..ناس عايشين فى بلد أخــر...

أخذتنى أبنة أختى
الى النادى
الفخيم
اللى هى عضوة
فيه بناءاً
على زواجها
من عـــضو فيه
بالوراثة
المهم
كلما ذهبت هناك
مسحولة كالعادة
اجد عالماً
أخر
غير الذى نعيش فيه
أجد اناسا مستريحين
تقرا على وشوشهم
الراحة
ناس ما  بيركبوش مواصلات
 ما بيقفوش فى طوابير جمعيات تعاونية
لصرف حصص التموين الشهرية
ناس ما بيتكلموش فى كيلو اللحمة
اللى بقى ب80جنية
ولا درس  الحساب اللى بقى ب 60جنية
ولا عن البنزين ولا أجرة التوك توك اللى بقت 2جنية ونص
 !! ولا عن  قطع نور أو ميه
اومال بيتكلموا عن أيه؟
اقولكم
 عن الفيلا اللى فى الساحل الشمالى ومش عارف
ينهى أجراءات تسجيلها
عن الويك أند فى دبى والشوبنج فيها
عن  زيارة سريعة
ياعنى خطفة رجل تقريبا للندن
نشوف اخو المدام  قبل ما يهاجر كندا
عن الجار القاسى اللى ضرب
روكى
فى صدره
وهو عارف انه
(روكى ياعنى)
لسه
عامل عملية قلب
 اتضح ليا بعد كده أن
  روكى دا
(عفواً كلب)
اعرف أنها قسوة
غير مبررة ناحية
حيوان
***
بعد كده
حد يسألنى
وبتتبسطى
من الخروجة؟
الصراحة
لأ
مش بقولكم
بروح مسحولة
ياعنى بالغصب عنى
(عالم غاوية نكد بعيد عنكم)


..... بيللا بيللا......من أعاجيب شارعنا .......

عايزة احكى عن حاجة حصلت بشارعنا

المهم انها حكاية حقيقية بصحيح

عن بنت الناس اللى على اول الناصية

اللى ساكنين بـ

(شبة ناطحة السحاب بتاعتهم)

ناس مقتدريين وعلى مستوى

ابوهم مقاول ياسيدى

وعنده شركة مقاولات كبيرة

(اه طبعاً امال عربية كشرى يعنى )

المهم البنت كان عندها بردون كلبة لولو

جميلةاوى اسمها بللا

اسم على مسمى صحيح

كانت بتنزل تفسحها كل يوم

(اتفسحى يازكزوكااتفسحى يابكبوكا)

على رأى مارى منيب

البنت انشغلت فى امتحانات الثانوية العامة

ومابقتش فاضية لبلللا تفسحها

بس بللا دى روح ولازم تتفسح

ادوها ياسيدى لحارس الجراج بتاعهم

يفسحها ويمشيها كل يوم

شوية ادام البيت

وفعلا عم بخاتى بقى كل يوم

يقوم بالمهمة على خير وجه

البنت خلصت امتحان ورجعت تفسح هى بللا

بس لقيت كده حالتها متغيرة

ومش زى عوايدها

ودوها للدكتور البيطرى

(مبروك المدام حامل قصدى الكلبة حامل)

الدنيا هاجت وماجت

وحاولوا يعرفوا مين

(ال... ابن ال....)

!!اللى عمل العاملة السودا دى

لكن ماعرفوش

لكن عرفوا وللأسف يرفتوا عم بخاتى من الشغلانة

اللى كان بيسترزق منها وعملوا

(إجهاض)
للانسة
(بللا)
وكمان سافرت

فرنسا هى وصاحبتها

لاجل ما تسترد عافيتها

المهم الايام دارت وقابلت

مرة عم بخاتى ده فى الشارع

ازيك وعامل ايه وكده ؟

حكى لى او قالى كلمة ما أنساهاش

شفتى ياست الدكتورة

لامؤاخذة الكلبة اثبتت وانا اترفدت

اثبتت ازاى يعنى ياعم؟

مش سفروها بره

يعنى عملوا لها باسبووورت

باسمها وسنها وطعموها من الامراض

اما انا العامل الاجير اللى باليومية فطردونى

الحقيقة ماعرفتش ارد عليه

الا بكلمتين أطيب خاطره واللى فيه القسمة

وكم فيكى يامصر من المضحكات المبكيات

........
حكاية حقيقية حصلت فى شارعنا العامر

اللى بقى ولا (لندن) فى تنوع سكانه

او زى مابيقولوا حدائق بابل

من الاعاجيب اللى فيه

.....................................

===============
تدوينة قديمة
على مدونتى صعبان نمر ون
أحطــــــها للتذكرة وكمان
للأصدقاء اللى يمكن
ما كانوش أصدقاء
ساعتها أرجوانها
تعجبكوا كلكم