الشاي بلبن
الشاي بلبن مشروب عمره ما ادّعى حاجة مش فيه... عمره ما قال إنه هيفوقك زي القهوة والنسكافيه، ولا هو مهدئ وبينيم زي أي أعشاب، هو مدرك أنه مشروب وسيط مهمته يخليك متقبل للحالة اللي هتدخل فيها سواء كانت بداية يوم، شحن طاقة ف نصه أو استعداد للراحة والنوم. ببساطة هو مبيخلقش الحالة بس بيساعدك تتقبلها.
الشاي بلبن مشروب هادي ومتقبّل لأي حاجة تانية جنبه، عمره ما كان متباهي ولا فرض طعمه على أي حاجة بتاكلها معاه وشوهها، بالعكس ده بيسهل استمتاعك بكل حاجة جنبه.
الشاي بلبن هو دفا صبح الشتا، السهر مع قرايبك للصبح لحد ما جدتك تصحى وتفطروا مع شاي بلبن، هو حضن طويل من غير ولا كلمة بس بيقول كل حاجة، وهو صاحبك الأصيل اللي لو مشفتوش لسنين يفضل أكتر واحد فاهمك وحاسس بيك.
مشروب بسيط كده مش محتاج تكليف ولا تعقيد ولا تجهيزات، حد أكيد كان زهق من طعم الشاي لوحده وجرب يحط لبن طلع مشروب عظيم بقى مصدر سعادة لكل الناس.
صباحكوا شاي بلبن .
0 comments:
New comments are not allowed.