Saturday, March 28, 2015

...زلــــــــزال يا اماااااتى زلزاااااال...


ما أذكره عن زلزال 1992
انه حصل  حوالى الثالثة ظهرا
 تـــــــــــــقريبا
المهم كانت فيه
ازازة بيبسى
كبيرة
ازاز

(مش بلاستك)
محطوطة
على تربيزة السفرة
 مسكتها بسرعة قبل ما تقع تتكسر
وتكسر أزاز التربيزة معاها

 ونزلت جرى
على السلم لقيت اختى
بتسألنى عن أبنها
 فين ؟؟
(كان نايم عندى)
قلتلها بكل براءة

!!نسيته
نسيت أبن أختى
!! وافتكرت الأزازة
ومن يومها وهم مسكينها
ليا ذلة
(تفتكرى أزازة البيبسى وتنسى ابن أختك)
وأهو امبارح اتجددت الذكرى
لكن فين اختى ؟
وفين أبنها؟
وفين اللمة؟
وفين الضحك؟
وفين؟ وفين ؟ وفين؟
سبحان من يُغير ولا يتغير
سبحان الله
كتب الله لكم السلامة جميعاً
الخبر من الوطن

13 comments:

Tarkieb said...

هو كان في زلزال امبارح؟

Unknown said...

تراكيبوا
أهـ ربنا يكتب السلامة
للجميع,بس كان على خفيف
وكمان فترته قصيرة
ماوصلش المانيا☺☺☺

Unknown said...

بمناسبة زلزال 1992
كان فيه بيت قديم إشترناه قبل الزلزال بفترة بسيطة
بجوار جدى من والدتى ، وكانت هذه الفترة ، جمع قطن
فاستأذن جدى من والدى بأن يضع القطن بتاعه فى هذا البيت
ويوم الزلزال ذهبت أنا وخالى صديقى الصدوق لكى نضع القطن فى الأكياس الخاصة به
وأخذ يكبس بساقيه القطن فى الكيس
وفجأة وجدنا حيطان البيت بتتهز وتتراقص يمينا ويساراً
افتكر نفسه هو اللى بيحرك حيطان البيت من قوته
وأخذ يردد فى زهو بقوته ويقول
شايف ياوله أنا اللى بهز حيطان البيت
وفجأة سمعنا صوات حريم قلت أفتح أشوف فيه إيه قالولى زلزال
إتجهت إليه مسرعا وقولت له إنزل يا فالح إنزل الحق نفسك ده زلزال
قفز خالى قفزة كبيرة من داخل البيت إلى الشارع
وضحكنا جداً على الموقف وكل ما أقابله وأفكره نضحك سوياً
احتراماتى

م م said...

،نقبت وفتشت كثيرا لكني لم اعرف ابدا زلزالا يشبه زلزالك
انا مش لاقي اي خبر عن الزلزال ، تقريبا مافيش حد فاضي للزلازل
تضامنا مع الحمى العربية
حتى الارهابيين طلعوا وطنيين
بيوقفوا تفجير البومب وقت المؤتمرات،
،ده شيء بديع جدا

زهــــراء said...

صباح الورد يا دكتورتى
لم اشعر بهذا الزالزل لكن زلزال 92 فاكره كويس اوى كنت فى تانيه ثانوى وفى البيت لوحدى وجيرانا اللى فوق قرروا اليوم ده يذهبوا للبحر وقولت له الجو هيقلب ان شاء الله وهيبقى هوا هههههههههههههه وانا قاعده فجاه لاقيت نجفه الصالون رايحه جايه جايه رايحه قولت ايه ده هو اللى بيحصل ده عادى او انا باحلم ركزت شويه ووقفت تحت النجفه عشان لو وقعت امسكها قبل ما تقع على الارض ههههههههههههه شويه وشكتت رجعت اذاكر
على فكره احنا كل حاجه فى حياتنا اتغيرت حتى رد فعلنا على الزالزال مش لمتنا بس اللى اتغيرت وراحت اعتقد طعم اى حاجه بيرتبط بوقت ومعين وناس وصحبه معينه

النسر المهاجر said...

الزلزال لم يتعدى ثوانى مقارنة بزلزال 92
ورغم كم الخراب الناشئ عن الزلازل
الا انه ومن المفترض أنها أية من الله لتذكرنا بيوم القيامة
تخيلى ان بضعة ثوانى قد ترهب القلوب
فما بالك يوم تدمر الأرض وتخسف من مشارقها ومغاربها
وتطفئ الشمس وتدمر الجبال
وستكون هى النهاية
الزلازل أيه من أيات الله لتذكرنا فقط وإن كانت ليست على قدر ما سيحدث
نسأل الله حسن الخاتمة
تحياتى دكتورة نور

Unknown said...

مدونة الفرسان
احنا حصل معانا بالعكس
كان عندنا بيت قديم وتعبان اوى
فى قلب مــــــــــــيدان السيدة زينب
المهم من زهقنا منه بعناه قبل الزلزال بسنة تقريبا
واللى بعناه له باعه هو كمان لأجل ما يجى الزلزال
يجيبه الأرض والمشترى الأخير يكسب اضعاف
والمشترى الأخير يكسب أضعاف ما دفع
لكن نقول ايه؟هى ارزاق مقسمها الخلاق

Unknown said...

م م ☺
انت بتشك فى اخباراتى؟
على العموم انا حطيت رابط
للخبر اخر التدوينة ولا أقولك
أتفضل الخبر اهوه

Unknown said...

زهــــــراء
واقفة تحت النجفة☺☺☺
علشان تمسكيها☺☺☺
الحمد لله ربنا ستر
ليا بنت اخت زىك كده
وقفت ادام دولاب الفضية
خااااااااااااااااااافت عليه
☺☺☺والحمد لله ربنا برضه ستر

Unknown said...

جمال ابو العز
اكيد الزلزال آيه من آيات الله
ومثله مثل البراكين وحرائق الغابات
بالرغم من الدمار الظاهرى الأ انها
بتكشف ساعات ثروات مخفية فى باطن
الأرض أو كمان بتجدد التربة بتاعة الأرض نفسها
سبحان الله له فى كل شىء آيه
وادى العشا بتأذن كمان
اللهم نسالك الستر والرضا
فى الدنيا والأخرة

أحمد الصعيدي said...

انا كنت فاكر انك انتي اللي نسيتي ابن اختك :)
صباحك رضا

محمد سلامة said...

هههههههههههههه
فكرتينى
كنت فى لسة عيل صغير وأخويا رضيع
أبويا صحانى وأخدنا بعض
وطلعنا فى فسحاية جنب البيت منتظرين يقع هههههههه
وأبويا يقول يا ساتر يا رب
طلع جارنا من البيت اللى جنبنا مغمص ويتشحط
ويقول فيه إيه ؟ :)

Anonymous said...

شركة مكافحة حشرات بجنوب الرياض

Post a Comment

قول ولا تجرحـش