Monday, August 16, 2010

.....أرزاق........أرزاق...........


أرزاق ...أرزاق
مقسمها الخلاق
ناس رزقها كتير
وناس رزقها قليل
ناس مبسوطة وعايشة
وناس تقول أهـى ماشية
ناس عدتها دراعها
وناس عدتها دماغها
تهلب ....!تحّوش!
تناكف .....!تكّوش
ناس تقول الحمد لله مستورة
وناس زعلانة ومقهورة
ليه غيرها واخد وكابش
وليه هى حالها قافش!
ناس يجى لها رزقها
على ورق سوليفان
وناس شوية شوية حتهد الحيطان
الفكرة جت لى الصبح
لما شفت دى

أيوة قالب طوب ولا جرانيت
ولا مش عارفة أسمه ايه؟
من اللى بتعمل به الرصيف
يستخدمها أحدهم
لحجز مكان
أى مكان بالشارع
ليساوم بعد ذلك
الزبون:صاحب السيارة
التعيس لاجل مايزيحه شوية
ليركن سيارته
وياخد هوالمعلوم بعد كده
بسأل نفسى كتير
ياترى
رزقه حلال ولا حرام؟

18 comments:

Unknown said...

بسم الله
توكلت على الله
لا حول ولا قوة الأ بالله
اللهم أجعل أوسع
رزقى عند كبر سنى
وأنقطاع عافيتى
اللهم آمـــين
يارب العالمين

حفيدة عرابى said...

ياسيدى ياسيدى على الحكم اللى نازلة علينا
وبعدين ياأبلة العرابية انا ماليش فى حفظ الشعر خالص انا اخر حاجة حفظتها مكر مفر :)

لأ أنت ليكى فى كتابته كمان
تسلم ايديك يادكتورة
بالنسبة لسؤالك مشروع جدا
بس أخاف أقول اجابة
ربنا يسترنا جميعا ويرزقنا بالحلال

رحلتنا في الحياة said...

تسلم ايديك يادكتورة
هى ارزاق فعلا ولو كل انسان يرضى برزقه نرتاح

Tarkieb said...

أرزاق

تــركــي الــغــامــدي said...

أسعد الله أوقاتك في هذا الشهر الفضيل وكل شهور العام ... تذكرت وأنا أقرأ مادونت مشهداً تمثيلاً لدريد لحام وأبو غوار (ممثلين من سوريا الشقيقة) حيث يقومان بعمل لوح خشب زرعت فيه بعض المسامير توضع أمام السيارات المارة لكي تمر عليها العجلات فتعطب ثم يقومان بمساعدته بكل براءه من باب الاسترزاق . للأسف تبدو بعض الأعمال مثل ذلك ، وهي احتيال أجده غير لائق بالإنسان المسلم ، والله المستعان .

Ramy said...

مش عارف صدقينى

بس اللى أقدر أقوله كتر خير الناس

مش عارفة تسترزق بالمعقول او يعنى بالطرق السلمية (:

ربنا يتقبل دعائك

و يارب يكون لنا مثله

ربنا يوفقك

رمضاااان كرييييم

P A S H A said...

تقريباً اسمها باردورة
:)

الشعر حلو على فكرة .. بجد تسلم إيدك

كل سنة وأنتِ طيبة

richardCatheart said...

ازيك يا نور وحشتينى
كل سنه وانت بالف خير ولله اقرب

من غير ما تسالى هو عارف حلال ولا حرام
يارب ديما بخير

Unknown said...

و الله علمي علمك...
بس دي مش أسوأ حاجة شوفناها ، ربنا يرزق الجميع بالحلال...
رمضان كريم و كل سنة و انتي بالصحة و السلامة...

محمد عرفة said...

كل سنة وانتى طيبة

يا دكتورة

التدوين والمدونة وحشنى كتير


وان شاء الله احتمال ارجع قريب

ربنا يسهل


وشكرا على السؤال

شمس النهار said...

ازيك يادكتورة يارب تكوني بخير وصحة وسعادة
كل سنه وانتي طيبه
رمضان كريم

انتي كمان وحشتيني
ومايشغلنيش عنكم الا الشديد القوي
والاحباط من بعض ساكني البلوجر

بالنسبه لموضوع الركنه بتاع العربيات دي بلطجه تحت سمع وبصر الدولة متمثله في الحي
ويقال والله اعلم انهم بيقسموا معاهم نظير انهم يسكتوا عنهم
وخلاص الناس اغلبها اختلط عندها الحلال والحرام

سلامي

الازهرى said...

الحلال بين والحرام بين وبينهما أمور مستبهات

وللأسف كل بيمشى ورا المشتبهات لحد ما يقع فى الحرام ويقول مش واخد بالى مش عاررف بيضحكوا على مين بالكلام ده


كل عام وأنت وكل أحبابك فى خيير حال

Anonymous said...

البلد فيها حاجات كتير ماشية غلط وللأسف معظمنا غمض عينه وسمح للغلط إنه يحصل، من غير ما يشعر إن بمجرد سماحه ده، ساعد بنفسه وإشترك في حدوث الغلط وإستمراره... من ضمن الحاجات دي سماسرة وفتوات أماكن ركن العربيات... رغم إن الجميع عارفين إن الشارع ملك للجميع وليس ملكا لشوية بلطجية، إلا أنهم بيساعدوهم بسماحهم لهم بالإستمرار في اللي بيعملوه. أما من يصفون ذلك بالأرزاق وبيلتمسوا عذر إن الحياة صعبة ومفيش شغل، فأختلف معهم... الشغل موجود في كل مكان... إحنا بس اللي غرقانين من زمان في بحور من الكسل والجهل والتخلف، ومع ذلك بننقد وبنعيب أنفسنا، مع إن العيب فينا إحنا

يا مراكبي said...

طبعا سؤالك في محله .. لكنه رزق مش حلال طبعا لأنه يسترزق ويتصرف فيما لا يملك

نوع من أنواع التحايل مهما كان شكله فهو تحايل في النهاية

جنّي said...

السلام عليكم

كل عام وانتي بالف خير وصحة وعافية ورزق واسع ..

ومبارك عليكم شهر رمضان

الشاعر الفنان أحمد فتحى فؤاد said...

نوراهاتى نوراهاتى نوراهاتى

كل سنة و إنتى طيبة و بخير و بسعادة

كده أنزل مصر ما تسأليش عليا ؟
ياللا مسامحك ده برضه شهر كريم
بس المرة الجاية لا ممكن أبدا
أوكى؟

يا رب يزرقك و يرزقنا بالجنة
أمين يا رب العالمين

دمتى بخير و سعادة
خالص تقديرى و إحترامى

Anonymous said...

السلام عليكم
كل سنه وانتى طيبه ويارب دايما بخير
ويارب يبقى شهر كله سعاده لكى وللامه كلها

موضوع الحلال والحرام للاسف مش مطروح عند ناس كتير حتى ولو كان فى شهر رمضان
المهم ان الناس تحاول تجمع فلوس
ممكن حد يقول انها قليله
احيانا تكون البركه فى القليل اكثر من كتير مفهوش بركه
ده حتى على المستوى الدنيوي مش فى الاخرة
ربنا يرحمنا
ربنا يكرمك ويسعدك

وفاء بركات said...

د. نورهاتي
كل سنة وانت طيبة وبصحة وأحسن حال
رمضان كريم أتمني لك صوما مقبولا إن شاء الله

Post a Comment

قول ولا تجرحـش