـديمة


اول مااااااااااااااارس النهاردة
يوم كان حيمرعلى زى ما مر قبل هذا كتير
لولا ان الست اللى أستأذنت تدخل
قبل
دورها فى الكشف فكرتنى بيه
معلش ياستى الدكتورة
اصل ابنى رايح يستلم الشغل النهاردة
نسى الكارنية بتاعه معايا
وانا رايحة اوديهوله
خلص كلية الطب
وحيبدأ سنة الامتياز النهاردة
يااااااااااااااااااااااااااااااااااخبر
الامتياز
اه صحيح !!احنا بندأ الامتياز فى شهر مارس
بعد ستة اعوام من العذاب
فى كلية الطب والعذاب
لأ كده غلط
فى كلية
العذاب والطب
لتبدأ بعدهم
سنوات الشغل والعذاب
برضه كده غلط
لتبدأ بعدهم سنوات العذاب والشغل
والله ماهى نظرة تشاؤمية ولا حاجة
لكن نظرة حقيقية من بعد ممارسة المهنة
سنوات كتيرة
مش حأقولك ياللى بتسأل كام !
ملكش دعوة!
مش حأقولك حاجة غريبة الناس دى!
المهم اليوم ده رحت استلم
ابص لاسمى ياخويا فى الكشف
الاقينى نساء
اكره فروع الطب الى قلبى !
طيب أمرى لله
رحت على مستشفى النساء والولادة
فين الاسامى ياعمى بتوع الامتياز
اللى هناك عندك دى
ابص!ابص!أبص!
ياوووووووووقعة سوثا
ياووووووووووووقعة زرقا
ياااااااااااااااااااااااااااااااااااااااااقعة فحلوقى !
اية دا :نوبتشية بليل
من الساعة 8مساءا
اول يوم
فى الشغل
نوبتشية
وبليل
ونساء
وووووو
وووووووووو
ووووووووووووو
ولادة
رجعت تانى البيت
ومعلش ياعم
محمود السواق
ماكنتش لسه اتعلمت السواقة
ابقى تعاللى بليل احنا أسفين يعنى حنسهرك
(وفى عقل بالى وانت راجل كبير وكبّارة بتنام من العشا )
لأ معلش مفيش حاجة
ده هو اللى بيقول
المهم
مش حأقولكو الجو كان شكله ايه ليلتها
بالظبط زى مابتقولى كده
مكمل للجو العام
وزى ما بيجى فى الافلام العربى
مطر ورياح وصواعق وعواصف كمان
انا فاكرة عملت ليلتها
(ولحد الان ما أعرف ليه)
شنطة ولا بتاعة الرحلات الخلوية
ولا كأنى رايحة الصحرا مش المستشفى
اللى بقى لى سنتين بروحها
سندوتشات وترمس شاى
ولب وسودانى
وووووووو
حمص
اصل
بموت فيه
ومش حأنسى
الخيار
طبعا
رحت
لقيت كل اللى معايا فى الجروب
ناس ماعرفهاش خالص
وكمان اللى زود الموضوع
بنين
اى
صبيان
اى
رجال
وكل واحد والتانى
بلاااااااااااااااااااااااااااكار
على رأى عزت ابو عوف
طبعا بقيت عماله اوسع لنفسى مكان بينهم
وكأنى بحفر فى الصخر
وكل شوية
لوسمحت
لو سمحت
ل
و
و
و
و
اوووووووووو
ايه فيه ايه؟
صباعى يادكتورررر
انا مالى بيه؟
انت دايس عليه حضرتك!
ايه؟
انت دايس على صباعى !
اممممممم
اممممم
امممم
اه طيب
معلش
الحوار اللى فات ده اتكررر ررر
كتير فى هذه الليلة
وبعدها طبعا
لكن الحقيقة
بعد كده بقينا
زملاء
عاديييييين خالص
وحتى معلش مابقوش يقولوها!!
المهم الليلة دى
انا فاكرة كذا حالة ولادة جت
ومش حأكذب النواب هم
اللى عملوا كل حاجة و أحنا كنا بنتفرج
يمكن غيرنا بعد كده بقى بيشتغل بأيده
لكن وللاسف
احنا كنا
متفرجين
ومشوارجية
بمعنى خدوا العيان ده للاشعة
العيان ده للتحليل
روحوا بنك الدم
خدوا التاريخ المرضى للحالة
او كتابة الروبورتات
وهكذا
لكن برضة اشتغلنا كتير
فى العيادة الخارجية
من ضمن او اكتر حاجة فاكراها فى الليلة
دى اول مرة اشوف
وعلى الطبيعة
والحقيقة
ولادة طفل
شىء
ربانى
الهى
سبحان الله
قرأت كتير وذاكرت كتير
لكن تشوف بعينك
عينك اللى هى
فى ام رأسك
دى حاجة تانية
منظر لايمكن
تنساه
سبحان ربى العظيم
انا فاكرة كانت بنت
وزى القمر!
سموها ساعتها
فط النور
اصلها اتولدت وقت اذان الفجر
بالضبط
امها كانت من العزبة
اللى جنب الكلية زمان
عزبة القرود
(هكذا كانوا يسمونها)
او عرب المحمدى
الحين اصبحت
جناين وحدائق.
وعلى أد برضة ما كنت فرحانة
انى خلصت الكلية
وارتحت من المذاكرة والامتحانات
على قد ما كنت حاسة ان فيه حاجة نقصانى
ونقصانى كتير
وحاجة كبيرة اوى
اوى
اوى
اوى
امى
توفت قبل امتحاناتات
البكالوريوس
بشهرين
فقط
لكن دى حكاية تانية
خليها
لمرة تانية
بأذن
الله
تعالى
وتسلمولى من الشر كله
ويفرحكوا المولّى
باحبابكوا
جميعا
------------
تدوينة قديمة
فى مدونتى الأولى
صعبان على حالنا
نمر ون
تدوينة احبها كتير وبفتكرها كتير
لأنها بتفكرنى
بذكريات وزملاء وأشخاص
وأحداث كتيرررررررررررر
-------------

13 comments:

Unknown said...

أهـ وأهـ وأهـ
ذكريات قديمة وجميلة

لــــ زهــــــراء ــــولا said...

هههههه تعيشي وتفتكري كل الذكريات الجميلة دي يا ست الداكتورة ههههه وحشتينا يا اجمل دكتورة
لولا

khaled said...

فعلا
ذكريات جميله
كأنك فتحتي الصندوق وطلعتي منه اوراق اصفرت من كتر ما طال عليها الزمن
تسلمي

Unknown said...

لولا وزهراء
تسلمى وتعيشى
يالولا ياأجمل لؤلؤة.

Unknown said...

khaled
هى ذكريات
بتجيب بعضها
أو بتيجى ورا بعضا
وكأنها مربوطة بخيط واحد.

Unknown said...

جميل أن يكون للإنسان ذخيرة من الذكريات الطيبة يعود إليها ليستمد منها العون على الاستمرار......

شكراً لك على هذه الفرصة الطيبة فى أن نشاركك جزءاً من عبق الذكريات

Unknown said...

أستاذ محمد الجرايحى
الشكر لله أن وهبنا اياها
ووهبنى أصدقاء أفاضل يشاركونى
فيها.

تــركــي الــغــامــدي said...

مهما كانت الذكريات مؤلمة أو سعيدة تظل زاد النفس المحلقة في عوالم النفس المطئمنة .
طرح موفق بارك الله فيك ويسر أمرك

الشاعر الفنان أحمد فتحى فؤاد said...

دائماً تبقي الذكريات

و دائماً ما نحن لكل أيامنا الجميلة الماضية

ربنا يرحم والدتك و يدخلها فسيح جناته

تحياتي لكي اختي الانسانه

دمتي بخير

Unknown said...

تـركى الغامدى
صدقت استاذ تركى
فالذكريات زاد لنا
على مسار الأيام

Unknown said...

الشـاعر الفنان
أحمـد فتحى فـؤاد
بارك الله فيكم استاذنا
ورحــم الله أمواتنا أجمعين

Dr Ibrahim said...

ربنا يبارك فى أعمارنا جميعاً..
أنتم السابقون ونحن اللاحقون بهذه الفترات التى يجب أن يمر بها كل طبيب :)

Unknown said...

Dr Ibrahim
عن قريب بأذن الله:)
يادكتور إبراهيم
وماتنساش ساعتها
تبقى تحكى لنا
ما مـر بك
من أحداث
ساعنها

Post a Comment

قول ولا تجرحـش